Read Lamnso Esiker 32 Bible Online

Esiker 32 - Lamnso bible

Esiker 32

¹Yì‑iì dzə̀ é kishiíy ké mbìy ki, e ŋwee wo wú‑uù meen ji nshòv sibaà e ghvə̀m, e kiya ke kí‑iì sí mee ji nshòv sibaà e ghvə̀m, mo vèr‑iì siìn é kwaʼ nsàm, NYÙY TÀR lò, e sùŋnín e mò.

²Wù yòŋ jii, «Wàn wìr msòŋ, màʼ lúŋ kpuu, a dìy, a taŋ Farao woo fon woó Ejiv sho, a yòŋ jii: « ‹À lì kitú ké ji bvərə̀ʼ e vitúm ví nsàn, yii bèy, aà dzə̀ kigàgǎʼsòŋ é rìbà ndzə̀v. À wur ndzə́v yé fo à dzə́, tov kishaʼàr e wuú yée, a ndzə́v sí tsəʼə̀mè.›

³Mo woo NYÙY TÀR kú a suúy jii, ‹M wíy baʼtí màŋgòŋ, aá saŋri lálán wom e wò kitu, saŋrì, aá səŋ wò, e fə̀ə́r fo ndzəv.

⁴M wíy yiì, aá maʼay wò e kwaʼ, é dzə́n yée wáa neŋ e ntìntìn kwaʼ tèéter. M wíy banén menə́n medzə̀m, é mè sə́sín e wò kitu, e banén nyám seé kwaʼ sidzə̀m, é sí wáa bvəʼ dzə́n yé.

⁵M wíy sàŋrì vintín vé aàŋkoŋ, é kibér ke wùn kí sə́tí viwoóy.

⁶M wíy leér mensə́ mè e nsay, é mè leém, e dù, e tsə̀y wún áàŋkoŋ. Mè wíy leém, e run mbuŋ se ndzəv sidzə̀m.

⁷M wíy laàr wò, e sùm yúv, é la mejiy mè yòʼ a ban. M wíy sùm shúy e mbàʼ, e yiì, é la ŋwee yòʼ a ban.

⁸M wíy ndzəmér vifá ve ví yii bán e yuv vidzə̀m, é ndzə sə́n e wò kitu, e làŋsìn. M wíy màʼ ndzə nsəənè e wò wòŋ.› Suuy mo woo NYÙY TÀR woo Taà Ndzə.

⁹«M wíy laàr wò, lóo sàmèr sáʼka, wù lóo dù vitúm vinín, vitúm ve bó à yòʼ fə̀m‑eè lò kìíy, é kindzə́m kí wáa gwàr áwune, aá wáa tùʼtìn.

¹⁰M wíy yiì, é vitúm vinín vi wáa leéy wò, a ker kindzə́m, áàfon véví wáa leéy wò, a fàn, a yàʼ. Lóo dzə e kishiíy ke à mayì, vitúm vi lóo yen, a m bavìr nyùy rə̀r yem, aá wáa yàʼ fó fó, a wìr fan a dzə̀ dzəʼə̀m rə́.»

¹¹Rúrú, ke NYÙY TÀR woo Taà Ndzə kù suuy e fòn woó Ejiv ki dzə̀ jii: «Nyùy rə̀r fòn woó Babilon wíy səy e wò kitu.

¹²M wíy way mànjòŋ wò aàntaví wo, aá tee e nyùy rə̀r. Antav, a dzə̀ vé tàkìŋàʼa e shaà vitúm vidzə̀m. Á wíy səyír kóy Ejiv e nsay, é màŋgòŋ wov ŋeémé, e lày e dzə̀m.

¹³M wíy laàr ŋgoo se nyàm fo ghaŋ se ndzəv sidzə̀m, a bó kiwuú ké wìr ki yòʼ kfə̀n dzəə́ wìy a tsə̀ʼ ndzə́v, a bó ké nyàm ki yòʼ wíy a dzə ké a tòv.

¹⁴M wíy yiì, é ndzə́v seé Ejiv si kú a raané raanén, a leŋ, a tokír moo meŋgvə́r me oliv.[41] Suuy mo woo NYÙY TÀR woo Taà Ndzə.

¹⁵M wíy yiì, é woŋ Ejivi kfə́n é vifə̀m, e kfə̀n sòr kifá kee fó kidzə̀m, e yuyrí wir dzə̀m fo fo, é wír vee fóo nèn kìíy ji m dzə̀ á NYÙY TÀR.»

¹⁶Á lúŋ kpu wo á wíy a yòv, a dìy. Kù wíy a yòv vikìy veé vitum vímóʼ ví, a taŋ Ejiv sho wùn à mànjòