Read Lamnso Esiker 13 Bible Online

Esiker 13 - Lamnso bible

Esiker 13

¹NYÙY TÀR sii kfə̀n sùŋnín e mò, e yòŋ jii,

²«Wàn wìr msòŋ, kàntì aŋgàa ntum kimboʼtì veé Israyi, wír vìn ve á tiísi vinyo, a dzə̀ ve kwàʼtìn áwune. Yòŋ aáwune jii, ‹Vèn yú kinyo ke NYÙY TÀR suuy ki.›

³Ke NYÙY TÀR woo Taà Ndzə suuy ki dzə̀ jii, ‹Lòné dzə̀ wó viyuŋ vé aŋgàa ntum kimboʼtì, wír, aá yú a dzə̀ fo áwuné kwàʼtì, e bó a tiisí ntum, a bó áwune yòʼ yén kifá.›

⁴«Isray, aŋgàa ntum véné dzə̀ moo vishòv ve ví ghán e laʼ ye yí duùn é vifə̀m bèy.

⁵Bó áwune yoʼ kòʼ é kày ji á bóm á virə́ʼ ve ví kèrkìn, e siìr fo, é yí fiʼ kìŋ wír veé Isray fo rə́r sí e kishiíy ké NYÙY TÀR.

⁶Áwune yén vinyo ji din a Nyùy, yii bèy, a kù dzə̀ vé kisaŋ vi, maʼ fú kimboʼtìi. Á fiʼtì ji NYÙY TÀR suuy ji, NYÙY TÀR suuy ji, a bó m yoʼ tùm áwune. Á fiʼtì bèy, kwaʼ ji kinyo ki waà kooy rú.

⁷Áwune yén vinyo e njà vinjeenjèm a kù dzə̀ vé kisaŋ vi, tiísi fú a dzə̀ wó kimboʼtìi. Áwune táv ji dzə̀ mo NYÙY TÀR yoŋè, a bó m yoʼ yòŋ kinyo. Yii bèy, á kù kfə̀n a leéy ji m wàá yii, é kinyo ke suuyin áwune kí gheén.

⁸«Á bèy, ke mo woo NYÙY TÀR woo Taà Ndzə suuy aáwune kí dzə̀ jii, jí sén sí dzə̀ sé kisaŋ si, a vèn tiìsí ne kinyo kisáŋ ji ghèm á mo ndzə, vèn yén. Rúrú, vèn maʼti, bèr vèsən. Suuy mo woo NYÙY TÀR woo Taà Ndzə.

⁹«M yíi màʼ kiwó kém, e ghar aŋgàa ntum sho, ve á tiísi kinyo kisáŋ ji ghèm á mo ndzə, tiísí fú kimboʼtìi. Bó áwune yòʼ wíy nəə́ e wír vémé kitar. Bó á yòʼ wíy saŋ yír sév e wír veé Israyí ŋwàʼ kintaŋ, a bó vee shooyi yòʼ wíy nəə́ e nsay Isray, é vèn nèn kìíy ji m dzə̀ á NYÙY TÀR woo Taà Ndzə.

¹⁰Lòné kù dzə̀ wóv, áwune ve á lévti wír vém, yoŋ ji nyaáŋ dzə̀, a bó nyaáŋ yòʼ dzə̀. Wíri lóo yuŋsí, lóo yavtí vilán là kishaʼàr ji kay, áwune màysì, a teè fém e wùn wó.

¹¹Yòŋ e vee shooy ve á tee fém e kàyi ji yí waà yíi keèsì. Kiŋkò ke wuu kí yíi keèsì fo yuv, é m tsə́nsí mentíy me biibí mè, é mè gbu, é kinsəm ki shaa, e kèr kifá kidzə̀m e nsay.

¹²Kayi gbu, é wíri wáa jàʼ áwune jii, fém ye vé‑eè teèn shóo lìm ka lèn?»

