Read Lamnso Jeremia 48 Bible Online

Jeremia 48 - Lamnso bible

Jeremia 48

¹Ntum yee kùm wír veé Moav rə̀ne. NYÙY TÀR woo Taà Mànjòŋ, wun woo Nyùy wìr veé Isray suuy jii: «Lòné dzə̀ wó wìr veé Nebo, á sí lo, e bvəʼə́y fó. Á lo, e tòn Kiriatayim, é wír vee fóo wáa woomé. Á yíi bvəʼə́y kikum ke ŋkàlaʼ, e shoór fó.

²Á yòʼ dzəə́ wìy a yu yír Moav. Aŋgàa vibàn véví tàŋ ne menàŋ é Heshbon, e yòŋ ji á wáa wìy, aá sə́ʼsí á kitúm kee Moav kìn. Éè wìr veé Madmen, á yíi sətí sa shuu wón, vèn yòʼ yíi bòy fo rər se sí lo, e nəə́.

³Á yuúrí, e yù tóŋ ye yí wiy fo Horonayime, aá tóŋ a dzə̀ rə́r se sí nəən, e laàr fó.

⁴«Aŋgàa vibàné bvə̀ʼə́y ne Moav, á yú mo wón vee fóo bur tóŋ.

⁵Wíri kóʼ bam Luhit, tóŋé, kóʼ bèy, a tóŋe távkir tàvkín. Á yú mo wíri sə́y bam Horonayim, sə́y bèy, tóŋ ŋgeʼ se sí nəən áwune.

⁶Vèn wáa leʼ cér e kitú kén kí. Vèn du, e màʼrì vitú vén é woʼ moo kfə́nkír.

⁷«Wír veé Moav, mo vèn tiirin vifií a dzə̀ é vitaaví ve vèn kérí, e tìír e vifa ve vèn kérí, bo aŋgàa vibàné kù yíi koorí sa ven moo vitúm vímóʼ ví, e dù sho. Á kù yíi koo *Kemosh woo nyùy won, e koo sa atàá cù və́ wùn à ŋgàŋ sə́ sí, e dù sho.

⁸Ŋgaà vibàn yíi laàr ŋkà se laʼ sidzə̀m, bó ŋkàlaʼ yìmòʼ yòʼ yíi ber. Á yíi səʼsí viwoóy, e laàr virə́ʼ vé mboʼ vi, kù mo NYÙY TÀR suuyin.

⁹Bo á kì fò vav si e Moav, aá yiì a feŋ sho, a leʼ.[55] Ŋkà se laʼ see fó si yíi a dzə sisaʼtìn, é la wìr yòʼ a dzə fo.

¹⁰Lòné ku koò wír wo wù yii lim ye NYÙY TÀR foon, kér ŋgòy. Lòné ku koò wír wo wù bavtin nyùy rə rə̀r é kiburúʼ.»

¹¹Moav kù‑uù rə́si dzə́ e kiŋsìn e kèʼ fo meterí, aá yòʼ‑oò yiì ne koò áwune, e dù sho e kwaʼ vikwàn. Moav dzə̀ moo meluʼ me á tiirin ji mè bíy kitém kimòʼón, meluʼ, aá yoʼ kùvsín kitém, a mè koó mejuŋ, a kirəm kfə́ kí yoʼ kùvsín.

¹²NYÙY TÀR suuy jii, «Ké lèn ki, sì ghán see shó, se m tsə́nsi wíri, aá cuúr Moav mo á cuùrì meluʼ, e bvəʼtí fó mo á bvə̀ʼtí vitém.

¹³Kí kooy bèy, é wír veé Moavi nèn a woomé bìʼ nyùy wov woo Kemosh wo wù màʼàn ne áwune, réŋréŋ mo wír veé Israyi‑iì wayin shilív e nyùy wov woo Betel wùn, wù màʼ áwune, á wáa woomé.

¹⁴«Moav, a dzə̀ vèn yèe, bó a tav ji vèn dzə̀ viŋgum ve wìr, a tav ji á dzə̀ vé rər ve tavkíné?

¹⁵Aŋgàa vibàn véné sí nəə ŋkà se laʼ sén e rə́r sí, e laàr, á sí lo, e yuyrí wónlě nsùm vén. Suuy mo woo Fon, wo m dzəə̀n NYÙY TÀR woo Taà Mànjòŋ.

