Read Lamnso Jeremia 6 Bible Online

Jeremia 6 - Lamnso bible

Jeremia 6

¹«Ven vee wír veé Benjamin, wìr wáa leʼ, e kitú kfə́ kí. Vèn léʼ, e fəə̀ fó Jerusalem. Vèn tóŋ sóŋé fó Tekoa, e bùʼ shirəə́ fo Bet‑Hakkerem. Ŋgeʼ ye tavín lo, e wìy fo vitum veé mbìv yee kuy. Rə́mrə́m kinyòo lo, e gbù.

²Ŋgònjuù, wò woo Jerusalem, mo à fə̀m kiʼ e rəsìn, aá kfə̀n géŋsin e wò, m yíi bvəʼə́y wò.

³Afon wùn à vé rər véví wíy wìy, e taamé wò. Áwune wíy tam táv sév, e kaarí Jerusalem sho, é wíri wáa tam kiláʼáy kév fo á kòŋèn.

⁴Lo, aá wám jii, ‹Á báʼtí, aá kiʼ Jerusalem e rə́r sí. Á ŋáʼáy cér, e nə̀ə́ fó e ntìntìn shùy.› Á kfə́n lo, aá wáa ghay jii, ‹Kishiíy kí sí mayì, a meraaràŋ mè sí lò a gbùkìr. Lòn woo bene dzə̀ woó le?

⁵Á ku ŋàʼáy ŋaʼayín, e dù, e nə̀ə́ fó a dzə̀ vitsə́ʼə́, e bvə̀ʼə́y vikum ve ŋkà se laʼ sév.› »

⁶A dzə̀ jii, NYÙY TÀR woo Taà Mànjòŋ yòŋ ne jii: «Á ku bàʼtì vicí veé ghaa ŋkàlaʼ. Á yávtí tíy, e kòʼór kitaàtì e wǔn kày e Jerusalem. Dzə̀ ŋkàlaʼ, aá kù kér fó màʼ ŋgeʼ sho. Màyshó və kù sì táy ye á táy wíri.

⁷Jerusalem buʼtì vinyo là meemè, moo ndzə́v ye tuŋéné, ye yí fəər mendzə́v là meemè. M kù yú a dzə̀ ŋgeʼ ye wù fó, kfə̀n yú vifá ve wù bívirì. M leey fó, yén a dzə̀ yàsí wùn à kileémé kí.

⁸Éè Jerusalem, vèn wáa yen, là bey, bo m lo, e bìn ndzə̀m e vèn, e yiì, é láʼ yéné kfə́n ji vifə̀m, é la wìr yòʼ a dzə sho.»

⁹NYÙY TÀR woo Taà Mànjòŋ suuy jii: «Á yíi siyrí kibér ke wìr veé Isray síyrín, mo á sìyrí kitiír ké *vayin. Á yíi dù, e ghaà fó, moo wír wo wù kòyìn báŋ se vayin, e bóo kfə̀n a siyrí tíŋ si.»

¹⁰M nèn yòŋ jii, «M yíi suŋnín, e kàntì a dzə̀ la, é bo wù wáa yuurí? Leéy, e yèn, áwune sə̀tí ne vituʼùr vév, yòʼ dzə̀ á kfə̀n yuùrí. Kinyo ke Nyùy suuy ki sì fo áwune ji kilélé, aáwune yòʼ dzəə́ yén ji lùŋfófo dzə̀ á sho.

¹¹NYÙY TÀR, kilòŋ ke kí shwiiy wò kùm áwune, kí shwiiy sa mo, a bó yòʼ dzə̀ m yù fó kuʼtí.» NYÙY TÀR suúy jii, «Dìn dòʼshwiiy wò, e wón ve á dzəə̀n é ghaŋ se dzəə́. Dìn sá e virə̀ʼ ve wàʼbìn baʼtin shó. Vilum wùn à vikìy véví yòʼ wíy bòy. Aránsisi wùn à vindzə̀n ve wíri ví yòʼ wíy bòy sa.

¹²M yíi màʼ kiwó kém, ghár wir dzə̀m wo wù dzəə̀n é nsay foo fèn, é lav sév wùn à vikìy véví, à kwáʼ sév sí du e wír ve səné. Suuy mo woo NYÙY TÀR.

¹³«Wìr dzə̀m kù dzə̀ wir bvə̀mkúʼ, diy a dzə̀ seʼ ŋgwaákínyé. Feyì feyì, e kèʼ fo wo terí, e dù e wo kuʼùn, à wìr wo dzəə̀n ji ŋgaà ntum wom, à taà cù, wìr dzə̀m kù sí shwiv a dzə̀ kinshwìv.

¹⁴Áwune li kileémé ke kí kiʼ wír vém fó tèr. Áwune kù goʼ ji nyaáŋ waà dzə̀, a bó nyaáŋ yòʼ dzə̀.

