Read Lamnso Esiker 29 Bible Online

Esiker 29 - Lamnso bible

Esiker 29

¹Yì‑iì dzə̀ é kishiíy kee nshòv sibaà e ghvə̀m fo ŋwee woo ghvə̀m, e kiya ke kí‑iì sí mee ji ghvə̀m, mo vèr‑iì dzəə̀n é kwaʼ nsàm, NYÙY TÀR lò, e sùŋnín e mò, a suúy jii,

²«Wàn wìr msòŋ, kìʼ Farao woo fon woó Ejiv, e tàtí woŋ vəə́, e tìn kàʼ wov.

³Súŋnín, e sùúy ji ke NYÙY TÀR woo Taà Ndzə suuy ki dzə̀ á jii: « ‹Farao, fon woó Ejiv, yuúrí, e yù, m dzə̀ ŋgaà wò vibàn. Wò woo kigàgǎʼsòŋ ke kí néŋ e mvə̀m nshwǎn ndzəv yee Naay, néŋ bèy, sév jii, kér mo ndzə́v yee Naay, mò‑oò fèr ji yém.

⁴M wíy màʼ lóv, áà li é vijèʼ. À li, é m yii, é sə́ seé Naay sidzə̀m si bárín e wò ŋgaʼ si. M wíy sə̀ŋ wò, e fəə́r fo wò mvə̀m ndzə̀v, a sə̀ŋ vèn à sə́ si sidzə̀m, a sí bátin e wò ŋgaʼ si.

⁵M səŋ wò, é m du, e shwèy e woʼ vèn à sə́ see wò ndzəv sí. À wíy a neŋ e woʼ é ŋgèŋgèr, là ŋgaà wóo baʼtí, e dzəə̀mè. M wíy fo wò ji viyíkìr ve nyàm seé kwaʼ, à vé menə̀n ví,

⁶é wìr dzə̀m woó Ejiv nèn kìíy ji m dzə̀ á NYÙY TÀR.› «Vèn à wír vée kù dzə̀ ji mbàŋ kisàŋsáŋ fo wír veé Israyi.

⁷Vé‑eè lòo ghar wò ji á toóme, à béʼém, e tòkír aáwuné kàvìr. Á yéʼtí e wò ji á tóm wún, à béʼém, ndzə̀m sìmsìn.

⁸«Kí nén a dzə jii, ‹M wíy bi shúu rər, é wú ghíʼ ven, e laàr wíri, e laàr sa nyám si. Suuy mo woo NYÙY TÀR woo Taà Ndzə.

⁹Woŋ Ejivi wíy kfən ji vifə̀m, lóo dzə kirə́ʼ kisáŋ, aáwune nèn kìíy ji m dzə̀ á NYÙY TÀR.› «Farao, mo wò‑oò sevtin ji ndzə́v yee Naayi dzə̀ á yé, a yì‑iì fèr á wò,

¹⁰á bèy, e ké ru kí, m ban wò, ban ndzə́v sé, a m yíi ghèʼ nsay yè, é yì wúy, e lày kisáŋ, e kèʼ fo Migdol, e dù, e bàʼ e Aswan, e bìíy Etiopia[38], e mbìv yeé tsən.

¹¹Bó kiwuú ké wìr msòŋ, kìn ké nyàm ki yòʼ wíy bàv fo. Fóo wíy dù e vifə̀m kiyá mkweè.

¹²M wíy siìr woŋ Ejiv ji vifə̀m moo woŋ símóʼ sí se sí siìn sá e vifə̀m. Ŋkà se laʼ sév sí kù wíy kfən e vifə̀m moo seé vitum vímóʼ ví. M wíy bvəə́r wír veé Ejiv, e taʼár, aá du, e sàŋrí e vitum.

¹³«Yii bèy, ke mo woo NYÙY TÀR woo Taà Ndzə suuy ki dzə̀ jii, ‹Kiyá kee mkweè ki wíy shaà, é m bánén wír veé Ejiv fo vitum ve vé‑eè taʼrin, e dùkìr sho.

¹⁴M wíy siìr vijuŋ ve Ejiv, aáwune kfə́n é Patros fo ntòŋ yev dzəə̀n, é nèn a dzə shitumèn là ndzə̀n.

¹⁵Wíy a dzə kitúm là kitar, a bó kí yòʼ dzəə́ wìy a taa e vímóʼ vee vitúm ví kitu. M wíy sèn áwune, e neèr ye bó yòʼ dzə̀ áwune kfə̀n wìy sìíy, a saʼ vímóʼ vee vitúm.

¹⁶Bó wír veé Israyi yòʼ kfə̀n dzəə́ wìy a yeʼtí e Ejiv wùn ji á koóy á ntom. Á kù sí wìy a kuumé a dzə̀ jay wov wo vé‑eè leey Ejiv ji á koóy á ntom.› Á bèy, é wír veé Israyi nèn kìíy ji m dzə̀ á NYÙY TÀR woo Taà Ndzə.»

¹⁷Yì‑iì dzə̀ é kishiíy ké mbìy ki fó ŋwee mbìyi, e kiya ke kí‑iì sí mee ji nshòv saàmbà e mbaà, mo vèr‑iì dzəə̀n é kwaʼ nsàm, NYÙY TÀR yòŋ mo, e sùúy jii,

¹⁸«Wàn wìr msòŋ, Fòn Nebukadnessar woó Babilon‑eè yiì, shúu rər vəə́ yén ŋgeʼ e Taya bàm é ŋàŋ. Vé‑eè bèʼèy vifá ŋkóŋkóŋ, nə́ŋ si feésí fo vé rərí kitu adzə̀m, mbèʼ sév sí kfən sòrkìr, a bó áwune yòʼ fə̀m‑eè ló a ker séʼ wo vé‑eè diy fo Taya ji vilaʼày vé ŋgeʼ ye vé‑eè yenen.

¹⁹Á bèy, ke mo woo NYÙY TÀR woo Taà Ndzə suuy ki dzə̀ jii, ‹M yíi fo woŋ Ejiv e Fòn Nebukadnessar woó Babilon. M fó, é wù kuúy bùʼ wov, e lì ji nsàʼmboʼ, e yòv nsay ji vilaʼày vé shuù və́ rər.

²⁰M fò ne woŋ Ejiv sho ji vilaʼày vé ŋgeʼ ye wùn à shúu və́ rərí‑iì yenen, aá lim lim yém.› Suuy mo woo NYÙY TÀR woo Taà Ndzə.

²¹Wíy lòo dzə e ghan fóo fèy, é m yii, é Isray kfən tàv, é m mvəʼ shuu wó, e lèm e rə́, áà wáa suŋnín e wír vìné mvəm. Kí kooy bèy, aáwune nèn a kuumé ntum yè, a binsí, e kiíy ji m dzə̀ á NYÙY TÀR.»