¹⁶Ghán se á lo, e bvəʼ Moav si sì fó mentsə̀m. Bvə́ʼ bèy, é ŋgeʼ ye tavín gbu aáwuné kitu.

¹⁷Vitúm ve ví kaarin Moav vi kú a dìy áwune. Ven ve á kiìn áwune kijuŋ, vèn wáa yòŋ jii, ‹Sáʼ yév ye tavíné gbù ne. Viwìr vév wùn à vitaáví vév ví mày ne.›

¹⁸«Éè wìr veé Dibon, vèn maʼti ghay wón kiŋkoʼòrwùné, e sèsín a dzə̀ é kibvə̀r. Ŋgaà laàr wo wù laar Moav, lo, e kìʼ ven lèn, e bvəʼtí virə́ʼ ve tavkín vee věn ŋkàlaʼ.

¹⁹Éè vèn ve á dzəə̀n é Aror, vèn fəə́, e tìím e ghaa dzəə, a leéy. Vèn wáa dzətí e vilum, a dzətí e vikìy ve á nyéŋkirìi, vèn wáa dzətí ji sà kòóy ka á?

²⁰Á yíi bìnèr ji á shòór ne a Moav, fóo sáʼkír. Vèn wáa toŋ, a dìy. Vèn wáa fìʼtì e ŋguùŋè ndzə̀v yee Arnon, ji á bvə̀ʼə́y ne a Moav.

²¹NYÙY TÀR màʼ a ne ŋgeʼ e ŋkà se laʼ seé mboʼ gwan sí kitu. Lòné koò ne a Holon wùn à Jahas, à Mefa‑At,

²²e koò Dibon, à Nebo, à Bet‑Diblatayim,

²³e koò Kiriatayim, à Bet‑Gamul, à Bet‑Meon,

²⁴e koò sá Keriot, e lì Bosra. Lòné koò ŋkà se laʼ seé nsay Moav sidzə̀m, see kwaʼda, à see fó mentsə̀m sí.

²⁵Á màyìr ne vitaáví vé Moav, á sə̀ʼə́r ne kóy wóv. Suuy mo woo NYÙY TÀR.»

²⁶«Moav sí kóʼor kitú kfə́ shaa NYÙY TÀR. Á ku nòór áwune, é mè koó, áwune lóo màʼ, lóo dzəŋrí sho, é kitú ke nsay ki wáa lì áwune ji kifá ke nshéʼmé ki.

²⁷Moav, kí vèn‑eè shéʼ wír veé Isray? Vèn‑eè lo koò áwune ji ashóŋ á, e bó a fèr vinyo kùm áwune, a shèŋ kitú?

²⁸«Éè wìr veé Moav, vèn fəə́ fó ŋka se laʼ, e dù, a dzə e vilála, moo vibìŋ ve ví yii baʼrì láʼ e vitu ve koŋ.

²⁹Ver adzə̀me yù ne mo Moav kóʼor wún. Wù raʼsì wún é ŋàŋ. Wù din wún, kér kiŋkoʼòrwùn, kóʼninè, kfə̀n guynìn ŋkóŋkóŋ féyì.

³⁰Mómò woo Nyùy, m kì kitú kév ke tavín kí. Kiràʼsìwùn kév kí dzə̀ kisáŋ, kinyè kí yòʼ dzə̀ é vinyò ve á yii.

³¹Á bèy, m yíi a dìy Moav, m yíi a toŋ kpú wìr veé Moav adzə̀m, a dìy wír veé Kir‑Heres.

³²Éè wìr veé Sibma, m yíi dìy kpú yén, e shaà yé wìr veé Jaser. Vèn‑eè dzə̀ moo kitiír ké *vayin, kitiír, ke tám si ràmèn, e lìysín Ndzə́v Shiŋgwaŋ, e dù, e bàʼ e Jaser.[56] Yii bèy, ŋgaà vibàn wìy ne, e laàr báŋ se sí koomen se á koy, fer meluʼ sho, e laàr sa sé vici ve á yii koy e lùm.

³³Vijuŋ vi yòʼ dzə̀ə́ e Moav, kishéʼrì ki mày ne fo wòŋ, a wú kér nsay ye borín. M yiì ne tútúʼ wo á fer meluʼ sho búŋ fó wòŋ. Á yòʼ dzəə́ nyeŋ, a ŋkěŋ kisheʼrìi kóʼó. Leŋ wo wú kóʼ fo foo yòʼ dzə̀ wó kisheʼrì.

