Read Lamnso Esiker 20 Bible Online

Esiker 20 - Lamnso bible

Esiker 20

¹Yì‑iì dzə̀ é kiya ke kí‑iì meen ji saàmbà mo vèr‑iì dzəə̀n é kwaʼ nsàm, a kishiíy kí‑iì dzə̀ kee ghvə̀m fo ŋwee wo wú‑uù meen ji tàn, vilìmbìy ve wìr veé Isray vímóʼ ví wìy, e dzə̀ʼə̀m e mǒ si ji á mbaa á NYÙY TÀR e kinyo ki.

²NYÙY TÀR nèn lò, e sùŋnín e mò, e sùúy jii,

³«Wàn wìr msòŋ, yòŋ e vilìmbìy veé Isray vìn vi jii, ke NYÙY TÀR woo Taà Ndzə suuy ki dzə̀ á jii, ‹Vèn wìy bèn ji á mbaa mo e kinyo ki a? Ké ru kí, mo m dzəə̀n shó e tin, bó m yòʼ yíi ghay.› Suuy a mo woo NYÙY TÀR woo Taà Ndzə.

⁴«Wàn wìr msòŋ, mo wò‑óò sov kinyo kév á? Wò‑óò wáa sòv a? Kuúmé ri jooně atàr véví aáwune,

⁵e sùúy aáwune jii, mo woo NYÙY TÀR‑iì yòŋ á jii, ‹Mò‑oò shòʼ Isray e wòŋ Ejiv, e yiì, á kiíy mo. Mò‑oò nàn wó yém é yuv, e lìʼ e wón Jakovi jii, m dzə̀ á NYÙY TÀR woo Nyùy wov.

⁶Yì‑iì dzə̀ é kishiíy fóo fèy, m lìʼ, e yòŋ jii, m yíi fəə́r a áwune fó wòŋ woó Ejiv fèy, e lèm e wòŋ wo mò‑oò tayin ji wóv. Dzə̀ woŋ, a vín nàʼ wùn à vilu vi tsəətìn fo tsə́ətin, a wú bòŋ e ŋàŋ, e shaà woŋ símóʼ sí sidzə̀m.

⁷M yòŋ aáwune jii, wìr mòʼón mòʼón bin á ndzə̀m e vifá ve joònè ve wù kiʼìyì, e làa yòʼ a lor vitú vév e mebvə̀m me wìr veé Ejiv mè, e lì *kifàn. Dzə̀ á mo NYÙY TÀR woo Nyùy wov.

⁸Yii bèy, áwune kú a tav kitú vèr áwune, e làa yòʼ a yu ntir sém. Áwune yòʼ‑oò lo bìn ndzə̀m e vifá ve joònè ve áwune‑eè kiʼìyì. Áwune yòʼ‑oò lo màʼtì mebvə̀m me wìr veé Ejiv. Mò‑oò yèn bey, e nèn a taamé ji m yíi màʼ a ŋgeʼ aáwuné kitu e wòŋ woó Ejiv fèy, mo dòʼshwíiy wom dzəə̀n, e kù màʼ, e meé mo wù yíi kpurín.

⁹Yii bèy, la m yòʼ dzəə yiì, bìʼ fo mò‑oò kiŋsìn yír yém, fo vitúm ve ví kaarin wír veé Isray vi wáa jàʼ. Vé‑eè lo yèn mo mò‑oò liìn wír veé Isray ji wír vém, e fə̀ə́r áwune fó wòŋ woo Ejiv.

¹⁰« ‹Á bèy, mò‑oò lì áwune fó Ejiv, e dù sho e woʼ,

¹¹e fò áwune nsər sém wùn à ntò se vinyò si, a dzə̀ vinyo vìn ve wìr lóo yunín, lóo yiì, wù wàa ker dzəʼə̀m.

¹²M kfə̀n‑eè yiì, á wáa lèm vishiíy vém vé bam, ví wáa dzə kisəəm ké vèr áwune, aá fíʼ a kiíy ji yì‑iì yiì á mo woo NYÙY TÀR ji áwune wáa dzə jeéy ji wír vém.

