Read Lamnso Esiker 27 Bible Online

Esiker 27 - Lamnso bible

Esiker 27

¹NYÙY TÀR yòŋ mo e sùúy jii,

²«Wàn wìr msòŋ, yòv lúŋ kpuu kùm Taya lèn.

³Á yòv, a taŋ ŋkàlaʼ rə̀n ye dzəə̀n ntàsín vikoŋ ve ví ghán e rìbà ndzə̀v, a yì kávnin wáy wùn à vitúm ve ví dzəə̀n é ŋguùŋè ndzə̀v ví vidzə̀m. Yòŋ e ŋkàlaʼ rə̀n ji ke NYÙY TÀR woo Taà Ndzə suuy ki dzə̀ á jii: « ‹Abaày Taya, wò‑oò sí suuy jii, M dzə̀ bòŋlànsem.

⁴À dzə̀ é ntìntìn ndzə̀v, rìbà ndzə̀v kaárí wò, e tàr, wír ve vé‑eè bàʼrìn wòo‑oò lo lì ghán, e bàʼrì, à bóŋ é ŋàŋ.

⁵Vé‑eè wìy e vicí vé *fir vi fó Senir, e tòʼ, e bàʼrì wò sho, à wáa dzə ji màkìkoŋ. E lì kicí kee *sidar fo Lebanon, e fèr kitóm ké sho, kí wáa ghar ndzə̀y se shwéri nəə sho, dom kikóŋ.

⁶Vé‑eè lì vicí vee oak fo Bashan, e fèr mbàŋ se á kiy kikóŋ sho, e fèr mvəm kikoŋ e kicí ké *payin keé Saypur[30] ki, e nàŋsín, e làʼtí sóŋ kitàm e wùn wó.

⁷Ndzə̀y se shwéri dom kikoŋ sho si‑iì lò fó Ejiv, aá bónén e tsə̀m e nshòm si, ji á fíʼ a yen wò kwaʼda, a kiíy. Kibaʼ ké ki‑iì səə́ne moo yúv, kfə̀n baaŋè, aá wíy shó fo shùu ndzəv yeé Elisha.

⁸Wír ve vé‑eè kiy kikóŋe‑eè lò fó ŋkàlaʼ yee Sidon, à yee Arvadi, a ve vé‑eè binèr kikóŋe kù dzə̀ wír vén veé Taya, wír, ve á yii kiiy lim rə̀n kijuŋ.

⁹Aránsisi veé Gebalìi wáa dzə e kikoŋ, a dzə̀ vé fèri, kù tee làm e nsàn se kikoŋ. Vikóŋ veé kitu ke nsay vidzə̀m vi‑iì wiy, yén wò, kávnin wáy vèn áwune.›

¹⁰«Wír veé Persia wùn à veé Lidia à veé Libiyàa‑aà[31] dzə̀ e wò ŋgoo rə̀r. Vé‑eè keèrì aŋkeè vév wùn à tán sé rər sí e wò virəv vé ŋkàlaʼ, e yiì, à wáa yensín e gháʼtín.

¹¹Shúu rər woó Arvadi‑iì tàtí wó woo shúu rər, wùn áwune wáa tiy e virəv, e kaàrí, e tàr, a shìy ŋkàlaʼ. Shúu rər woó Gamadi‑iì kòʼ ŋkiy e vitaàtì, a shìy fó. Áwune‑eè keèrì aŋkeè vév é wǔn virəv, e kaàrí, e tàr. Á yiì bèy, à wáa kìʼ e juŋ.

¹²«Wír veé Tarshishi‑iì kávnin wáy vèn áwune bìʼ vifá ve way ve wò‑oò kér e ŋàŋ. Áwune‑eè kúvsin vifá vé e *kisha ke mbàm ke fəvír kí, à kisha kee kiy ki, à kisha kee *tin ki, e bóo lì kee *led.

¹³Wír veé Grik[32] wùn à veé Tubali, à veé Mesheki‑iì yii wáy vèn áwune. Vé‑eè kúvsin akwàn vév wùn à vifá vee kisha kee *brons ki, sə́ vé vee vifá ve way.

¹⁴Wír veé Bet Togarmàa‑aà wiy e nyám se ŋkoʼ si wùn à vé koʼo, à vimbèʼbìy vé nyàm ŋkoʼ vi, nèn kúvsin, sə́ vé vee vifá ve way.

¹⁵Wír veé Rodesi‑iì[33] kávnin wáy vèn áwune. Nyanyày wìr ve vé‑eè dzə́ e ŋguùŋè rìbà ndzə̀ví‑iì kávnin wáy, fó nsùʼ e wò, laʼ wò e sóŋ kitàme wùn à kintav ke kici kee ebone ki.

¹⁶Wír veé Siiriàa‑aà kávnin wáy vèn áwune bìʼ vifá ve way ve wò‑oò kér nyanyày. Vé‑eè wiy e *síbaŋ yee emerali, wiy e kfə́ə làv wo wù səə́ne moo yòm, kfə̀n wiy e ndzə̀y ye á bonen, e tsə̀m, wiy e ndzə̀y ye á baan e làv wo fəvír woo fèm, wiy e síbaŋ yee koràa, à yee ageti.

¹⁷Wír veé Juda wùn à veé nsay Israyi‑iì kávnin wáy vèn áwune. Áwune‑eè kúvsin vifá vé e sáŋ yee *wit yee jeéyí, kfə̀n kúvsin e meŋkfəŋ memoʼ mè,[34] kúvsin e vilu vi, kúvsin e meŋgvə́r me *oliv mè, e bóo lì kiláy kee *baam.

