Read Lamnso Esiker 10 Bible Online

Esiker 10 - Lamnso bible

Esiker 10

¹M lòo màʼ sí, e lòo leéy kikum ke kí taá e kitu ke *vifa veé yuv ve ví kér vav si, e yèn a kifá ki yénsin e kitu wo moo kàvàʼ, kiʼ moo *síbaŋ yee safir bèy.

²NYÙY TÀR yòŋ e ŋgaà wo wù‑uù màʼàn ndzə̀y see ji lèvrì lèvrì jii, «Dù, e nə̀ə́ e nsàn kar see vifá veé yuv vin ví sar, e lì və́yí fó fo e wò kiwo, e tàʼár e kitu ke ŋkàlaʼ Jerusalem.» Wù nèn dù, a nəə́ fo, a m yéné.

³Wù wáa nəə́, a vifá veé yuv viy vi tíyí, e mbìv yee tsə́n fó lav cù, mbàʼ nèn lò, e sùm maàndzə yee fó mvəm.

⁴Rán NYÙY TÀRí ŋáʼáy fo vifá veé yuv viy ví wùn, e wìy, e tìím e kikùr ke shùu lav cù. Mbàʼ nèn sùm lav cù, rán NYÙY TÀRí wáa kàʼày maàndzə, a fo rán fó e dzə̀m.

⁵Á yú, a kiléŋléŋ ké vàv se vifa veé yuv kí du, baʼ e maàndzə yee fó ndzə, koó moo jí Nyùy woo Ŋgaà Vitaàví Vidzə̀m, e ghan se wù súŋninè bèy.

⁶NYÙY TÀR nèn sùúy e ŋgaà wo wù‑uù màʼàn ndzə̀y se levrìn sí və̀y jii, «Lì və́yí fo vifá veé yuv vin ví mvəm, fó nsàn kar si.» Wù nèn nə̀ə́ fo, e tìím e ghaa kar yímóʼó.

⁷Kifá keé yuv kímóʼ kí tsə́nsí kiwó fo vímóʼ ví nsàn, e ŋèʼ və́y fó fo, e wày e ŋgaà ndzə̀y se levrìn sí wo, wù sə́, e nèn lò, a dù.

⁸Vifá veé yuv vin vi‑iì kér wó moo yé wìr bèy, aáwuné sar se vàv.

⁹M lòo leéy, e yèn kár e kweè e vifá veé yuv vin ví ghaŋ, a kár mòʼón mòʼóne dzə̀ e kifá kee shó kí ghaŋ, njaʼkìr moo *síbaŋ yee krisoli bèy.

¹⁰Ké mbom kar si kí dzə̀ jii, sí‑iì dzə̀ sikweè, a sí shwíninè, a kári dzə̀ moo ji yí dzə̀ á e yímóʼó mvəm bey.

¹¹Vifá vìn vi‑iì lóo dù fo ví du, e mbìv si yev yìmòʼ fo see sikweè si, bo ví kù sí du duùn tìítiy, a bó kímóʼ kí yòʼ kfə̀n binè. Kitú ki kiʼ fo kí kìʼìn, bo vifá vìn vidzə̀m vi kù sí jumrì, e làa yòʼ bìn e mbìv yìmòʼ.

¹²Wún wóví‑iì kér sí virə́ʼ vidzə̀m, e kèʼ fo ndzə̀m, e dù e wo, e dù e vàv si, a kár sév see sikweè sìy si kér sa.

¹³Kee kùm yír kar si, m yú a vé‑eè yòŋ ji kár se sí kù kár moo kìrkir.

¹⁴Vifá veé yuv vin vi‑iì dzə̀, a kee kimòʼón kimòʼón ki kér mbìv sé si sikweè sikweè, a yee fó mbìyi dzə̀ yé nshìylav Nyùy yee naaŋkàntì nshìylav, yímóʼó yé wìr, yímóʼó yé bvərə̀ʼ, ye yí màysìn, yé lùŋ wo wiy.

¹⁵Vifá vìn vi nèn lò ŋàʼáy, e lòo koʼ e yuv, m yén, a kù dzə̀ víwun ve mò‑oò yenen é ghaa ndzəv yee Kebar.

¹⁶Vifá veé yuv vin vi‑iì lóo dù, kár si wàa dù sa fo ghaŋ. Ví nanrì vav si, lóo koʼ e yuv, kár si kù a dzə fo ghaŋ.

¹⁷Ví du, tiimè, kár si tìím sá. Ví ŋáʼay, lóo koʼ e yuv, kár si kù a dzə fo ghaŋ, bìʼ fo kiyoy ke vifa ve ŋeʼèn vin vi‑iì dzəə̀n é mvə̀m kar sìn.

¹⁸Rán NYÙY TÀRí nèn lò fo kikùr ke shùu lav cù fèy, e dù, e tìím e vifá veé yuv vin ví kitu.

¹⁹Ví nèn nànrì vav sév, e ŋàʼáy, e dù, e tìím e shùu kibùʼ woó mbìv yee fo shùy yii tó, e lò fo lav cù, a m yéné, a kár si kù‑uù dzə̀ fó ghaŋ, a rán Nyùy woó Israyi dzə̀ aáwuné kitu.

²⁰Kù dzə̀ víwun vee vifá ve ŋeʼèn ví féyì feyì ve mò‑oò yenen e NYÙY TÀR woó Isray sar, a m dzə̀ é ghaa ndzəv yee Kebar, e nèn kìíy lèn ji dzə̀ á vifá veé yuv ve ví béʼ kàvàʼ Nyùy.

²¹Kifá keé yuv kimòʼón kimòʼón ki‑iì kér mbìv sé si sikweè sikweè, kér vav e kweè kweè, a vifá vi dzə̀ é sar se vàv e njà wo wìr.

²²Fo ké mbìv sév sé si ki, kù‑uù dzə̀ naaŋkàntì si vifa ve mò‑oò yenen é ghaa ndzəv yee Kebar. Aáwune kù dzə́ bèy, du tìítiy fo mbìv si kiʼì.