Read Lamnso Esiker 11 Bible Online

Esiker 11 - Lamnso bible

Esiker 11

¹Mo m yenen vinyo vìy bèy, Kiyoy ke Nyùy ki shúr mo é yuv, e dù sho e shùu kibùʼ keé mbìv yee fo shùy yii tó, e lò fo lav cù. Ké ru kí, m yén wír e shùu kibùʼ fèy nshòv sitàn e mbaà. E mvə̀m wìr fèn, m yén Jaasania woo wan Asur, e yèn Pelatia woo wan Benaya, wír vee abaà vin ve kù dzəə̀n vilìmbìy ve wìr veé Isray.

²NYÙY TÀR yòŋ e mò jii, «Wàn wìr msòŋ, wír vìne dzə̀ ve á kér taámé se bi sí, kfə̀n tír wíri e ntir se bi sí é ŋkàlaʼ fèn.

³Áwune yoŋ e wíri jii, ‹Bó yòʼ dzə̀ ghán se dzə̀ á kfə̀n a bom lav si a?[3] Ŋkàlaʼ rə̀n dzə̀ moo kíŋ yee kisha, a vèr dzə̀ fó akiŋsìn moo nyám ye á wayin é kìŋ, e tèʼtín.›

⁴Bo dzə̀ jii, wàn wìr msòŋ, beèmè áwune, e nyàysì. Ku beèmè.»

⁵Kiyoy ke NYÙY TÀR kí nəə́ e mǒ wùn, NYÙY TÀR yòŋ e mò ji m suúy aáwune á jii, «Ke NYÙY TÀR suuy ki dzə̀ jii, ‹Wìr veé Isray, m kì kinyo ke vèn suuyì, e kìíy antaŋ ve vèn bá.

⁶Vèn yùyrí ne wíri é ŋkàlaʼ fèn aneénín, e màʼrì dzə́n sí, sí rún mentàrnín medzə̀m.›

⁷Bìʼ bey, ke mo woo NYÙY TÀR woo Taà Ndzə suuy ki dzə̀ jii, dzə̀ rú, ŋkàlaʼ rə̀n dzə̀ á kíŋ kishàa, yii bèy, nyàm dzə̀ ka? Kù dzə̀ dzə́n sé wìr ve vèn yuyrin. Kén kí dzə̀ jii, ‹M yíi fəə́r ven fó ŋkàlaʼ fèn, e tsənsí e ndzə.

⁸Vèn fan kpú yeé shùu rər, a m yíi tsənsí rə́r, é sí nəə́ ven.

⁹M yíi fəə́r ven fó ŋkàlaʼ, e way e vitúm ví wo, aá lóvtí e vèn.

¹⁰Á wíy yuyrí ven é shùu rər, a dzə̀ e věn wòŋ, é vèn nèn kìíy ji m dzə̀ á NYÙY TÀR.

¹¹Bó ŋkàlaʼ rə̀n yòʼ wíy kìŋsìn ven mo kíŋé kìŋsìn nyám ye yì dzəə̀n shó. M wíy fəə́r ven, e dù sho e bìíy se wòŋ Isray, é vèsən tám fó, é vèn yú.

¹²Vèn wíy kiíy ji m dzə̀ á NYÙY TÀR, wo dzə̀ m làʼ ven e ŋgeʼ bìʼ fo vèn kù‑uù ŋwày sáʼ yém e làa yòʼ jùmrì vinyo ve m tinen, e kù ghàr liì a dzə̀ wo vitum ve ví gìŋèn ven, e tàr.› »

¹³Kù mo mò‑oò tiísi ntum rə̀n, Pelatia woo wan Benaya ku nèn gbù, e kpù. M nèn gbù, e tsə̀m sí e nsay, e tòŋ kitávín jii, «Abaày NYÙY TÀR woo Taà Ndzə, kì sì ji à maysi kibér ke wìr veé Isray, e laàr à?»

¹⁴NYÙY TÀR nèn lò, e sùŋnín e mò, e yòŋ jii,

¹⁵«Wàn wìr msòŋ, wír ve á dzə́ e Jerusaleme súŋnin kùm ven ve á dzəə̀n é kwaʼ nsàm, yoŋ jii, ‹Vèn dzə̀ kén kwaʼda fo NYÙY TǍR ghaŋ. NYÙY TÀR fò ne nsay rə̀n a dzə̀ aáwune lèn ji vitsə́ʼ. Á kù say ven ben adzə̀m, say afə́r vé, say wír vee věn kfəə, e lì wír woo rám Isray e dzə̀m.›

¹⁶Bo dzə̀ ji à yoŋ e wír vìne jii, ke NYÙY TÀR woo Taà Ndzə suuy ki dzə̀ jii, ‹Yì‑iì tsə̀nsí mo wír vìn e vitúm ví mvəm, e tàʼár fo. M kù yíi a dzə vèr áwune, e kirə̀ʼ kidzə̀m fo áwune dzə́, aá fíʼ a sùyrì mo.›

¹⁷Á bèy, áà suúy e veé kwaʼ nsàmé jii, ke NYÙY TÀR woo Taà Ndzə suuy ki dzə̀ jii, ‹M wíy banén ven fo vitúm ví mvəm, fo á taʼrin, e dùkìr, e kfə̀n siìr nsay yen yeé Isray e vèn.›

¹⁸A kí dzə̀ á jii, ‹Áwune wíy kfən fo, e fəə́r mebvə̀m me mè dzəə̀n fó, à vifá ve koʼoyín ví vidzə̀m.

¹⁹M wíy fo shilív she sən shí aáwune, e way kiyoy ke fíy ki aáwuné wùn. M wíy fəə́r shilív shév she shí lùrìn ne, e tàv moo tíy, e fo shilív she boorín shí aáwune.

²⁰Á bèy, aáwune nèn wìy a yu sáʼ yém, a rə̀tì, e bó a yiì kinyo ke m tinen. Á wíy a dzə wír vém, é m wáa dzə Nyùy wov.›

²¹Yii bèy, fo ké wìr ve á báŋri ji á wáa ghvəm vifá ve koʼoyín ví, à mebvə̀m mè, m wíy làʼ áwune e ŋgeʼ, é vinyo vév ví kfə́n aáwuné kitu. Yoŋ mo woo NYÙY TÀR woo Taà Ndzə.»

²²Vifá veé yuv viy vi nèn sàŋrì vav sév, e ŋàʼáy, a dù, a kár si kù dzə̀ fó ghaŋ, a rán Nyùy woó Israyi kù dzə̀ aáwuné kitu.

²³Rán NYÙY TÀRí nèn lò fo ŋkàlaʼ, e dù, e tìím e kitu ke gwan wo wù dzəə̀n é mbìv ŋkàlaʼ yee fo shùy yii tó.

²⁴M ku nèn yèn é njà vinjeenjèm mo Kiyoy ke NYÙY TÀR kí shurin mo, e kfə̀n shó e bàm é Kaldea fo vé nsàmé wùn. Kinjeenjèm kee shooy ki ku nèn shaà bèy, e mày fo mǒ si.

²⁵M naàrì kinyo kidzə̀m ke NYÙY TÀR‑iì ghemen ndzə, e dìn e mò e wír ve vé‑eè dzəə̀n é kwaʼ nsàmé.