¹³Yii bèy, wír veé Israyi ku shaà fo mbìy, a tav kitú vèr áwune é woʼ. Áwune yòʼ‑oò ló a yu sáʼ yém, e kù shaà fo mbìy, a ŋway nsər sém se sí fó dzəʼə̀m. Áwune‑eè màysì, e bìvír vishiíy vém vé bam ŋkuuŋkùŋ. Bìʼ bey, m rə̀m ji mo‑óò maʼ ŋgeʼ aáwuné kitu e woʼ fey mo dòʼshwíiy wom dzəə̀n, e laàr a fó ŋkuuŋkùŋ.

¹⁴Yii bèy, la m yòʼ yiì, bìʼ fo mò‑oò kiŋsìn yír yém, fo vitum vi wáa jàʼ. Vitúm vìn, ve vé‑eè yenen mo mò‑oò fəərin wír veé Isray fo wòŋ woo Ejiv.

¹⁵Á bèy, m ku nèn tìn kàʼ aáwune, e lìʼ jii, m yòʼ dzəə́ yìi lì áwune, e dù sho e wòŋ wo mò‑oò kàʼàn áwune shó. Woŋ, a vín nàʼ wùn à vilu vi tsəətìn sho tsə́ətin, a wú bóŋ é ŋàŋ, e shaà símóʼ sí.

¹⁶Vé‑eè shòʼór nsər sém, e ŋwày sáʼ yém, e bìvír vishiíy vém vé bam, e kù shaà fo mbìy, a ghvəm mebvə̀m mev.

¹⁷« ‹Mo m fə̀m kì tinen kàʼ wov bey, m kfən siì lèéy áwune, e rə̀r mendzən, e làa yòʼ dzə́ə teè áwune é woʼ.

¹⁸Yii bèy, m kàʼtì kiwó e wón véví é woʼ fey jii, lá vèn yòʼ bìʼnìn njiìn atàr vén, a ghan aáwuné mbòv, a ghvəm mebvə̀m mev, e lòr vitú vén.

¹⁹Dzə̀ mo NYÙY TÀR woo Nyùy won. Vèn wáa yu sáʼ yémé, a lèm nsər sém, a yiì mo sí dzəə̀n.

²⁰Vèn lem vishiíy vém vé bam vi ji vishiíy vee jeéy ví, é wáa dzə kisəəm kesən, é vèn fiʼ kìíy ji mo woo NYÙY TÀR, m dzə̀ Nyùy won.

²¹« ‹Mo m fə̀m‑eè yòŋèn bey, ŋgwàʼ yev kú a tav sa kitú vèr áwune. Bó áwune yòʼ‑oò ló a yu sáʼ yém, a lèm nsər sém, a yiì mo sí dzəə̀n, a sí fó dzəʼə̀m e wìr wo wù lemè. Áwune‑eè bìvír vishiíy vém vé bam. Mò‑oò dzə̀ kibáʼtín ji m sí lo, e teè áwune é woʼ adzə̀m.

²²M nèn kfə̀n rə̀m ntéŋ, e làa yòʼ màʼ kiwó aáwuné kitu ji m kiŋsin yír yém, fo vitúm ve ví‑iì yenen mo m fəər wír veé Isray fo Ejiv vi wáa jàʼ.

²³Á bèy, m ku nèn tìn kàʼ aáwune é woʼ fey, e lìʼ ji m yíi taʼár áwune, aá du e vitúm ví mvəm, e saŋrí kitú ke nsay kidzə̀m.

²⁴Mò‑oò suuy bèy, bìʼ fo áwune‑eè ŋwayin sáʼ yém, e shòʼór nsər sém, e bìvír vishiíy vém vé bam, e kù siì a ghvəm mebvə̀m me atàr véví‑iì ghvə́mé.

²⁵« ‹Jòkìnyàʼ, m nèn fò nsər aáwune, a bó sí yoʼ bòŋ, e fò ntò se vinyò, a bó yòʼ dzə̀ se sí luŋèr wír.

