Read Lamnso Esiker 19 Bible Online

Esiker 19 - Lamnso bible

Esiker 19

¹NYÙY TÀR wáa suŋnín e mò woo Esiker, a suúy jii, «Yòv lúŋ mendzə̀ne, lóo yòv, à wàa taŋ vilìmbìy veé Isray.

²Á yòv, a taŋ jii: « ‹Yè won‑eè[10] dzə̀ mànyàm bvərə̀ʼ féyì e lúm se bvərə̀ʼ sí mvəm. Wù‑uù néŋ aàbvərə̀ʼə́ mvəm, liy wón və́.

³Wù‑uù lìy wùmòʼ woo wán,[11] wù kúy, e bàʼ e lum bvərə̀ʼ. Wù yéʼéy mo wù wáa jwim kifá, wù wáa jwim wíri, a koo, a yàsì.

⁴Vitúm vi yú leŋ və́, e tùŋ bií, e koò wun sho. Á wóv e ŋgòvìr, e dù sho e wòŋ Ejiv.

⁵Yè wov shìy, e shìy ntéŋ, vifií ví bvəə́rí wun, e nèn lì wan və wùmòʼ,[12] e lìy, wù kúy, e bàʼ e lum bvərə̀ʼ.

⁶Wù kúy, e ghàr, e nèn a son aàbvərə̀ʼ ámóʼó mvəm. Wù yéʼéy jwím, e nèn lò, a koo sa wíri, a yàsì.

⁷Wù koó, e nèn lì vikìy vév ji və́, e bvə̀ʼə́y ŋkà se laʼ sév, e siìr e vifə̀m. Wù maʼ tóŋ, wóŋe beèmé, wúné beèmé wir dzə̀m, wìr dzə̀m wàa yàʼ.

⁸Vitúm vi nèn lò, e wìy, e ghìʼ wun, e wày vitám mbìv sidzə̀m. Á sàŋrì lálán e wun kitu, wù lí aáwuné kitam.

⁹Á wóv wun e ŋgòvìr, e wày é ràʼ, e lì, e dù, e yèn fon woó Babilon sho. Á dù bèy, e wày é ŋòròʼ, e wày ji tóŋ rəə́ ŋeémé, e lày bèn fo agwan veé Isray.

¹⁰« ‹E ké ru kí, yè won‑eè dzə̀ moo kitiír ké *vayin,[13] kitiír ke á bìyìn é ghaa ndzəv, kí téʼ é mbòŋ, e fə̀ə́r tám si, e kòóm, a kù‑uù yiì mendzə́v meé ŋàŋ.

¹¹Tám sə́ sí‑iì tàv é ŋàŋ, a dzə vitoómé vé afòn. Wúmóʼó kúy é ŋàŋ, a meʼ mbàʼ, wú dár é ŋàŋ bey, a ker vibábár, wìr dzə̀m yén.

¹²Fo bàm, á mén kitiír kin e dòʼshwiíy, e mèn, à gháŋé shó, e sàn é nsay. Shwér sané wìy, e yùmér, báŋ sə́ sí kuùy. Tám və́ wo tavíné yúm, və́yí nèn wìy, e laàr tám və̀n.

¹³Lèn və̀n, á bìy ne kitiír kin a dzə̀ é kirə̀ʼ ké woʼ kí, kirə́ʼ, a dzə̀ nsay ŋgaŋ, là shindzə́v.

¹⁴Və́y wo wú‑uù loòn fó tam wo tavíné, wú lòo shwi, e tòn kibér ke tam si, e tòn báŋ si, la tám wo tavíné yòʼ bèr shó, tám wo dzə̀ wàa dzə kitoómé ké fòn. Yòv və̀n dzə̀ yòv mendzə̀n, a kù sí wìy a dzə yòv dìy bèy.› »