¹⁵Áwune‑eè buʼtì viŋkoʼòy ve vinyò, woóme a? Àáy, áwune yòʼ‑oò ló a woomé, fə̀m à shishàr sho. Á yòʼ‑oò ló a ker dzə̀rkìtu gheéy. Bìʼ bey, áwune wíy a dzə e ŋgoo wìr ve á wíy laàr. M wíy màʼ ŋgeʼ aáwuné kitu, aá kpú kpuún. Suuy mo woo NYÙY TÀR.»

¹⁶NYÙY TÀR‑iì yòŋ e wír vəə́ jii: «Vèn tiím é mentàrnín, e lèéy. Vèn taʼ dzə́ə a dzə̀ yee tìítiy, a jùmrì, a ghan e mǒ mbòv, mo mò‑oò dìnèn e vèn fó mbìy, é vèn nèn a dzə dzə́ yee nyaáŋé.» Yii bèy, áwune‑eè bìnèr jii, «Vèr yòʼ yíi a jùmrì.»

¹⁷Wù nèn lèm anshìy, á wáa leéy áwune, e yòŋ jii, «Aá tòŋ sóŋ, vèn yuùrí.» Yii bèy, áwune bìnèr jii, «Vèr yòʼ yíi a yuurí.»

¹⁸Bìʼ bey, NYÙY TÀR nèn yòŋ e vitúm vi jii, «Vèn yuúrí, e yù. Vèn tiím vinjen vi, e wày síi, e yèn kinyo ke kí yíi koóy wír vém kí.

¹⁹Àshè nsay, yuúrí e yù. M sí wiy e ŋgeʼ ye tavín e wír vìné kitu. Dzə̀ seʼ antaŋ ve áwune‑eè bá. Áwune yòʼ yú kinyo kém, aá tèn ne yéʼéy ye m lèmèn aáwune.

²⁰Áwune wiy e kiláy kee *frankinsen ki fó Sheba ji m yée shó? Á kfə̀n wiy e meŋgvə́r me kinjoʼ mè fo ndzəywoŋ ji m yée shó? Bó m yòʼ yíi səəsí cu sév se tonèn sí. Bó m yòʼ kér shií é nyàm se áwune seéri ji cu si.

²¹Bìʼ bey, mo woo NYÙY TÀR, m nén a suúy jii, ‹Á yuúrí, e yù, m wíy yiì, é kinyo kém kí wáa dzə kifá ke wír vìne wáa bàyrìn sho. Atàr wùn à wóné wíy a gbùkìr sho adzə̀m, áàfə́r wùn à ŋkar si wáa kpukír sho.› »

²²NYÙY TÀR suuy jii: «Vèn leéy, e yèn, mànjòŋ wiy fo wòŋ kùyi. Kitúm ke wiy kí bàʼtí ne rə́r, a mèʼèm, a wìy fo ndzəywoŋ.

²³Áwune wiy, kér vinte wùn à nyùy sév sé rər sí, a dzə̀ vé bvə̀m ŋgeʼe, aá yòʼ rə́r mendzən fo wìr. Áwune kòʼ ne nyám se ŋkoʼ, a wìy, a yòr moo rìbà ndzə̀v. Éè Jerusalem, á bàʼtí ne rə́r é mbòŋén, a taamé wò.»

²⁴Eéy, vèr yù ne sáʼka və̀n, kóy wórí sheésí. Nyár ye bií nə̀ə́ ne ver, kù moo yeé ghan se wiíy lúmé.

²⁵Lá wìr dzəə dù e kwaʼ. Lá wìr fəə̀, fə̀m ǎ dzəə shó. Ŋgaà vibàn kér nyùy rə̀r, a virə́ʼ vidzə̀m vi sí beéme beèmén.

²⁶Àshè, wìr vem, vèn kúr vinsàʼ ve ndzə̀y ví. Vèn wáa dzəŋrí e kibvə̀r. Vèn wáa dìy, a səʼə́r mensíy, moó ghan se màyshó wàn tinen fo wìr koy. Ŋgaà vibàn wo wù laar ven sí lo, e sàsìn, e bvəy.

²⁷NYÙY TÀR yòŋ mo jii: «Jeremia, m lèm ne wò e wír vémé mvəm ji à mumri áwune mo taà kilàm mùmrì kisha. À mumè, áà kiíy mo yii yéví dzəə̀n.

²⁸Áwune dzə̀ antavkìtu, a liì wov tàv moo kisha kee *brons, e tàv moo kisha kee kiy. Áwune kù sí ghán, kunsìn a dzə̀ kiŋkùnsìn, kér liì kisaŋ wír adzə̀m.

²⁹Və́y kilàme ghèʼ feyì, wú ton nyàŋ, kisha ki ràn. Ké wìr vìn ki ghàʼ və́y, a bó yòʼ dzə̀ á ràn. Wír ve á kér yíi kisaŋe yòʼ wíy mày fo wírí mvəm.

³⁰Á wáa yòŋ áwune ji làykìsáŋ kishà ke mbàm. Mo woo NYÙY TÀR, m kù mèŋ ne áwune.»