Read Lamnso Esiker 23 Bible Online

Esiker 23 - Lamnso bible

Esiker 23

²«Wàn wìr msòŋ, wónlě vikìy ámóʼó‑oò dzə̀ abaà, a dzə̀ afə́r, kiyìy kimòʼón.

³Á nèn lò, a yiì visàkì e wòŋ woo Ejiv, fo vé‑eè dzə́, aá dzə̀ə́ wónlè, e nèn màʼtì vilum wáa tay vín yév, a yí rúnkír ne.

⁴Woo ŋgàywìr‑iì dzə̀ Ohola,[17] bám rəə́ wáa dzə Oholiba.[18] M nèn lò, e wày áwune é lav, vèr áwune dzəə́ wón. M yoŋ Ohola bèn a dzə̀ Samaria, a Oholiba dzə̀ Jerusalem.

⁵«Ohola wáa dzə wiíy wom bey, kfə̀n lo, fəə́, ghán visàkì. Wù wáa baŋrí ŋkar sə́, a dzə̀ vé rər veé Assiriya.

⁶Vé‑eè dzə̀, aá máʼ ndzə̀y, a sí baŋ, səə́ne moo yòm, ámóʼó wáa dzə vé saʼa, ámóʼó amfòómé. Adzə̀me kù‑uù dzə̀ wónlě nsùm, aá tó sí, kóʼ nyám se ŋkoʼ.

⁷Wù‑uù fò kitú kfə́ ji sàkì e visən ve wìr veé Assiriya vìn vi, e làa yòʼ a nyàʼ wír. Wù du e woo shó bàm, wù nèn a ghvəm mebvə̀m me ŋgaàŋ, a lor kitú kfə́, a koʼóy mo.

⁸Bó wù yòʼ‑oò lo màʼtì visàkì ve wù‑uù kèʼèn é Ejiv fo wù‑uù kiiyin vilum, á wáa tay wun e wo, a wù dzə̀ə́ wánlè, a shiíy wùn áwune.

⁹«M nèn lò, e wày wun e ŋkar sə́ sé visàkì sí wo, áwune vee wír veé Assiriya ve wù‑uù diy bèn e mbòŋ.

¹⁰Á nèn sòr ndzə̀y fó wùn wó, wù gòʼ kilor. Á kuúy wón və́ vee vilum wùn à vee vikìyí, e nèn seè wun e nyùy rə̀r. Mo lòné nəən wun bèy, vikìy nèn lì yír rə́ é shuù, virə́ʼ vidzə̀m, ji shaàshèʼ.

¹¹«Fə̀m mo jèmèr rə yee Oholiba‑aà yenen vinyo ve Ohola bèn, və́ vee visàkì vi ku siì tìŋ tìŋèn. Wù kú a baŋrí vilum báŋrín, a tuŋ visàkì, a shaà fə́r və sháan.

¹²Wù kù‑uù báŋri wír veé Assiriya báŋrín, vé saʼ wùn aàmfòómé véví, aá báʼrí ndzə̀y sé rər é wùn. Wìr dzə̀m kù‑uù dzə̀ vilum feyì, aá tó sí, kóʼ nyám se ŋkoʼ.

¹³M nèn yèn ji joonè və́ woo shooyi fòy a fòyìn, wù kù lì kiwuú a dzə̀ á ké jèmèr rə.

¹⁴«Yii bèy, visàkì və́ ví táʼám, a kuy kuyín, wù nèn a kiy vindzə̀ə́ndzəm ve vilum, aá toóŋé é baané, a dzə̀ wír veé Kaldea, aá náŋsín, e yòʼ e fém ye baarí.

¹⁵Vilum vìne‑eè kér vikuúví é mentìntìn, kfə̀n kér tán se ndzəmén sí é vitu, a sí kér virəv. Kù‑uù dzə̀ vindzə̀ə́ndzəm ve vitu ve rər vé wìr veé Babilon, a dzə̀ wír veé nsay Kaldea.

¹⁶Wù‑uù yèn vindzə̀ə́ndzəm ve wìr vìn, a ker shíi wov é ŋàŋ, e nèn tsə̀nsí vé ntume fo áwuné wùn é Kaldea.

¹⁷Wír veé Babilone nèn wìy, wùn áwune kóʼ é kikun, wù lór kitú kfə́ é visàkì ve wùn áwune‑eè yii. Kee shooy ki wìy lò, e kòsìn, wù shwèy, e fəə̀ fo áwuné kinyò, a wù lór ne kitú kfə́ ben.

