Read Lamnso Yòvdìy 1 Bible Online

Yòvdìy 1 - Lamnso bible

Yòvdìy 1

¹Á ku yèn búʼú, Jerusalem sí tíy là wír, kirə́ʼ, a wìr‑iì dzə̀ fó nyanyày. Fóo sí sóm moo wiiy ŋkfə, kirə́ʼ, a vitúm vidzə̀m vi‑iì ghvə́mé. Ŋkàlaʼ, a yì‑iì dzə̀ féyì ji yaà, e ŋkà se laʼ sí mvəm, lèn wáa dzə, a yì sí reŋ a dzə̀ vikwàn.

²Wù bur tóŋ vitsə́ʼ vifur, bur bèy, a mensíy mè sə́y, su sí. Vé viŋkar və́ adzə̀me dzə̀ lèn, a bó wìr wo wù shám wun yòʼ kfə̀n dzə̀. Ŋkar sə́ sidzə̀m si fiìnè ne wun, e kfə̀n ji aŋgaà və́ vibàn.

³Wír veé Judàa yèn ne ŋgeʼ, à Jerusalem sho, e tùŋ akwiiròn, e jòkìnyàʼ, á jóʼsí, e koòrí áwune, e dù sho e vitum. Áwune sí sóm lèn e vitúm ví mvəm, sóm bèy, là kirə́ʼ ké a yòŋ ji nsay yev. Aŋgàa vibàn véví jùm ne áwune, e koò, a bó dzəə̀ ye á léʼ yòʼ kfə̀n dzə̀.

⁴Dzə́ə se sí nəə e Sion si sí tíy ji nyoòŋ, mo koò kpú. Fə̀m é vishiíy vé ŋkàʼ veé lav cù, wìr yòʼ shaa sho. Shuu sə́ sé kày si sí tíynin sirə́, a bó wìr yòʼ bav fo, aàtàá cùu leey, ndzə́kir ndzə̀kín. Wónlě vikìy ve á yii yov yòv e lav cùu kù sì a dzə̀ é nsòvkìtu, a Sion kù sí shwíkir shwìkín e dzə̀m.

⁵Aŋgàa vibàné kfə̀n ne ji vé saʼ veé Jerusalem, e kù a ghaʼ ghaʼán, a dù duùn fó mbìy, bìʼ fo NYÙY TÀR màʼàn ne ŋgeʼ e Jerusalem kitu. Wù màʼ bìʼ ajay vév vee nyanyày. Aŋgàa vibàné koòrí ne wón vév, e koòrí bèy, e dù sho ji akwàn.

⁶Viwìr ve Sion vi yòʼ dzə̀ə́, á sí yú a dzə̀ é kimfèr. Vé saʼ vəə́ wèʼ ne, moo njà wo wù buŋen yí. Áwune léʼ e wír ve á jum áwuneé mbìy, aá kù sí léʼ là kitar.

⁷Jerusalem dzə̀ lèn e mvə̀m ŋgeʼ, kù ghán, ján janén. Wù kuúme lèn vifá ve juŋ vi vidzə̀m kuúmén, vifá feyì ve yì‑iì dzəə̀n vév fó ŋgùʼ. Jerusalem‑eè gbù e wír ve á ghíʼ wuné wo, la wìr wóo sə wun yòʼ a dzə. Aŋgàa vibàné wáa leéy wun, a sheʼ, a jàʼ gbu ye wù‑uù gbuùn jáʼan.

⁸Jerusalem bùʼtì ne vinyo ve bi ví é ŋàŋ, e nèn kfə̀n ji kifá ke kí kér lóm. Wìr dzə̀m wo wù‑uu ghvə́m wun sí nyaysì wun nyáysin, a dzə̀ bìʼ kinshóʼ kfə́ ke á yenen ne. Á bèy, wù nén a woomé, woóme bèy, litì sí rə́.

⁹Lóm sə́ sí lòr ne e wùn ndzə̀y, bó wù yòʼ‑oò lo yiì a kwàʼtì kimaysì kfə́ kin. Á bèy, e nèn gbù e dzəə ye biibí, la ŋgaà sham yòʼ a dzə. Jerusalem sí tóŋ jii, «Éè NYÙY TÀR, ku yèn ŋgeʼ sém sí, ŋgaà vibàn wom màʼ ne mo.»

¹⁰Ŋgaà vibàn nə̀ə́ ne, e kùúy bùʼ fo lav cù e dzə̀m. E ké ru kí, Jerusalem yèn, a vitúm vi nəə e kirə̀ʼ kee jeéy kí, wír, a NYÙY TÀR‑iì shàʼnín ne, fo áwune wìy nə̀ə́ e wír vəə́ mvə̀m kintatì.

