Read Lamnso Esiker 25 Bible Online

Esiker 25 - Lamnso bible

Esiker 25

¹NYÙY TÀR lò, e yòŋ mo, e sùúy jii,

²«Wàn wìr msòŋ, kìʼ woŋ wìr veé Ammone, e tìn kàʼ wov.

³Suúy e wír veé Ammone jii, vèn yú kinyo ke NYÙY TÀR woo Taà Ndzə suuy ki. Ke NYÙY TÀR woo Taà Ndzə suuy ki dzə̀ jii, ‹Vèn‑eè maʼ kinseŋ e ghan se ŋgày cù yem‑eè birin, bínsi jii, á lèn, á lèn. Vèn kfə̀n‑eè maʼ sa e ghan se vé‑eè tònèn woŋ Isray, e siìr e vifə̀m, kfə̀n màʼ e ghan se vé‑eè koorin wír veé Juda, e dù sho e kwaʼ nsàm.›

⁴Kí nén a dzə jii, ‹Vèn yú, m lo, e way ven e wír veé mbìv yee fo shùy yii tóo wo, aá ton. Áwune wíy màʼ kiláʼáy kév e věn mvəm, e shwir wún e věn nsàn, a kfər báŋ sén sé vifa, a no vín nàʼ ye kì yíi a dzə yén.

⁵M wíy siìr ŋkàlaʼ yee Rabba ji kwáʼ akamer, e yiì, é woŋ Ammone kfə́n ji kirə́ʼ ké nyàm e dzə̀m. Kí kooy bèy, é vèn nèn kìíy ji m dzə̀ á NYÙY TÀR.› »

⁶Ke NYÙY TÀR woo Taà Ndzə suuy ki dzə̀ jii, «Vèn‑eè kwáʼ wó, dzəv kiwuú é nsay, séŋ fo shiliv bìʼ ŋgeʼ se sí gbuùn e Isray kitu.

⁷Bìʼ bey, m màʼ ne kiwó kém, e ghàr ven shó, a m lo fo, é vitúm vi ton, e sòr. M yíi bày ven fo wírí wùn, e màʼtì, é vèn reŋ, e lày fo vitúm ví mvəm. M yíi laàr ven ŋkuuŋkùŋ, é vèn nèn kìíy ji m dzə̀ á NYÙY TÀR.»

⁸Ke NYÙY TÀR woo Taà Ndzə suuy ki dzə̀ jii, «Wír veé Moav wùn à veé Gwan Seiri‑iì té lám ji wír veé Judàa kfə̀n ne saa moo vitúm vímóʼ ví.

⁹Á bèy, m wíy yiì, aá ton ŋkà se laʼ se sí tíy e bìíy Moav, é wóŋe kfə́n é ŋgèŋgèr. Kù dzə̀ ŋkà se laʼ se áwune yoy, tiir sho, a sí dzə̀ jii, Bet‑Jeshimot wùn à Baal‑Meon, à Kiriatayim.

¹⁰M wíy yiì, é wír veé mbìv yee fo shùy yii tóo tátí woŋ Moav wùn à woó Ammone, e tòn, é la Ammon yòʼ kfə̀n wìy a dzə e vitúm ví mvəm ye á wáa kuumé.

¹¹Fo ké Moav ki, é m fó sə́ see ŋgeʼ. M yii bèy, aá nèn kìíy ji m dzə̀ á NYÙY TÀR.»

¹²Ke NYÙY TÀR woo Taà Ndzə suuy ki dzə̀ jii, «Lǒn Edome dzə̀ jii, ‹Áwune‑eè siìr ŋkfə́tír e wír veé Judàá kitu, e lòo siìr, e màʼ ŋkfəə́mé wo bi.

¹³Bo ke mo woo NYÙY TÀR woo Taà Ndzə suuy ki dzə̀ jii, m yíi màʼ kiwó kém e Edom kitu, e laàr wíri, e laàr nyám si, e siìr fó e vifə̀m, e kèʼ fo Teman, e dù, e meé e Dedan. Wìr dzə̀m kù wíy kpu e shùu rər.

¹⁴M wíy lòo siìr ŋkfə́tír wom e Edom kitu, é m li a dzə̀ wír vém veé Isray, e yiì, aá kóʼ é kitu wo. Áwune wíy lovtí sho mo dòʼshwíiy wom dzəə̀n, e lovtí mo nyár ye m yú e mǒ wùné dzəə̀n, é wír veé Edome nèn kìíy ji dzə̀ á ŋkfə́tír mo m siìrìn aáwuné kitu. Suuy mo woo NYÙY TÀR woo Taà Ndzə.› »

¹⁵Ke NYÙY TÀR woo Taà Ndzə suuy ki dzə̀ jii, «Wír veé Filistiàa‑aà siìr ŋkfə́tír, e màʼ ŋkfəə́mé wo bi e wír vémé kitu, kù ban áwune bánen, taʼ ji á laar ŋkuuŋkùŋ.

¹⁶Bo ke mo woo NYÙY TÀR woo Taà Ndzə suuy ki dzə̀ jii, ‹E ké ru kí, m yíi màʼ kiwó kém e wír veé Filistiàá kitu, áwune vee wír veé Keret, e nèn laàr kibér ke wìr ve á dzə́ e ŋguùŋè rìbà ndzə̀v.

¹⁷M wíy siìr ŋkfə́tír wom aáwune, e màʼ ŋgeʼ ye biibí aáwuné kitu, a m maʼ mo dòʼshwíiy wom dzəə̀n. M siirì, aáwune nèn kìíy ji m dzə̀ á NYÙY TÀR.› »