¹⁸«Mo wù‑uù sanen visàkì, e fəə̀ shó e ŋgèŋgèr, kí tínsín mo, dòʼshwíiy wom kóʼ, m shwèy wun mo mò‑oò shwèyìn jemèr rə.

¹⁹Yii bèy, visàkì və́ ví ló fó fo, e tìŋ tìŋèn. Wù nèn bùy sho búyin, kù kuúme a dzə̀ viyá və́ vé viŋgòn ve wù‑uù yii visàkì e wòŋ woo Ejiv.

²⁰Wù‑uù cì kwán, a kpu kpuún e vilum bàm. Vilum, aá kér wún vilum moo wó kimbèʼbìy, lo, á lì wiíy mo lì nyamŋkoʼ.

²¹Á bèy, wù ku nèn a kuumé, a yiì joonè wo wù‑uù kér e Ejiv e ghan sé viŋgòn se vé‑eè caàcàn wun, e tày vín rə́ é wo, a yí rúnkír runkín.

²²«Kí nén a dzə jii, Oholiba, ke suuy mo woo NYÙY TÀR woo Taà Ndzə ki dzə̀ jii, ‹Ké ŋkar sé se visàkì se wò‑oò dorin aáwuné wo, e shwèy, m yíi banrí, aá wáa bàn wò, e wìy, e ghiʼ wò mbìv sidzə̀m.

²³M yíi banén wír veé nsay Babilon wùn à Kaldea adzə̀m, à veé Pekod wùn à veé Shoàa, à veé Koàa adzə̀m, e lì wír veé Assiriya adzə̀m. Wír vìn adzə̀me kù dzə̀ vilum feyì, aá tó sí, aámóʼó dzə̀ vé saʼa, ámóʼó amfòómé, aàdzə̀me dzə̀ visən ve wíri, aá kóʼ nyám se ŋkoʼ.

²⁴Áwune wíy baʼtí fo wòŋ woo kuy[19], e ghiʼ wò, aá kér *viténtén vé rər, kfə̀n kér shúu rər, a wú táv é ŋàŋ. Mànjòŋ rə̀r və̀n wíy a ker ŋkeè rə̀r, a ker vikóŋ ve tan, e wìy kaarí wò, e tar. Á bèy, é m nèn wày wò aáwuné wo, aá lóvtí e wò mo liì wov dzəə̀n.

²⁵M wíy dìn wò mo dòʼshwíiy wom dzəə̀n, e màʼtì wír vìn, aá nyavri e wò là mendzən. Áwune wíy shoʼ yúy yé, e shoʼtí vituʼùr vé, wìr bér fo wò mvəm, aá yúyrí e nyùy rə̀r. Á wíy koo wón vé vee vilum, e koo vee vikìy, é və́yí laar kibér.

²⁶Wír vee shooyi wíy sòr ndzə̀y sé, e kuúy vifá vé ve sùsù vidzə̀m.

²⁷Á bèy, á mo m wíy sə̀r liì wò joòně visàkì ve wò‑oò loòn shó fo Ejiv bèy. Bó à yòʼ kfə̀n wíy leéy vinyo vee shooy, a baŋrí. À yòʼ kfə̀n wíy a kuumé Ejiv.›

²⁸«Ke mo woo NYÙY TÀR woo Taà Ndzə suuy ki dzə̀ jii, m sí lo, e way wò e wír ve à banèé wo. Wír, a dzə̀ ve à bànèn, e tèʼ kikáŋ.

²⁹Áwune wíy nyàvrì e wò e si ŋkfəə́mé, e faàsì vifá ve à ndzə̀ʼnìn, e kàv, áà goʼ e wóo, kù kinshóʼ mo wò‑oò yii visàkì dzə́, áà saŋri lèn e kwaʼ, é wìr dzə̀m yén mo wò‑oò yii joonè, ghán visàkì.

³⁰Kù sə̀ŋ wò lòn vən, e wìy sho e wò kitu, bìʼ fo wò‑oò duùn visàkì fo vitúm ví wùn, e kfə̀n lòr kitú ké e kinyo kév ké mebvə̀m ki.

³¹Wò‑oò jùmrì kiwuú ké jèmèr yè, a m kù yíi way bàr ŋgeʼ və e wò kiwo.

³²«Á bèy, ke mo woo NYÙY TÀR woo Taà Ndzə suuy ki dzə̀ jii: « ‹À wíy no fo jèmèr yè bàr, bàr, a wù fáŋ, e kfə̀n shoò. Wìr dzə̀m wíy a bèm wò, a jàʼ, bàr və̀n dzə̀ féyì, a wù kér mvə́m.

