Read Lamnso Esiker 24 Bible Online

Esiker 24 - Lamnso bible

Esiker 24

¹Yì‑iì dzə̀ é kishiíy ke kí‑iì meen ji ghvə̀m fo ŋwee woo ghvə̀m, e kiya ke kí‑iì sí may ji bvə̀ʼə̀, mo vèr‑iì siìn é kwaʼ nsàm, NYÙY TÀR súŋnín e mò.

²Wù súŋnín, e yòŋ jii, «Wàn wìr msòŋ, səə̀m kishiíy ké lán ki kijuŋ, e wày é nsay. Lán və̀n, fòn woó Babilon gìm ne ŋkàlaʼ Jerusalem e rə́r sí, e kèʼ, a màʼ.[21]

³Yòv ŋgàn rə̀n, é yì naari kinyo e wír vém vee antavkìtuu. Yì dzə̀ ji ke NYÙY TÀR woo Taà Ndzə suuy ki dzə̀ á jii: « ‹Á tiír kíŋ, á tiír kíŋ é kiy. Tiirì, á wày mendzə́v shó.

⁴Á wáyrí vintín ve nyàm sho, vintín ve ntay vi, vee kibiy wùn à kóyi. Á favti sá vighvə́r ve juujùŋ vi é mvəm wó.

⁵Á ku tày a dzə̀ wan nyàm wo juŋ, e kùm meŋkaʼ e sar kìŋ,[22] e yùŋrì, é mendzə́v mè tóʼ, tóʼó, é vighvə́r ví bíy, é nyàm bíy.›

⁶«Ke suuy mo woo NYÙY TÀR woo Taà Ndzə ki dzə̀ jii, « ‹Lòné shòʼ ne ŋkàlaʼ mensə rə̀n. Yì dzə̀ moo kíŋ ye nyàŋ koʼon shó, a bó yòʼ dzə̀ yí ràn. Á ku cù kíŋ, e fə̀tí e vintin vintin là nyaʼ, é la kímóʼ kí yòʼ bèr fó.

⁷Vé‑eè yùyrí wíri é ŋkàlaʼ fèn là nyaʼ, mensə́ mè leém é vilan, e kù a neŋ e ŋgèŋgèr. Bó mè yòʼ‑oò lo lèém e nsay ye kibvər ki sə́tí.[23]

⁸M ku nèn màʼtì mensə́ mèn e vilan e ŋgèŋgèr, e làa yòʼ sətí. M lóo yen, é dòʼshwíiy wom wáa koʼ, é m fiʼ siìr ŋkfə́tír.›

⁹«Á bèy, mo woo NYÙY TÀR woo Taà Ndzə nén a suúy jii, « ‹Lòné shòʼ ne ŋkàlaʼ mensə rə̀n, mómò, m yíi fum sa meŋkaʼ menín.

¹⁰Á ku dzə̀sì meŋkaʼ, e kòʼór və́y. Á yuŋri nyám, é kíŋé yúm,[24] é vighvə́r ví shwí, e rèŋ.

¹¹Á maʼti kíŋ é kay və̀y, é yí baŋ, é nyàŋ shwí, é lóm si may, é yí rán.

¹²M yèn ne ŋgeʼ, sí láy kisáŋ, nyàŋ kùʼnìn ne e kìŋ, e ghàʼ. Bèr ji á maʼ é və̀y.›

¹³«Jerusalem, à yiì ne liì visàkì, e lì *kifàn. M mùm ne feyì ji à maʼti á liì joònè visàkì, e fíʼ ran, à gháʼ. Bó yòʼ kfə̀n dzə̀ à ràn, a bó m máysí dòʼshwíiy wom wo wù koʼon, e kfə̀tì e wò kitu.

¹⁴Mo woo NYÙY TÀR, m yòŋ ne, a ghán sí ghèén ne, a m kù‑úù yii. Bó yòʼ dzə̀ m yiì yàr, a bó m yòʼ yíi bavtí wò, kìn ji m búʼúr. M kù wíy màʼ ŋgeʼ e wò kitu mo à yiìn, e màʼ sa réŋréŋ mo à bùʼtìn vinyo. Suuy mo woo NYÙY TÀR woo Taà Ndzə.»

