Read Lamnso Esiker 31 Bible Online

Esiker 31 - Lamnso bible

Esiker 31

¹Yì‑iì dzə̀ é kishiíy ké mbìy ki fó ŋwee wo wú‑uù meen ji taár, e kiya ke kí‑iì sí mee ji nshòv mòʼón e ghvə̀m, mo vèr‑iì siìn é kwaʼ nsàm, NYÙY TÀR lò, e sùŋnín e mò e sùúy jii,

²«Wàn wìr msòŋ, gháy e Farao woo fon woó Ejiv wùn à mànjòŋ və jii: « ‹À ghaàmé bèn, e shwìnín a dzə̀ la?

³Kuúmé kinyo ke kí‑iì kooyin Assiriya ki. Assiriya‑aà dzə̀ ji kicí ké sidar aàgwan veé Lebanon, kér tám si, a sí rə́ŋsín, e bòŋ, a fo kindzə̀ə́ndzəm. Yì‑iì dzə̀ kicí, a kí dár é ŋàŋ, to rəə́ wáa dzə e mvə̀m mbàʼ.

⁴Kicí kee *sidar kìn ki‑iì kér mendzə́v nyanyày, a ntòŋ sé ndzəv seé loònsay si‑iì kóʼor mendzə́v, a kí teʼè. Ndzə́v seé loònsay si wáa leŋ fo kicí kí‑iì tíyí, bo nshwàn sí wáa jàv mendzə́v e vicí vímóʼ ví é kòv.

⁵Á bèy, kí kúy, e dàr, e shaà vicí veé kòv vidzə̀m. Tám sə́ sí‑iì fàŋkìr, e dàrkìr, bìʼ mendzə́v mee nyanyày.

⁶Menə́n meé kòv medzə̀m mè bàʼrì e wun tam si, nyám se kwaʼ sidzə̀m si dzəə́kír e wun sar, vitúm vidzə̀m vi wáa beè e wun kindzə̀ə́ndzəm.

⁷Kicí kin ki‑iì bòŋ, a dzə kiwíy, tám sə́ sí dárkír, e sàŋrì wún, bìʼ fo gháŋé‑eè kum mendzə́v mee nyanyày.

⁸Vicí vee sidar vee Nyùy kiboo ví yòʼ‑oò méʼ wun, a bó kicí kee dzəʼə̀y kí yòʼ‑oò méʼ wun e tam si. Kicí kee *plen ki yòʼ‑oò dzə̀ kí tàm wùn wun fo tam si. Bó kicí kí yòʼ‑oò dzə̀ e Nyùy kiboo kée dzə̀v kiwó wùn wun fo bòŋkìr.

⁹Mò‑oò bòm, kí kùʼ e tam si, nèn a bòŋkìr. Kicí keé Eden kidzə̀m ki nèn a siimé wun, Eden wo dzəə̀n kiboó kém.›

¹⁰«Kí nén a dzə jii, ke suuy mo woo NYÙY TÀR woo Taà Ndzə ki dzə̀ jii, ‹Kicí kiy ki‑iì kùy, e dàr e ŋàŋ, to rəə́ bàʼ e mvə̀m mbàʼ, kí nèn lò, a dzə̀v nsaŋ bìʼ vida və́.

¹¹Bìʼ bey, m nèn mèŋ wun, e wày e taàtu vitum[40] wo ji wù nyavri shó réŋréŋ mo liì və kisaŋ‑eè taʼà.

¹²Vitúm ve siìn ji vé tàkìŋàʼa nèn wìy, e gwàr kicí kin, e wày é nsay, tám sə́ sí wáa neŋnín aàgwan, a neŋnín e viwoóy, a neŋnín e nshwàn sé ndzəv. Wìr dzə̀m woó kitu ke nsay wo wù‑uù beèn e wun kindzə̀ə́ndzəm fəə́ fo wun sar kindzə̀ə́ndzəm, e shwèy wun shwéyin.

¹³Menə́n medzə̀m mè‑eè wìy, a shiíy e wun vifə̀m, nyám se kwaʼ sidzə̀m si wáa kar e mvə̀m tam si.

¹⁴Mò‑oò yiì bey ji lá kicí kímóʼ kí yòʼ dzəə wìy kùy, e shaà vímóʼ ví, é to rəə́ wáa meʼ mbàʼ, a kí fə̀m kér mendzə́v é le. Kí dzə̀ bey, bìʼ fo m wayin ne ji vicí vidzə̀m vi waà kù wíy yum, a dzə̀ mo wíri kpú, á dù é sày. Á kù wíy kpu adzə̀m, e səy aàŋkfəə́ wòŋ.›

¹⁵«Ke suuy mo woo NYÙY TÀR woo Taà Ndzə ki dzə̀ jii, ‹Kishiíy ke kicí ké sidar kìn ki‑iì gbuùn, e səy áàŋkfəə́ wòŋ, m màʼ kpú ye wiyí, a dzə̀ ye ntòŋ sé ndzəv seé loònsay si‑iì dzəə̀n é nsòv, ndzə́v sév sí yúmkír. Mò‑oò sùm agwan veé Lebanon e ndzə ye sənér, vicí vidzə̀m vi njoó bìʼ kicí ké sidar kìn.

¹⁶Mò‑oò màʼ kicí kin, kí gbù, e sə̀y é sày, e tàtí wír vee aŋkfəə́ wòŋ, kiléŋléŋ kí kóʼ, vitúm vidzə̀m vi yú, a yàʼ. Vicí ve ví‑iì siìn áàŋkfəə́ wòŋ vi yén bey, a sheʼrí ji bó yòʼ jòʼ a áwune, a dzə̀ jii, vicí veé kiboo keé Eden vidzə̀m, à vicí vé ntay veé Lebanon vi, vicí vidzə̀m ve ví‑iì sí dzə́ fo mendzə́v mè‑eè dzəə̀n nyanyày.

¹⁷Kicí kin ki‑iì dù é sày, kifá kidzə̀m ke kí‑iì beèn e wun sar kindzə̀ə́ndzəm ki dú sá, a dzə̀ ji vitúm vidzə̀m ve ví‑iì tóm kicí kin vi‑iì sə̀y áàŋkfəə́ wòŋ, e tàtí wír vee fó ve vé‑eè yuyrin é kwaʼ rər.

¹⁸Farao, à ghaàmé bèn, e shwìnín a dzə̀ la? Kicí keé kiboo keé Eden ke kí méʼ wò e viwìr ki dzə̀ kiné kí? Yii bèy, á kù wíy səʼə́r wò e nsay, vèn à vicí veé Eden vi, e tsənsí aàŋkfəə́ wòŋ. À wíy a neŋ e wír ve á méŋ Nyùyí mvəm, e nsàn wìr ve vé‑eè yuyrin é kwaʼ rər. Á kinyo ke kí wíy koóy Farao wùn à mànjòŋ və.› Suuy NYÙY TÀR woo Taà Ndzə.»