³³À wíy no, a fəə̀nè, a dzə mendzən mendzən. Kù dzə̀ bàr jèmèr yè Samaria, wo wù duùn é vifə̀m, wíri leey, é wúné kuúsí áwune.

³⁴À wíy no fo bàr fèn, e jiiyí kidzə́ŋ, e bvəʼtí bàr, e lì vimbvə́ʼ, e nyàv vín yé sho. Suuy mo woo NYÙY TÀR woo Taà Ndzə.›

³⁵«Mo wò‑oò ŋwayin mo, e bìn ndzə̀m e mò, ke mo woo NYÙY TÀR woo Taà Ndzə suuy ki dzə̀ jii, ‹À kù yíi baarí lǒn liì joònè wo wò‑oò yii, ghán visàkì.› »

³⁶NYÙY TÀR nèn lò, e dzə̀r e mò jii, «Wàn wìr msòŋ, wò‑óò tar kinyo ke Ohola wùn Oholiba a? Á bèy, sánrí ri joonè wóví aáwune.

³⁷Áwune‑eè du viŋkar, kfə̀n li njò mensə. A dzə̀ jii, vé‑eè ŋwáy mo, du, ghán e mebvə̀m mè bàm. Jòkìnyàʼ, áwune lí wón ve vèr áwune‑eè kérí, e dù, e tòn, e cù mebvə̀m mèy sho.

³⁸Kí foy, bó yòʼ jòʼ kee shooy. Á bìvír lav yem cù, e rə̀ʼtí, e bìvír kishiíy kém ké bam e si kishiíy.

³⁹Kishiíy ke vé‑eè liìn wón vév, e cù mebvə̀m sho, kù dzə̀ kíwun ke vé‑eè wìyìn e mǒ lav cù, e nèn bìvír fó. Yìiy, á mo áwune‑eè lovtin e mǒ lav.

⁴⁰«Vikìy vin, vèn ló fó fo, a wìr tsə́nsi ŋgaà ntum e wòŋ woo kwaʼda ji wù bí vilum. Vilum wiyì, wìr sù wún, e sòr, e shèʼ sí, e wày vifá ve viŋgòn.

⁴¹Vèn‑eè yéʼ aàntaʼ ve wiyí, a kidàŋ ki tíy e wìr si, aá náŋsín, e tìír vifá sho, wù kfən neèr kiláy, e kfə̀n tìír meŋgvə́r me mè yii rəm, rəʼtìnè, vifá vìn, a yì‑iì dzə̀ ji vém.

⁴²Màŋgòŋ‑eè ko koòn e věn ghaŋ, wír vìn, a dzə̀ anyaʼlaka ve siìn ji amfoòkìnó. Vé‑eè wìy, e wàyrí visáʼ ve áwune‑eè wìyìn shó fo wòŋ woʼ e věn koy si, e kfə̀n sòv ntáráʼ e věn vitu.

⁴³«M leéy bey, a ghay jii, ‹Áwune sà kfə̀n kì yíi a koo viŋkar wùn à vikìy víne, a visàkì vi réŋér ne a?›[20]

⁴⁴Yii bèy, á ku nèn a shiíy e vikìy víne réŋréŋ mo vilum shìíy aàsàkìi. Vilum vìne ku nèn shaà fo mbìy, a shiíy e Ohola wùn Oholiba, vikìy vin, a dzə̀ ambùʼtìvìnyò.

⁴⁵Wír vee jwáʼa kù wíy tinén nsaʼ yev, a njò yev kù dzə̀ visàkì wùn à kinjuyrì ki, bìʼ fo áwune‑eè yii visàkì, kfə̀n yúyrí wíri.

⁴⁶«Á bèy, ke mo woo NYÙY TÀR woo Taà Ndzə suuy ki dzə̀ jii, ‹Á kum á màŋgòŋ, é wù ghíʼ áwune, e nə̀ʼsì, e kfə̀n faàsì vifá vév.

⁴⁷Màŋgòŋ nəʼsì, é wù tsə́mrí áwune e tíyí, e gwàtì wón vév e nyùy sé rər sí, e kfə̀n tònrì lav sév.

⁴⁸Vikìy vin, á mo m wíy sə̀r liì joònè won fó wòŋ, vikìy yéné, é kí yéʼéy áwune, é la wùmòʼ yòʼ dzəə wìy bìʼnìn.

⁴⁹Vèn kù wíy koóy vilaʼày vee bìʼ visàkì vén, e koóy vilaʼày vé mebvə̀m me vèn‑eè ghvə́mé. Á bèy, é vèn nèn kìíy ji m dzə̀ á NYÙY TÀR woo Taà Ndzə.› »