³⁴«Áwune sí kóʼor a dzə̀ léŋ toŋ, wú kóʼ fo Heshbon, a kiléŋléŋ kí du, mee e Eleale, líysin e Jahas. Wír vee kèʼ fó Tsoar, e dù, e meé e Horonayim, e lì veé Eglat‑Shelishiyàa yú sa mo áwune tóŋé. Ndzə́v seé Nimrim si kfən yùmkír sa.

³⁵M yíi laàr wír veé Moav. Áwune seéri nyám si, yii cu sho e virə̀ʼ vé anyùy, ton kiláy, cu nyùy wov shó. Kù suuy mo woo NYÙY TÀR.

³⁶«Á bèy, a m diy Moav shilív shém shidzə̀m, tóŋ moo kintsəy. Kù dzə̀ sá mo m diy wír veé Kir‑Heres bèy, bìʼ fo vikuʼùy vév ví ŋeemen ne, e lày.

³⁷Wìr dzə̀m kwaày ne vitú vév, e tiìné vighev, e jàʼtì wó, e kùr ndzə̀y sé kpu.

³⁸Bó kinyo ke ru kí yòʼ kfə̀n dzə̀ é Moav e shaà tóŋ. Kù dzə̀ tóŋ e virə̀ʼ vé kirəsí veé vitu ve lav vidzə̀m, ǎ mentàrnín mee fó. Kí dzə̀ bey, bìʼ fo m bvəʼəyin ne Moav, kù moo kíŋ ye wìr yòʼ dzəə́ kér shií shó. Suuy mo woo NYÙY TÀR.

³⁹Á laàr ne Moav, yú mo wír vee fóo diyì. Woómé si koò ne áwune, á bín ndzə̀m. Moav dù ne e vifə̀m, a beemé, vitúm vee áwuné ghaŋ vi nén a jàʼ áwune jáʼan.»

⁴⁰NYÙY TÀR suuy jii: «Á leéy, e yèn, ŋgaà vibàn wíy sàsìn, e bvəy fo taa moo lùŋ wo wiy, e sàŋrì vav, a səy ji wun gwév Moav.

⁴¹Ŋgaà vibàn wíy nəə́ ŋkà se laʼ see fó e rə́r sí, e tòn, e sàʼtì virə́ʼ vév ve tavkín ví. Melív me vé rər veé Moav mè wíy a buʼ e kishiíy fóo fèy, moo shilív shé wiíy wo wù lúmé.

⁴²Á wíy laàr kitúm kee Moav fo kitu ke nsay, bìʼ kóʼór ye kí koʼorin kitú kfə́, e shaà NYÙY TÀR.

⁴³«Éè wìr veé Moav, kimbeemè ke kinyò ki lo, e koóy ven. Á tùŋ ne bií, e kfə̀n kòʼór kitám, a teʼ ven shó. Suuy mo woo NYÙY TÀR.

⁴⁴Wìr wíy fàn, lóo leʼ, é wù gbu é bii. Wìr sénen, fəə́ fo bii, é wù li é kitam. Wíy màʼ mo vinyo vìn e Moav kitu. Dzə̀ kiyá ke m wíy nəə́ áwune e ŋgeʼ. Suuy mo woo NYÙY TÀR.

⁴⁵«Wír ve á fəən nsàmé lèʼ ne, e dù ji á bee é Heshbon, la fó beè yòʼ a dzə. Və́yí sí dzəm, kóʼ fo Heshbon, wú kóʼ fo Fòn Sihon ntoʼ. Wú tàtí ne, e tòn Moav, e kèʼ fo bìíy, e dù, e màysì e mvə̀m wòŋ, e laàr aŋgàa melaà vìn láarin.

⁴⁶Éè Moav, lòné shòv ne ven. Aŋgàa vibàné laàr ne ven ve á cu Kemosh. Á koòrí ne wón vén vee vilum, e koòrí sa vee vikìy, e dù sho ji vé sháŋé.

⁴⁷Yii bèy, wíy lòo dzə e ghan sé bàm sí, é m kfən siìr vijuŋ ve wìr veé Moav aáwune. Suuy mo woo NYÙY TÀR.» Á vinyo ve NYÙY TÀR‑iì tinen kùm Moav.