Read Lamnso Esiker 22 Bible Online

Esiker 22 - Lamnso bible

Esiker 22

¹NYÙY TÀR nèn lò, e yòŋ mo, e sùúy jii,

²«Wàn wìr msòŋ, wò‑óò sov kinyo ke ŋkàlaʼ rə̀n a? Wò‑óò wáa sòv ŋkàlaʼ kinjuyrì rə̀n a? Á roòmè áwune, e naàrì joonè wo áwune yii e dzə̀m.

³Yòŋ ji ke NYÙY TÀR woo Taà Ndzə suuy ki dzə̀ á jii, ‹Vèn yùyrí ne wír vén anín, e kfə̀n lòr kitú kén é kinyò ke mebvə̀m. Bìʼ bey, ghán se m lo, e màʼ ŋgeʼ e věn kitu si sì fó mentsə̀m.

⁴Vèn gbù ne njò mensə me wìr ve vèn yuyrin, e lòr vitú vén e mebvə̀m me vèn ghvə́m mè. Vèn yiì ne, ghán sén sé ŋgeʼ si gheén. Kishiíy ke m lo, e lovtí e vèn kí sì é kiwo. Á kifá ke kí yiìn, é bo m maʼti, é vitúm vi wáa jàʼ ven. Woŋ dzə̀me kù wíy a sheʼ ven.

⁵Yìiy ŋkàlaʼ wìr kisaŋe, woŋ dzə̀me yùʼnín ne ven. Vitúm vidzə̀m, à vee kwaʼda, à vee fó mentsə̀m ví yíi a jàʼ ven.

⁶« ‹Vilìmbìy vén veé Isray vi dzə̀, a wìr lo, wù lì vitaáví ve wù kérí, a laàr wír sho láarin.

⁷Bó wìr wo wù ghvə́m tàr wov wùn yè wov yòʼ dzə̀ shó e věn mvəm. Vèn lo, á wàa boʼ viŋgwìy wùn à wón tsə̀ə́, à vikǐy ŋkfəə.

⁸Vèn nyavrì e vifá vém vee jeéy ví, a bó vèn yòʼ kfə̀n lem kishiíy kém ké bam.

⁹Vilum ámóʼó dzə̀ e věn mvəm ve á kár menàŋ áàfə́rí bàm ji á fiʼ yùy. Ámóʼó wáy wún, a yi nyám ye á cuùn anyùy kisaŋe shó e virə̀ʼ vé agwan, aámóʼó kù buʼtì vinyo e věn mvəm mo jav yev wùn taʼà.

¹⁰Vilum ámóʼó li vikǐy atàr vév, aámóʼó kan vikìy vév, li e ghan se á yén ghán sév.

¹¹Wùmòʼ lo, wù wàa yiì joonè, a lì wiiy wìr, a wùmòʼ li kfə́ a dzə̀ wiiy wan və là woómé, a wùmòʼ li jemèr rə ye dzəə̀n wan tàr wov.

¹²Wír vén ámóʼó lo, á biìmé, e sə̀ mbàm, e fíʼ yuyrí wír. Aámóʼó fo věn mvəmé foor mbàm aàfə́rí, sə́ seʼ ŋgwaákínyé ji á kuʼkir. Vèn buʼtì vinyo vìn bèn a bó á yòʼ fan mo. Suuy mo woo NYÙY TÀR woo Taà Ndzə.›

¹³«M yíi a kiiví wó yém é dòʼshwiíy kùm seʼ ŋgwaákínyé wo vèn sə́, à mensə́ me wíri me vèn lorin e věn wo mè.

¹⁴A kù yòʼ dzə̀ vèn wìy a ker mentàsìn mée tàkà sho e ghan se vèsən wíy tam a? Suuy mo woo NYÙY TÀR, a m kér fóo wìy yiì.

¹⁵M wíy taʼár ven woŋ dzə̀m, é vèn wáa dzə e vitúm ví mvəm, e fíʼ laàr njiìn won wo bi.

¹⁶Vèn du, maʼ vitú vén fó, vitúm vi lóo shoór ven, é vèn nèn kìíy ji m dzə̀ á NYÙY TÀR.»