¹⁸Wír veé Damaskusi‑iì kávnin wáy vèn áwune bìʼ nyanyày vifa ve wò‑oò kérí, à káv wo wò‑oò kér e ŋàŋé. Áwune‑eè wiy e meluʼ mè fo Helbon wùn à wúy njiì ye fəvírí, kúvsin vifá vé sho.

¹⁹Áwune kfə̀n‑eè wiy sa e meluʼ mè[35] fo Usal, kúvsin vifá vé sho, kfə̀n wiy sa e kisha ke á tònèn, e shèŋrì ki, wiy sa e vifá ve rəʼtìn vee *kaasia vi, à vee *kalamus vi ji á kúvsín vifá vé sho.

²⁰Wír veé Dedane‑eè wiy, kér vidzəʼmè vé nyàm ji vèn áwune wáa kavnín wáy shó.

²¹Wír veé Arabia wùn aàŋgàa saʼ veé Kedari‑iì dzə̀ aŋgàa way vé, aá wiy, kér njiì, kér viyáʼ wùn à bvə́y se loŋ si ji vèn áwune wáa kavnín wáy shó.

²²Vé way veé Sheba wùn à veé Raamàa‑aà wiy, kávnin wáy vèn áwune. Áwune‑eè wiy e kfəə́ se vifoorí se juŋ si, wiy e kfə́ə saàkìnshìy ye juŋe wùn à kisha ke mbàm ke baar kí, kúvsin vifá vén shó.

²³Wír veé Haran, wír veé Kane, wír veé Eden, à vé way veé Shebàa, e lì veé Asshur, à veé Kilmadìi‑iì kávnin sa wáy vèn áwune.

²⁴Ŋkà se laʼ sìn si‑iì fiinè ndzə̀y se juŋ si e vèn, fiinè vikúm ve á bonen, e tsə̀m, a ví səə́ne moo yúv, fiinè gham se njaʼkìn sí, se á baan e làv, kfə̀n fiinè sa akfəə̀, kfəə́ si kfəə́ si.

²⁵Vikóŋ veé Tarshish vi‑iì sə́ wò, béʼ vifá vé ve way. « ‹Taya, à dzə̀ màkìkoŋ feyì wo wù ŋeéme e vifá vi, ghvəə́ne sho e ntìntìn rìbà ndzə̀v.

²⁶Leéy, e yèn, vé kikoŋe lì ne wò, e dù sho e ntìntìn rìbà ndzə̀v. Shwér woó mbìv kintoshùyi tsə̀y ne kikóŋ ké, e bìnèr wò, e dòm e sar ndzəv.

²⁷Wíy lòo dzə e kishiíy ke à may kìn, é vifá vé vi lay vidzə̀m. Káv wóo wíy lày, à vifá vé ve way ví, à kéŋ yée e dzə̀m. Vé kikoŋ vée wíy lày, à ve á binèr kikóŋ saa, e lì ve á sə́ti vintóʼ, à wónlě wayí, à vé rər vé ve á dzəə̀n é kikoŋe, e lì wir dzə̀m wo wù dzəə̀n é kikoŋ. Wìr dzə̀m wíy tatí, e dù e sar ndzəv.

²⁸Vé kikoŋ vée wíy san tóŋ, é ŋguùŋè rìbà ndzə̀v e dzə̀m səʼsi.

²⁹Wír veé vikoŋ vímóʼ vií wíy yu, é wìr dzə̀m shwey kfə́ kee kikóŋ. Vé vikoŋ adzə̀me wíy a tiy e meshavtí, wír ve á kiyì, à ve á binèrìi.

³⁰Áwune wíy a bùr tóŋ, a dìy wò. Lóo toŋ, lóo dìy, aá wáa koʼór kibvər, a buʼ e kibvə.

³¹Á kfə̀n wíy kom vitú ve kpu, e way vifám vé kpu. Á wíy a dìy e wò kitu mendzən mendzən, a dìy, a ŋavrí, a nyár kpú.

³²Á wíy a toŋ, a dìy wò, a yòv lúŋ kpu, a taŋ wò jii, vé‑eè yiì ne laàr la moo Taya, yée bìnèr wun e sar rìbà ndzə̀v?

³³Taya, wò‑oò tsə́nsi vikóŋ vé ve way é virə̀ʼ, wír aníne yù vijuŋ. Wò‑oò kér bùʼ e ŋàŋ, yii wáy vèn à vitúm vi vinín, lòo yiì bèy, afon veé vitum fène nèn a kùʼkìr.

³⁴Ké lèn ki, à sàʼkìr ne e rìbà ndzə̀v, e bìnkìr, e lày e sar ndzəv. Vifá vé ve way, à vé kikoŋe tàtí ne wò, vèn áwune dú é sar ndzəv.›

³⁵«Shúu yùm ne wír ve á dzə́ e ŋguùŋè rìbà ndzə̀v adzə̀m, á leéy wò, e jàáy. Wúné beéme afon vév, aá yaʼà, káv vishí, a gháʼ fan.

³⁶Vé way veé vitume tíy, kíy wò, ŋaŋ shuu, tó yoóyí, bìʼ fo kimaysì ké ki beéme, aá yòʼ dzəə́ wìy yen wò feyì.»