Read Lamnso Esiker 18 Bible Online

Esiker 18 - Lamnso bible

Esiker 18

¹NYÙY TÀR kfən sùŋnín e mò, e yòŋ jii,

²«Wíri kwaʼ ji ka, e bó a rəsí, a màʼ ŋgàn kùm woŋ Isray jii: « ‹Atàrí‑iì kfə́r kicí ke kí kwáyri, sóŋé ló, a ŋèʼ wón.›

³«Mo m dzəə̀n NYÙY TÀR woo Taà Ndzə, a m dzə̀ shó e tin, bó wìr yòʼ dzəə́ wìy màʼ ŋgàn rə̀n e Isray gheéy. Suuy mo woo NYÙY TÀR.

⁴Kér mo dzəʼə̀m wìr dzə̀m, à yé kitàrí, à yé wané, yí kù dzə̀ e mǒ mbvə̀ʼ kiwo. A jày wír kinyo, bo kù du kitú ke ŋgaàŋ.

⁵«Á ku lì ji wìr wùmòʼ dzə̀ á wír woo réŋ, yii vinyo vee tìítiy, kér yii yee réŋ,

⁶e làa yòʼ a yi vifá ve á cu anyùy sho aàgwan, a bó wù yòʼ ghvə́m mebvə̀m me wìr veé Isray. Wù kú a dzə sa, a wù yòʼ yii li wiíy wìr, é kfə́n a dzə, a wù yòʼ yii shiiy e wiíy, a wù yén ghán sə́.

⁷Kfə́n a dzə sa wír, a bó wù yòʼ nəʼsì wír. Lo, wù kù a siìr kifá ke wìr tiirin e wun, e làa yòʼ a faàsì kimfaàsì, a wù yiir wír ve jìŋ yárí, kfə̀n kúr ndzə̀y e wír ve á ghán kinshóʼó wùn.

⁸Wír, a wù yòʼ lo ji wun foor mbàm, wù sə̀ séʼ ŋkuŋ, kìn ji wù wáyrí. Wù yòʼ wáy wó rə́ é vinyò ve bi ví, a wù tínen vinyo ve wíri é nsànloŋ.

⁹Dzə̀ wír wo wù yú sáʼ yém, yii kinyo ke m tinen. Wìr woo bey dzə̀ rú wir jwáʼ, a wù yíi a dzə sho e tin. Suuy mo woo NYÙY TÀR woo Taà Ndzə.

¹⁰«Á li jii, wù dzəə́ wán, é wù du é shòŋ, e kfə̀n a dzə ŋgaà kinjuyrìwìr, a yiì kfə́ə vinyò vee bey,[9]

¹¹e làa yòʼ lì kiwuú ké tàr wov. Wù lo kfə́, a yi vifá ve á cu anyùy sho aàgwan, e kfə̀n lò, a lì wiiy wìr.

¹²Wù lo, a nə̀ʼsì aŋgàa kitàn, a tay vé ŋgeʼe, a faàsì kimfaàsì. Wìr tiir kifá e wun, wù tàv shó, du, ghvə́m mebvə̀m, yii vinyo ve joònè ví.

¹³Wù lo ji wun foor mbàm, wù sə̀ séʼ ŋkuŋ, kìn wù wáyri wàyrín. A dzə̀ wír woo bey, wù bòy á? Bó yòʼ dzə̀ wù bòy. Wù buʼtì vinyo vìn vidzə̀m, a wù kù kér fóo kpu, é njò rə wáa dzə e wun kitu.

¹⁴«Yii bèy, á li ji wìr və̀n lo, a ker wán, a wù yén jooně tàr wov vən, yén bèy, e làa yòʼ a jùmrì a wun.

¹⁵Wù yòʼ yí vifá ve á cu anyùy sho aàgwan. Wù yòʼ ghvə́m mebvə̀m me wìr veé Isray. Wù dzə̀ sá, a bó wù yòʼ li wiiy wìr,

¹⁶a bó wù yòʼ nəʼsì wír, a bó wù yòʼ táv ji wìr tiír kifá, bó a sə mbàm, a bó wù yòʼ faasì kimfaàsì. Wù lo, wù wàa yiír wír ve jìŋ yárí, a kur ndzə̀y e wír ve á ghán kinshóʼó wùn.

¹⁷Wìr və̀n yòʼ maʼ kiwó kfə́ aàŋgàa kitàné kitu, a bó wù yòʼ foor mbàm, sə́ séʼ. Wù kù dzə̀ kfə́, a wù yú sáʼ yém, yii kinyo a dzə̀ mo m tinen. Wìr woo ben yòʼ dzə̀ wù kpù bìʼ jooně tàr wov. Wù kù yíi a dzə sho e tin.