¹⁷NYÙY TÀR yòŋ mo, e sùúy jii,

¹⁸«Wàn wìr msòŋ, wír veé Israyi sì moo kisá bey fo mò. Áwune sì moo jáŋ kilàm ye yí fəə́ fo kishà ke mbàm ke fəvír kí ke á tònèn, a kisha kee *brons wùn à kee *tin ki shwír é jaŋ fèy, e lì kisha kee kiy, à kee *led ki.

¹⁹Kí nén a dzə ji ke suuy mo woo NYÙY TÀR woo Taà Ndzə ki dzə̀ á jii, ‹Mo ven adzə̀m siìn moo jáŋ kilàm bèy, bo m yíi baʼtí ven, e dù sho e Jerusalem.

²⁰Mo wíri yii síy kfəə́ se vishà see *kisha ke mbàm ke fəvír kí, kisha kee brons, kisha kee kiy, kisha kee *led, kisha kee *tin, du, ton e kilàm ji ví yaáné, bo dzə̀ sá mo m wíy banén ven é dòʼshwiíy, e dù sho e Jerusalem, é vèn shwí, e yaàné.

²¹M wíy banén ven é Jerusalem, e fam və́y wóm e věn wùn é dòʼshwiíy, é vèn reŋ fó.

²²Mo á yii ton kisha ke mbàm ke fəvír kí é kilàm, kí yaàné, bo dzə̀ sá réŋréŋ mo vèn ghán yaané fo, e nen kiíy ji dzə̀ á mo NYÙY TÀR wo m nyeèn dòʼshwíiy wom e věn kitu.› »

²³NYÙY TÀR kfən yòŋ mo, e sùúy jii,

²⁴«Wàn wìr msòŋ, yòŋ wír veé Israyi, e naàrì, e sùúy ji áwune dzə̀ á woŋ là mánrí, a wuú yòʼ yíi shem e nsay e kishiíy ke m maʼ dòʼshwíiy wom aáwuné kitu.

²⁵Vilìmbìy vén ví suùsín ne wó, a laàr wíri, a kuúy vifá ve ker veé kilùm. Áwune dzə̀ moo bvərə̀ʼ wo wù koon nyám, a nyàm e kitu wo, a sàʼ. Bìʼ yúyrí ye á yuyrin wíri é ŋàŋ, vikǐy ŋkfəə nen kùʼ e wòŋ.

²⁶Atàá cù véví shòʼór ne nsər sém, e kfə̀n nyàvrì e vifá vém vee jeéy ví. Áwune yoʼ dìn jeéy jeéy fo kifá ke dzəə̀n ji ké Nyùy wùn à kee kiy ki, a bó áwune yoʼ yèʼéy ji á kiíy jeéy jeéy fó kifa ke *kifàn, à kee là kifàn kí. Jòkìnyàʼ, á nyávrí e kishiíy kém ké bam ki, la wír véví yòʼ dzə́ə a ghvəm mo.

²⁷Vilìmbìy vév ví dzə̀ moo koosàʼ wo wù koon nyám, a sàʼ, mensə́ mè wáa cùrkìr. Áwune nen kfə̀n a laàr wíri, e shií ji á wáa kuúy séʼ.

²⁸Wír vév vee ji aŋgàa ntum Nyùyi kiŋ áwune mo ŋgaà lìm tòr fém e wǔn lav. Á fiʼtì kinyo kisáŋ ji ghèm á Nyùy ndzə, áwune yén. Á shwéŋ kinyo, bóʼti ji sùúy a mo woo NYÙY TÀR woo Taà Ndzə. Nyaa mò, bó m yoʼ sùúy kinyo.

²⁹Wón nsayi yèʼéy ne mó a faàsì kimfaàsì, e yèʼéy bèy, a faàsì fo aŋgàa kintàn wùn aàghéʼnceyí, fə̀m à fo viŋgwìy vi, là nyaʼ.

³⁰M nə̀ə́ ne e wír vémé mvəm ji sà dzə̀ m yèn wír wo dzə̀ wù tìím fo káy wìr vémé gbuùn, e siìr suuyrú fó, é la m yòʼ dzəə laàr áwune á. M leéy bey, e làa yòʼ yen wír.

³¹Á bèy, m kù wíy màʼ dòʼshwíiy wom aáwuné kitu, é wù laar áwune moo və́y. M yíi siìr lǒn vinyò ve áwune bùʼtìn vidzə̀m aáwuné kitu. Suuy mo woo NYÙY TÀR woo Taà Ndzə.»