¹³Á bèy, ke NYÙY TÀR woo Taà Ndzə suuy ki dzə̀ jii, «Dòʼshwíiy wom yíi koʼ, é m tsə́nsí kinsəm, é kí meé, é kiŋkò ke wuu kí keesi fó yuv, é lúm se mentiy si sə́y, e kèr kifá kidzə̀m e nsay.

¹⁴M yii bèy, é m ker kay yén kimboʼtì ye vèn teèn e féme rən, e meé e kinsə̀ŋ, é yí wáa neŋ e ŋgèŋgèr. Yí gbu, é vèn teem é mvəm wó, e mày, á bèy, é vèn nèn kìíy ji m dzə̀ á NYÙY TÀR.

¹⁵«Á mo m wíy kòr nyár yém é kày, e kòr e wír ve vé‑eè teèn fém shóo kitu bèy. M wíy yòŋ e vèn ji kay ye vèn‑eè bomené bèé, a wír ve vé‑eè yoʼon fém shoo siì bèé sá?

¹⁶Aŋgàa ntum vìne yòʼ kfə̀n dzə̀, áwune ve vé‑eè súŋnin e Isray kùm Jerusalem, yoŋ ji Nyùy ghèm á ne ndzə, nyaáŋ wáa dzə, a bó wù yòʼ dzə̀. Kù suuy mo woo NYÙY TÀR woo Taà Ndzə kinyo kìn.»

¹⁷NYÙY TÀR sii yòŋ mo jii, «Wàn wìr msòŋ, leéy vikìy veé Israyi, e kàv vishí, e nyàysì áwune ve á tiísi ntum ji ye Nyùy, a kwáʼtí áwune. Ku beèmè áwune.

¹⁸Yòŋ aáwune jii, ke NYÙY TÀR woo Taà Ndzə suuy ki dzə̀ á jii, ‹Lòné shòʼ ne ven vee vikìy ve á tár shív si, wáy e wìr dzə̀m shuù se koy, kìn á baʼrì e tan se á sum kitú sho, e fíʼ a jwim wíri, a way e vitam. Vèn yíi a jwim dzəʼə̀m wìr vém, a bavtí yén yee dzəʼə̀m à?

¹⁹Vèn shòór ne yír yém e wír vémé si ji á diy a kù dzə̀ kiwó ke saŋ yee *barli, kìn kimbéʼ ke kiban. Vèn bóʼti wír vém, aá kù koŋ kòŋèn, a kimboʼtì kén kí yúyri wír ve yòʼ kì dzə̀ á kpù, bávti wír ve kì dzə̀ á kpù.›

²⁰«Bìʼ bey, ke mo woo NYÙY TÀR woo Taà Ndzə suuy e vèn kí dzə̀ jii, ‹Rúrú, m mèŋ shív sén se vèn tár, jwím wíri shó moo menə́n sin. M yíi tiiné fo věn koy si, e bòyìr wír, e màʼtì, aá dukir. Wír vìn, ve vèn jwím moo menə́n.

²¹M kfə̀n wíy shoʼóy sa vifá ve vèn fèrìn ji á sum kitú sho, e sə wír vém fo věn wo, é la áwune yòʼ dzə́ə a tuŋ akwiiròn e věn wo. Á bèy, é vèn nèn kìíy ji m dzə̀ á NYÙY TÀR.›

²²«Mo vèn tínsin melív me wìr vee jwáʼ e kimboʼtì ki, a dzə̀ wír ve bó m yòʼ koŋ e way nyár aáwuné meliv, bvə́vir sí wìr kisaŋe, lóʼti melív mev fo áwune maʼti yii kisaŋe, e bòy fo akwiiròn,

²³bó vèn yòʼ kfə̀n dzəə́ wìy yen kinyo ji sə́m vifòn, a bó vèn yòʼ kfə̀n wíy a màʼ fú. M wíy fəə́r wír vém fo věn wo, á bèy, é vèn nèn kìíy ji m dzə̀ á NYÙY TÀR.»