Read Lamnso Yòvdìy 5 Bible Online

Yòvdìy 5 - Lamnso bible

Yòvdìy 5

¹Éè NYÙY TÀR, kú a kuumé kinyo ke kí kooyin ver kí. Ku lèéy, e yèn nshoórsí wo wù nəən ne ver.

²Á lì ne nsay yer, e fò e vitúm vi, wír ve səné nəə́, e yòv láʼ sér.

³Vèr sì ji wón tsə̀, atàr vérí yòʼ dzə̀ə́, aàyìy vérí sì ji vikǐy ŋkfə.

⁴Vèr yún mendzə́v yunín, e bó a no, yún meŋkaʼ yúnín, e bó a tòn.

⁵Wír ve á nyoorì verí sí koóri nsən sér, a vèr sí kee keèn, là meemè.

⁶Vèr shwì ne kitú e Ejiv, e shwì é Assiriya, e bó a koóy kifá ké a yi.

⁷Atàr vérí‑iì jày e NYÙY TÀR, e wìy kpùkír, vilaʼày vé jay wov ví siíy, a ròn a dzə̀ ver.

⁸Sí sáʼ akwǎn aŋgàa vibàn ver, là wír wóo bòyìr ver fo áwuné wo.

⁹Vèr nyavrì e dzəʼə̀m yérí, bó a boŋ kifá ke yi, a dzə̀ bìʼ ashóŋ ve á siìn kwáʼ e dzə̀m.

¹⁰Jìŋ koò ne ver, kinjàʼ ki shúr, wúné wáa lùm, lum, ríʼsin, kù moo ji vèr tò é kiy.

¹¹Lóo dzə e Jerusalem, á ghàtí vikìy vér, e ntèʼ seé Juda, á ghàtí wón vér vee vikìy.

¹²Áwune sə̀ŋ ne vilìmbìy vér é yuv fó wo, ví kpúkír, a bó á yòʼ fə̀m ghvə́m vé saʼ vér.

¹³Á lì ne wónlě nsùm vér ji akwàn vév, e lì bèy, a kàn, á wáa jò kibán, a kàn, á wáa ghvəəné e sar mbeʼ se meŋkàʼ.

¹⁴Ŋgày sé wìr sér sí tàʼrí ne, á tàʼrí ne fo shùu kày ŋkàlaʼ, fo á yii kaári, kwaŋrì vinyo. Wónlě nsùme shwèy ne yòv.

¹⁵Dzəʼə̀m yérí sì ŋgeʼ ŋgeʼ, là vijuŋ, ceŋ ye vèr‑iì rə́si sherìi máy, vèr kfə́n é nsòv.

¹⁶Nsiì wo vèr‑iì bínsi lày ne, lòné shóv ver, bìʼ ajay vér.

¹⁷Tím yérí sí búʼ buʼún, a síi səə́ne, lo, diy dìyìn,

¹⁸bìʼ Gwan Sion wo siìn vifə̀m, a sì kirə́ʼ ke dzə́ akuúrá shó.

¹⁹Yii bèy, NYÙY TÀR, à dzə̀ ké Fon woo là may. Sáʼ yée kù wíy a dzə ghán sidzə̀m, mo ŋgwàʼ si kóʼó.

²⁰À làysìn ne rú ver ŋkuuŋkùŋ à? Bó à yòʼ dzəə́ wìy a kuumé ver a?

²¹Éè NYÙY TÀR, ku siìr ver e wò wùn, é vèr kfə́n, e yèn wò. Kii wò, NYÙY TÀR, ku yiì, é dzəʼə̀m yérí wáa dzə mo yí‑iì rə́si dzə́.

²²Mo dzə̀ ji à mèŋ ne ver ŋkuuŋkùŋ a? À kù sí wìy a shwiíy a dzə̀ kilòŋ vèsən, là yar à?