Read Lamnso Esiker 26 Bible Online

Esiker 26 - Lamnso bible

Esiker 26

¹Yì‑iì dzə̀ é kishiíy ké mbìy ki fó ŋwee[27], e kiya ke kí‑iì sí mee ji nshòv mòʼón e ghvə̀m mo vèr‑iì dzəə̀n é kwaʼ nsàm, NYÙY TÀR súŋnín e mò.

²Wù súŋnín, e sùúy jii, «Wàn wìr msòŋ, wír veé Tayàa maʼ kinseŋ jii, ‹Eèhee, á lèn, Jerusalem wo yì‑iì dzəə̀n dzəə wày fo vitúm vi vinín bvəə̀rí ne. Lèn və̀n wo wù bvəərin ne, bo wáy wóví sí yìi dù e vèr, é vèr kuʼkir.›

³Bo ke suuy mo woo NYÙY TÀR e ŋkàlaʼ yee Taya ki dzə̀ jii, ‹Taya, m sì ŋgaà won vibàn. M yíi baʼtí vitúm vinín, é ví wiy, a ghiʼ ven, kù mo rìbà ndzə̀v yii binkìr, tsə́yninè.

⁴Áwune wíy bvəʼ kay ye yí kaarin ŋkàlaʼ, e kètì virùmèn vén. M wíy kuúy nsay fo ŋkàlaʼ, é bér vilán.

⁵Ŋkàlaʼ yee Taya wíy kfən ji vilán e rìbà ndzə̀v fo vé lovi wíy a sàŋ alálán vév.[28] Kù suuy mo woo NYÙY TÀR woo Taà Ndzə. Vitúm vidzə̀m vi wíy a faàsì vifá ve Taya,

⁶aá wíy laàr sa ntèʼ sə́ se sí dzəə̀n é nsay, e ŋguùŋè rìbà ndzə̀v, é wír veé Tayàa nèn kìíy ji m dzə̀ á NYÙY TÀR.›

⁷«Á bèy, mo woo NYÙY TÀR woo Taà Ndzə nén a suúy jii, ‹M yíi lì Fòn Nebukadnessar woó Babilon fo wòŋ kùyi, e wìy sho e Taya. Wù dzə̀ vitú ve afòn. Wù lóo wìy, é wù wáa ker nyám se ŋkoʼ, a ker *viténtén vé rər, a ker wír ve á kóʼó, e kfə̀n a ker shúu rər nyanyày.

⁸Wù wiy, é wù laar wír vén ve á dzəə̀n é ntèʼ seé ŋguùŋè rìbà ndzə̀v. Ké ŋkàlaʼ, wír vəə́ wíy bèʼèy nsay, e fum, é yì kaárí, e tàr, e gìm fó, e kfə̀n shùʼ nsay e wǔn kày ji á fiʼ kòʼ, e nə̀ə́ e ŋkàlaʼ. Á kfə̀n wíy bàʼrì sa vimà vé aŋkeè, a kìʼ ven shó.

⁹Áwune wíy lì lúm se vici, e fùn káy ŋkàlaʼ sho, e bvəʼ, e kfə̀n lì visha vév, e kèr vitaàtì vén vé ŋkiy sho.

¹⁰Nyám sév sé ŋkoʼ si wíy a dzə nyanyày, e koʼór kibvər ke dzə̀ kí sùm ven. Á wíy bvəʼ kay, fòn wùn à vé rərí lóo sheemé e ŋkàlaʼ wùn à nyám se ŋkoʼ si, à viténtén vé rər ví, é njèʼèr wáa koʼ, é virə́v vé kày vi wáa sə̀ʼ.

¹¹Nyám se ŋkoʼ sév sí wíy tuŋ dzə́ə sén e mfay si, e bivír. Á wíy gwàtì wír vén e nyùy rə̀r, é vitóm vén ve tavkín ví gbukir é nsay.

¹²Áwune wíy faàsì bùʼ won, e kuúy káv wón e dzə̀m. Á kfə̀n wíy sàʼ kay yén, e kètì láʼ sén se juŋ si. Á wíy kuúy tíy, e kuúy vicí ve toʼón ví wùn à nsay, e dòm e ndzəv.

¹³Á bèy, é m sər yòv won, é la á yòʼ dzəə yù ji lúŋ nshì é ŋkàlaʼ.

¹⁴M wíy siìr ŋkàlaʼ yen, é yì kfə́n é ŋgèŋgèr, vilán vilán, é wáa dzə kirə́ʼ ke wíri saŋ alálán fo. Bó á yòʼ kfə̀n dzəə́ wìy siìr ŋkàlaʼ yen fó.› Dzə̀ mo NYÙY TÀR, a kù suuy mo woo NYÙY TÀR woo Taà Ndzə.

¹⁵«Ke mo woo NYÙY TÀR woo Taà Ndzə suuy e wír veé Taya ki dzə̀ jii, ŋkàlaʼ yen wíy gbù, vitúm ve ví dzəə̀n é shuù se ndzəv ví yú kiléŋléŋ, é ví wáa fàn, a yàʼ. Á yú mo wír ve á lemkiné dzəmè, yú mo á yuyrin wíri é mfòn, é ví wáa fàn, a yàʼ.

¹⁶Afon adzə̀m ve á dzəə̀n é shuù se ndzəví wíy səʼə́y fo akàvàʼ, e shoʼtí ndzə̀y sév sé vifòn, e shoʼóy bvə́rì. Á wíy sesín fo nsay, a dzə fan fan, a leéy ven, a jaáy.

¹⁷Áwune wíy a dìy, a taŋ ŋkàlaʼ yen, a suúy jii: « ‹Àshè, sì ŋkàlaʼ yee Taya, a yì ŋeémé ne, e lày bèn à? Ŋkàlaʼ a vé‑eè yúʼninè, a wír veé shuù se ndzəví‑iì tàr fó. Vèn‑eè sáʼ rìbà ndzə̀v, a wíri fan ven. Wír vee věn laʼa‑aà yiì, vitúm vi wáa yàʼ.

¹⁸Ké lèn ki, kishiíy ke ŋkàlaʼ yen gbuùn, woŋ seé ŋguùŋè ndzə̀v sí səʼsì. Kindzə́m kí gwar woŋ seé ndzəv, bìʼ reŋ ye ŋkàlaʼ yen rèŋèn ne, e mày.›

¹⁹«Ke mo woo NYÙY TÀR woo Taà Ndzə suuy ki dzə̀ jii, ‹Taya, m yíi siìr ŋkàlaʼ yè, é yì kfə́n ji vifə̀m réŋréŋ moo ŋkà se laʼ se bó wìr yòʼ dzəə́ kum sho. M wíy sùm wò e rìbà ndzə̀v, áà lay shó.

²⁰M wíy tsənsí wò aàŋkfəə́ wòŋ, áà du, e yèn wír ve vé‑eè siìn fó fo ŋgùʼ. M wíy yiì, áà tátí virə́ʼ ve ví‑iì siìn é vifə̀m fo yàŋgùʼ, a dzə e sar nsay, e làa yòʼ kfə̀n dzə́ə wìy a dzə kirə́ʼ ke wíri wáa dzə sho e wír ve tiné wòŋ.[29]

²¹M wíy yiì, é kimaysì ké ki wáa beemé, aá yòʼ dzəə́ wìy yen wò. Fə̀m mo wíri wíy a tàʼ wò, bó á yòʼ kfə̀n wíy yen.› Suuy mo woo NYÙY TÀR woo Taà Ndzə.»