¹⁸Fo ké tàr wov kí, mo wù koó vifá ji vitaáví, faasì vifá ve wíri, yii vinyo ve bi ví aàfə́r vəə́, bo wù kù kér fóo kpu bìʼ vinyo ve wù bùʼtìn.

¹⁹«Yii bèy, vèn táv kén jii, ‹Kí wàn kù yíi yen ŋgeʼ bìʼ vinyo ve tàr bùʼtìn?› Àáy, a wàn lòo dzə, a yiì vinyo vee tìítiy, a ker yii yee réŋ, e wày ŋàŋ, a yu sáʼ yém e dzə̀m, bo wù yíi a dzə sho e tin feyì feyì.

²⁰Wìr wo wù buʼtì vinyo dzə̀ wo wù yíi kpu. Bó wàn yòʼ wíy a yen ŋgeʼ kitàr, a kitàr kí yòʼ wíy a yen ye wàn. Á wíy a laamé wír wo wù yii réŋ bìʼ vinyo vee réŋ ve wù yii, a màʼ ŋgeʼ e mbùʼtìvìnyò kitu bìʼ vinyo ve wù buʼtì.

²¹«Yii bèy, a mbùʼtìvìnyò lò, e bìn ndzə̀m é vinyò ve wù bùʼtìn vidzə̀m, a yu sáʼ yém, a yiì vinyo vee tìítiy, a ker yii yee réŋ, bo wù kù yíi a dzə sho e tin, e làa yòʼ kpu.

²²Vinyo ve bi ve wù bùʼtìn ví dzə̀, aá yòʼ kfə̀n dzəə́ yiì a kuumé, a kiv njò rə. Vinyo vee réŋ ve wù sí yii vi yiì ne, wù lúŋ.

²³Bó m yòʼ diy ji mbùʼtìvìnyò kpú á kpuún. Ke m diy ki dzə̀ ji wù bin á ndzə̀m é vinyò ve wù buʼtì, e lùŋ. Suuy mo woo NYÙY TÀR woo Taà Ndzə.

²⁴«Yii bèy, a wìr wo wù yii réŋ lò, e kfə̀n bìn ndzə̀m e wun yiì yee réŋé, a yiì a dzə̀ liì kisaŋ, kfə́ə wo ambùʼtìvìnyòo yii kérí, wù wàa dzə sho e tin a? Bó yòʼ dzə̀ á kfə̀n a kuumé kinyo fo vinyò vee réŋ ve wù‑uù yii. Mo liì və kù siìn wo bi, wù lì ne njò, a wù kér fóo kpu bìʼ vinyo ve bi ví ve wù buʼtì.

²⁵«Yii bèy, a vèn yoŋ kén jii, ‹Bó NYÙY TÀR yòʼ yii réŋ.› Abaày wìr veé Isray, vèn yuúrí, dzə̀ ji bó m yòʼ yii réŋ a? Bó yòʼ yii ven vinyo kintéŋ à?

²⁶A wìr woo réŋ bìn ndzə̀m é vinyò ve réŋ ve wù‑uù yii, e lò, a bùʼtì vinyo, bo wù kù yíi kpu. Wù kér fóo kpu bìʼ vinyo ve bi ví ve wù buʼtì.

²⁷Kí kfən siì a dzə jii, a mbùʼtìvìnyò bìn ne ndzə̀m é vinyò ve wù‑uù buʼtì, a yiì vee tìítiy, a ker yii yee réŋ, bo wù sə̀ ne kitú kfə́ fo kpúu.

²⁸Mo wù rə̀mèn ne yii rə́ ye bií ntéŋ, e bìn ndzə̀m é vinyò ve wù‑uù bùʼtìn vidzə̀m, bo wù kù yíi a dzə sho e tin. Bó yòʼ dzə̀ wù kpù.

²⁹Yii bèy, ven vee rám Isray, vèn táv kén jii, ‹Bó NYÙY TÀR yòʼ yii réŋ.› Abaày wìr veé Isray, dzə̀ ji bó m yòʼ yii réŋ a? Bó yòʼ yii ven vinyo kintéŋ à?

³⁰«Á bèy, wír veé Isray, m kù yíi lò, e màʼ nsaʼ e věn kitu amòʼón amòʼón bìʼ vinyo ve vèn buʼtì. Suuy mo woo NYÙY TÀR woo Taà Ndzə. Vèn biner melív men, e màʼtì vinyo ve vèn buʼtì, é la ví yòʼ wìy laàr ven.

³¹Vèn maʼay vinyo ve bi ví ve vèn bùʼtìn vidzə̀m, e tìnsín mo shó. Vèn wáa ker shilív she fíy shi, a ker kiyoy ke sən kí. Vèn koŋ kpú ji ká wìr veé Isray?

³²Bó m yòʼ koŋ ji wìr wàá kpú féyì e wún wómé. Suuy mo woo NYÙY TÀR woo Taà Ndzə. Vèn biner ri melív men, a dzə sho atin.»