¹¹Wìr dzə̀m woó Jerusalem sí shwíkir shwìkín, ghán, taʼ kifá kée luʼ e shuù. Áwune sí li vifá veé shií, káv viyíkìr sho, viyíkìr vée yi, a dzə atin. Jerusalem sí tóŋ jii, «Éè NYÙY TÀR, ku yèn mo á sí nyaysì mo.»

¹²Wù kfə̀n tóŋ jii, «Ven vee anshaàdzəə̀, kinyo kìn ki yoʼ kùm ven gheéy a? Vèn ku lèéy, e yèn, ŋgeʼ si dzə̀ shó moo sém á? Ŋgeʼ se sí gbuùn e mǒ kitu. Ŋgeʼ se NYÙY TÀR shwiiyin kilòŋ, e màʼ e mǒ kitu.

¹³«Wù tsə̀nsí ne və́y fó yuv, e yiì, wú wáa ghèʼ e mǒ vighvər. Wù kòʼór ne kitám, m lí shó wuú e baà, kí gháʼ mo fo m waʼri. Wù bìn ne ndzə̀m e mò, m wáa dzə e mvə̀m nyar ghán sidzə̀m.

¹⁴«NYÙY TÀR bàʼtí ne nyanyày ajay vém, e kùr é kimbùŋ e wó rəə́. Wù neèr ne e mǒ mbèʼ, m wéʼ. Wù wáy mo áàŋgaà vém vibàné wo, a bó yòʼ dzə̀ m bòy fo áwuné wo.

¹⁵«NYÙY TÀR mèŋ ne vé rər vém adzə̀m, a kù dzə̀ áwune ve vé‑eè kiŋsìn mo. Wù bàʼtí ne vé rər, á taámé mo, e laàr wónlě nsùm vém. Wù nyèŋ ne mo woo ŋgònjuù yee Juda, kù mo á nyèŋ báŋ se á fəər meluʼ fo fo.

¹⁶«M sí diy bìʼ vinyo vìn, a mensíy mè dan fo mǒ si. Ŋgaà wóo a sham mo yòʼ dzə̀, a wìr wóo tavír mo yòʼ dzə̀. Ŋgaà vibàn wom ghàʼ ne mo, wón vémé rán kibvəə́shí kév.»

¹⁷Sion sí maʼ wó rə́, a bó ŋgaà wóo sham wun yòʼ dzə̀. NYÙY TÀR tìnén ne kùm rám Jakov jii, vitúm ve ví kaarin áwune ví binkir, ví ku bìnkìr, e ghìʼ á áwune ghíʼín. Jerusalem kù sì ji kifá ke *kifàn kí aáwuné mvəm.

¹⁸«Kinyo ke NYÙY TÀR yiìn e mò kí dzə̀ réŋ. M yòʼ‑oò lo yùnín nsər sə́. Wìr dzə̀m ku yuùrí, e yù, e lèéy ŋgeʼ sém sí. Aŋgàa vibàné koòrí ne wónlě nsùm vém, e koòrí wónlě ŋgòn vém, e dù sho e kwaʼ nsàm.

¹⁹«M bì ne vé viŋkar vém ji á sə́ mo, yii bèy, áwune máʼ mo. Ké atàá cù wùn à kfə́m sé wìr sém kí, áwune‑eè kpùkír é mvə̀m ŋkàlaʼ, aá ghán, taʼ kifá kée yi, kifá kée way e shùu, e fíʼ lùŋ.

²⁰«Éè NYÙY TÀR, ku yèn, ŋgeʼ si sùm ne mo. M sì a dzə̀ é mvə̀m nyar, a shilív shí sí sáv mo sávín, a dzə̀ bìʼ fo m tavin kitú wòsò e ŋàŋ. Á fəə́ e dzəə sí, á yèn wír ve á kpuun rə́r, lóo nəə́ e mvə̀mlaʼ, á yèn ve á kpuun jíŋ.

²¹«Wíri yù ne mo m shwíkir, kónsi, la ŋgaà wóo sham yòʼ a dzə. Aŋgàa vibàn vém adzə̀me yù ne ŋgeʼ sém, e nèn a màʼ a dzə̀ kinseŋ e kinyò ke à yiìn e mò. Ku yiì, é kishiíy ke wò‑oò tinen kàʼ ki wiy, aáwune nəə́ sá e ŋgeʼ moo mo.

²²«NYÙY TÀR, ku lèéy liì kisaŋ wo áwune kérí e dzə̀m, e màʼ ŋgeʼ aáwuné kitu. Ku màʼ, réŋréŋ mo wò‑oò màʼàn e mǒ kitu, bìʼ vém vee ajay adzə̀m. Ku màʼ bèy, bìʼ fo m sí shwíkir e ŋàŋ féyì, a shilív shém shí yaʼ yàʼàn.»