Read Lamnso Esiker 28 Bible Online

Esiker 28 - Lamnso bible

Esiker 28

¹NYÙY TÀR kfən sùŋnín e mò, e sùúy jii,

²«Wàn wìr msòŋ, yòŋ ŋgaà saʼ woó Taya, e sùúy sho ji ke NYÙY TÀR woo Taà Ndzə suuy ki dzə̀ á jii: « ‹À kér kiŋkoʼòrwùn e wò shiliv, dzəv nsaŋ, yoŋ ji m sì nyùy, sévti ji m dzə́ e kàvàʼ, e ntìntìn rìbà ndzə̀v, a dzə̀ wo anyùy. Wò, aà dzə̀ wír fo wìr, aà yòʼ dzə̀ nyùy wùmòʼ, fə̀m mo à sév ji vifií vé vi dzə̀ á vé anyùy.

³Ké ru kí, à fìír feyì, e shaà Daniel,[36] bó kilìtì ke kinyò ke à méŋ ki yòʼ dzə̀.

⁴À kòóy ne káv, a kù yiì vifií wùn à vinyo ve à kiìn ví, e bàʼtí *kisha ke mbàm ke baar kí wùn à ke fəvír kí, e lèm.

⁵À dzə̀sì ne káv wó, a kù dzə̀ bìʼ vifií vé way ve à kérí. À wày ne shilív shé e kav foo fèy, nèn a yu wún.

⁶Á bèy, mo à liìn ne kitú ké ji à fìír moo anyùy, bo ke suuy mo woo NYÙY TÀR woo Taà Ndzə ki dzə̀ jii:

⁷M wíy wìy e viŋgwìy vi, é ví ghíʼ wò. Vitúm, a dzə̀ vé bvə̀m ŋgeʼe. Áwune wíy laàr kifá kidzə̀m ke wò‑oò lìmèn ji vifií, e kèr vifá ve à bàʼrìn, ví wáa njàʼkìr.

⁸Á wíy dòm wò aàŋkfəə́ wòŋ, áà kpú yé nshoórsíi é sar rìbà ndzə̀v.

⁹Áwune wíy wìy ji á yúyri wò, áà kfən yòŋ ji à dzə̀ nyùy a? Vé kinjuyrì vìne wíy ghar wò, é la à yòʼ a dzə nyùy, áà wáa dzə wir msòŋ.

¹⁰À wíy kpu ji làŋgày e viŋgwìy ví wo. Suuy mo woo NYÙY TÀR woo Taà Ndzə.› »

¹¹NYÙY TÀR kfən sùŋnín e mò, e sùúy jii,

¹²«Wàn wìr msòŋ, yòv lúŋ kpuu kùm fon woó Taya, lóo yòv, à wàa taŋ wun, a yòŋ jii, ke NYÙY TÀR woo Taà Ndzə suuy ki dzə̀ á jii: « ‹Wò‑oò dzə̀ kisəəm ké kifa kee bòŋ là nsem, kér vifií é ŋàŋ, kfə̀n tò sí feyì.

¹³Wò‑oò dzə́ e mǒ kiboo keé Eden, lóŋri kitú ké e kfə́ə sibaŋé e dzə̀m. Wò‑oò lóŋri e *síbaŋ yee karneliane, à yee topari, à yee jespàa à yee krisolìi, à yee berili, à yee oniksìi, à yee safirìi, à yee garneti, e lì yee emeral, aá náŋsín, e jùŋ e *kisha ke mbàm ke baar kí, e bàʼtí ji vé e kishiíy ke mò‑oò bomen wò.

¹⁴Wò‑oò dzə̀ nshìylav yem ye ghaʼán,[37] a m lém wò ji à wáa shìy a virə́ʼ. Wò‑oò dzə́ e mǒ gwan wo ranén, kár e nsàn se vilan, a ví bavkìr moo və́y.