¹⁵NYÙY TÀR kfən yòŋ mo, e sùúy jii,

¹⁶«Wàn wìr msòŋ, m lo, e sàsìn, e lì ŋgaà wo dzəə̀n ji síbaŋ yé. Kí kooy bèy, à wàa yen fó a dìy, a səʼə́r mensíy.

¹⁷Á yen sa fó a dìy ye wìr yú. Lá à yòʼ a dzə kpú. Kú a ndzəm táné é kitu. Á ker sa alábáʼá e wò wuù. Lá à yòʼ sùm shuu wó. Lá à yòʼ yì ntar kpu.»

¹⁸Á bèy, wáa dzə kijàvndzə, a vèr à wíri fer vimfèr, yiì lòo dzə e ŋkuùr, wiíy nèn kpù mo. Yì wáa jàv, m ku nèn yiì mo NYÙY TÀR‑iì suuyin ji m yii.

¹⁹Wíri nèn a ghay e mò jii, «Dzəə̀ ye à liìn kpú rə̀n sho dzə̀ ben, a nsàv dzə̀ ka, aà taʼ dìn ka e vèr?»

²⁰Á bèy, m nèn bìnèr aáwune jii, «NYÙY TÀR‑iì yòŋ e mò ji

²¹m suúy á e vèn vee wír veé Israyi jii, ke wun woo NYÙY TÀR woo Taà Ndzə yoŋ ki dzə̀ á jii, ‹Wun yíi yiì, é lav cù rə ye vèn shéʼri, túy shwín shó rə̀y kfə́n ji kifá ke *kifàn kí,[25] yìwun ye vèn leey moo síbaŋ, a melív men mè tíy sho ghán sidzə̀m. Jòkìnyàʼ, ké won vén vee vilum wùn à vee vikìy ve vèn màʼtìn é bàm, á wíy kpu yé rər.

²²A kí lò, e kòóy bèy, vèn lì a dzə mo m kì liìn. Lá wìr yòʼ sùm shuu, lá wìr yòʼ yì ntar kpu.

²³Vèn ku ndzə̀m tán sí e věn vitu, e wàyrí alábáʼá. Lá vèn yòʼ a dìy, a sòv kitú. Vèn yíi lò, a rèŋ, a mày a dzə̀ bìʼ ajay vén, é wìr wáa shwem, a leéy wùmòʼ.

²⁴Fo kém kí, mo woo Esiker, m yíi a dzə a mfìʼ yen, a dzə kisəəm ke vèn wáa kiyrí, a yiì mo mò‑oò yiìn. Vinyo vìn vi wíy koóy, é vèn nèn kìíy ji wun dzə̀ á NYÙY TÀR woo Taà Ndzə.› »

²⁵NYÙY TÀR nèn kfə̀n sùúy e mò jii, «Wàn wìr msòŋ, m wíy laàr kirə́ʼ ke wír veé Israyi yoy, tiir sho. Kirə́ʼ, a dzə̀ ke áwune shéʼri, yú wún, a melív mev mè kù tíy sho ghán sidzə̀m, aá leey moo síbaŋ. M kfə̀n wíy sə sa wón vév vee vilum wùn à vee vikìyí.

²⁶M wíy yiì kinyo kìn e kishiíy kee shó, é wìr wo wù bòyìn léʼ fó fo, e wìy, e yòŋ e wò, áà yú e vituʼùr vé vi.

²⁷Kù dzə̀ sá kishiíy kee shooy ke m wíy mvə̀ʼ shuu wó, é la à yòʼ dzə́ə a dzə kindzə̀mer, áà súŋnín vèn wìr wo wù bòyìn. Kí kooyì, á bèy, áà nèn a dzə kisəəm e wír vìne, aá nèn kìíy ji m dzə̀ á NYÙY TÀR woo Taà Ndzə.»[26]