²⁶M yiì, áwune lór vitú vév e cu se vé‑eè yii si, lì wón vév mbìyi, e yiì cu ye tonèné shó. Mò‑oò yiì bey, ji m sen áwune sénen, aá fiʼ kìíy ji m dzə̀ á NYÙY TÀR.›

²⁷«Á bèy, wàn wìr msòŋ, súŋnín e wír veé Israyi, e sùúy ji mo woo NYÙY TÀR woo Taà Ndzə suuy a jii, ‹Atàr véví kù‑uù shaà sháan fó mbìy, a ŋway mo, a leéy mo ntéŋ.

²⁸Mò‑oò lì áwune, e dù sho e wòŋ wo mò‑oò kàʼàn áwune shó. Á meé fó, yén gwan wo da, kìn kicí ke rəŋsìn kí, á nèn dù, a cù anyùy fo. Vé‑eè yii cu vifa ve yi, yii yé melùʼ, ton kiláy, tínsin mo shó.›

²⁹M yòŋ vèr áwune jii, ‹Virə́ʼ ve da ve vèn rə́si shoó fo vìy vi dzə̀ vé gha áày? E kèʼ fo ghan fóo fèy, e wìy shem lán, á ku nèn a yòŋ virə́ʼ vé cù vìy ji Bama, a dzə̀ jii, kirə́ʼ ke da ki.›

³⁰«Kí nén a dzə jii, súŋnín e wír veé Israyi, e sùúy aáwune jii, ke NYÙY TÀR woo Taà Ndzə suuy ki dzə̀ á jii, ‹Vèn taʼ e shaà fo mbìy, a lor vitú vén e liì joònè wo atàr véné‑eè kérí, a ŋway mo moo wiíy wo wù ghán viŋkar, a ghvəm mebvə̀m mev a?

³¹E wìy to lán, vèn lóo cù mebvə̀m, lóo lì wón vén, lóo tòn ji cu, bo vèn lór a dzə̀ vitú vén. Nyaa mǒ wìr veé Isray, vèn lór bèy, li *kifàn, á kfə̀n a wìy ji á mbaa mo e kinyo ki a? E ké ru kí, mo woo NYÙY TÀR woo Taà Ndzə, mo m dzəə̀n shó e tin, bó m yòʼ yíi màʼtì, é vèn dzə́r kinyo e mò.›

³²«Vèn táŋ jii, vèn‑éè wáa dzə moo vitúm vímóʼ ví, a ghvəm vicí, a ghvəm vilán, a bó yòʼ dzə̀ kí wìy kòóy.

³³E ké ru kí, mo m dzəə̀n NYÙY TÀR woo Taà Ndzə, a m dzə̀ shó e tin, m suuy e vèn jii, ‹M kù wíy a dzə Fon won, a neèr tásháʼ, a saʼ ven e vitaáví vém ví vidzə̀m.

³⁴M wíy nàn kóy wóm wo tavíné, e baʼtí ven fó vitum ve vèn‑eè taʼrin, e dù sho, aá yén vitaáví vém, e yu mo dòʼshwíiy wom koó.

³⁵M wíy lì ven, e dù sho e woʼ ye vitúm vi kaarin, e tàr, é vèsən tiím é kibàʼ, é m din kisáŋ kén fó.

³⁶Mo vèr aàtàr véné‑eè tiimen é kibàʼ e woʼ yeé Ejiv, dzə̀ sá réŋréŋ mo vèsən yíi tiím. Suuy mo woo NYÙY TÀR woo Taà Ndzə.

³⁷M kù wíy yiì, é vèn wáa tiy e mǒ *mensàŋ. M wíy tàr ven amòʼón amòʼón mo nshìy lo, wù ŋèv nyám sə́.