¹⁵E kèʼ fo kishiíy ke mò‑oò bomen wò, à kù‑uù dzə̀ là jay e kinyò ke wò‑oò yii kidzə̀m. À ló fó fo, kinyo ke bi kí ló, e fəə̀ e wò kinyò.

¹⁶Wáy wó woo kávnín é ŋàŋé yiì, à wáa ŋàʼ, a bùʼtì vinyo. Bìʼ bey, m nen jùm wò fo mǒ gwan woo jeéy ji ŋgaà *kifàn, e fə̀ə́r wò fo nsàn se vilan ve ví bavkìr moo və́y, wò woo nshìylav Nyùy ye ghaʼán ye yì‑iì shiy virə́ʼ.

¹⁷Wò‑oò kér kiŋkoʼòrwùn é shiliv, bìʼ fo à toon sí. Wò‑oò wày vifií é bùʼ e ŋàŋ, e dù e kiyuŋ. M nèn sàn wò e nsay tèéter, aàfoné si, á wáa kiy wò.

¹⁸Wò‑oò buʼtì vinyo nyanyày, kávnin wáy kinshwìvi, e nèn lòr virə́ʼ vé ve cù. Bìʼ bey, m nèn fə̀ə́r və́y fo wò kiwo, wú laàr wò. Mò‑oò yiì, wú tón wò e wìr dzə̀m si, à dú é kibvə.

¹⁹Kindzə́m kí gwár vitúm vidzə̀m ve ví kiìn wò. Bìʼ fo kimaysì ké ki beéme, aá yòʼ dzəə́ wìy yen wò gheéy.› »

²⁰NYÙY TÀR yòŋ mo, e sùúy jii,

²¹«Wàn wìr msòŋ, bìnkìr, e kìʼ ŋkàlaʼ yee Sidon, e tìn kàʼ wov.

²²Yòŋ e wír veé Sidone ji ke NYÙY TÀR woo Taà Ndzə suuy ki dzə̀ á jii: « ‹M dzə̀ ŋgaà won vibàn. M wíy yiì kinyo ke m yiìn e vèn, é vikuʼùy vém ví yénsín e věn mvəm. Rúrú, m wíy màʼ ŋgeʼ e Sidon kitu, e dìn mo m dzəə̀n e ránén, é wìr dzə̀m nèn kìíy ji m dzə̀ á NYÙY TÀR.

²³M wíy tsənsí kifə̀ʼ e věn mvəm, e tsənsí rə́r, é mensə́ mè leém é dzəə sí. Aŋgàa vibàné wíy ghiʼ ven mbìv sidzə̀m, e yuyrí wíri nyanyày e mvə̀m ŋkàlaʼ. Yúyri, é wìr dzə̀m nèn kìíy ji m dzə̀ á NYÙY TÀR.›

²⁴«Kí kooy bèy, é la wír veé Israyi yòʼ dzəə wìy a ker aŋgàa vibàn aáwuné ghaŋ ve á wáa sòvnìn moo laàlaŋ, a lumnín moo jwí. Á bèy, aáwune nèn kìíy ji m dzə̀ á NYÙY TÀR woo Taà Ndzə.»

²⁵Ke NYÙY TÀR woo Taà Ndzə suuy ki dzə̀ jii, «M wíy baʼtí wír veé Isray fo vitúm ví mvəm, fo áwune taʼrin, e dùkìr. M báʼti, é vitúm vi nèn yèn ji m dzə̀ á e ránén ji Nyùy. Á bèy, é wír veé Israyi nèn a dzə aáwuné nsay ye mò‑oò foon e ŋgaà lìm wom woo Jakov.

²⁶Áwune wíy a neŋ fo ji dèʼ, là kindzə́m, a bom láʼ si, a lìm súm sé vitiír vé *vayin. M wíy tsəm aŋgàa bìíy vév e ŋgeʼ si, é wír veé Israyi nèn a dzə fo là fan. Á bèy, aá nèn kìíy ji m dzə̀ á NYÙY TÀR woo Nyùy wov.»