³⁸M wíy fətí wír ve á tsə́y kóy vèr áwune, à ve á buʼtì vinyóo fo věn mvəm. M wíy fəə́r áwune fó vitum ve á dzəə̀n shó lèn, yii bèy, a bó áwune yòʼ wíy kfən e bàm é nsay Isray. M yii bèy, é vèn nèn kìíy jii, m dzə̀ á NYÙY TÀR.›

³⁹«Éè wìr veé Isray, ke mo woo NYÙY TÀR woo Taà Ndzə suuy ki dzə̀ jii, ‹Vèn du ri, e shaà fo mbìy, a cù mebvə̀m men mèy. Yii bèy, e bǎm kee shooy, vèn kù kér fó yiì a ghvəm mo, mo wo m dzəə̀n e ránén, e làa yòʼ dzə́ə a shoór yír yém e cu ye vèn cu mebvə̀m sho rə̀ne.

⁴⁰A dzə̀ jii, ghán sí wíy gheén, é wìr dzə̀m woó Isray wiy, a cù mo a dzə̀ e mǒ gwan wo ranén, gwan wo wù taá vitú e nsay Isray. Dzə̀ fo m wíy a yu vijuŋ vén, a shìy ji vèn wáa wìy aàfómo véné, a wìy e vifá ve ntay vi, a wìy e vifá ve cù vi, a dzə̀ vee jeéy ví ji vém.

⁴¹M wíy fəə́r ven fó vitum fo vèn‑eè taʼrin, e dù, e baʼtí kirə́ʼ kimòʼón, e nèn səəsí ven moo cu ye á ton, yí wàa rə̀m, a rə̀ʼtìn, vitúm vi lóo yen, é ví fíʼ a kiíy ji m dzə̀ á e ránén ji Nyùy.

⁴²Á bèy, é vèn wìy kìíy ji m dzə̀ á NYÙY TÀR, a m lí ne ven, e dù sho e wòŋ woo Isray, woŋ, wo mò‑oò kàʼàn atàr vén shó.

⁴³Vèn lóo dzə fo, é vèn wáa kuumé njiìn won e dzə̀m, a kuumé vinyo ve vèn‑eè bùʼtìn, e lòr vitú vén shó, a woomé. Vèn wíy a shèŋ vitú vén, a rə̀m vinyo ve bi ví ve vèn‑eè yiìn vidzə̀m.

⁴⁴Wír veé Isray, m wíy lòo geʼ e vèn bìʼ yír yém, e làa yòʼ lovtí e vèn mo njiìn won wo bi dzəə̀n, kìn yii yén kisaŋe, é vèn nèn kìíy ji m dzə̀ á NYÙY TÀR.› Suuy mo woo NYÙY TÀR woo Taà Ndzə.»

⁴⁵NYÙY TÀR lò, e yòŋ mo, e sùúy jii,

⁴⁶«Wàn wìr msòŋ, kìʼ woŋ tsəné, a suŋnín, a nyàysì. Ku tiìsí ntum yem, e tìn kàʼ kòv woó wòŋ tsən.

⁴⁷Yòŋ e kóv woó wòŋ tsəné ji wú yú á kinyo ke NYÙY TÀR suuyì. Ke mo woo NYÙY TÀR woo Taà Ndzə suuy ki dzə̀ á jii, m yíi sə̀ʼ a və́y é kòv fey, é wú tee kicí kidzə̀m, à ke kí teʼè, à ke kí yumen ne ki. Bó wìr yòʼ dzə̀ á sho wo wù wíy ndzəmér kiliímé ke və̀y kin. Wú wíy a bav, é wìr dzə̀m wáa yu lum, e kèʼ fo mbìv yee tsə́n, e dù, e meé e mbìv yee kuy.

⁴⁸Wìr dzə̀m wíy yen ji sə̀ʼ a mo woo NYÙY TÀR və́y vən, a bó kifá kée ndzəmér ki yòʼ dzə̀.»

⁴⁹NYÙY TÀR yòŋ bèy, m nèn ghày jii, «Abaày, NYÙY TÀR woo Taà Ndzə, wìr dzə̀m kù sí káykir kàykín ji m kù sí súŋnin a dzə̀ á e ŋgan ŋgàn.»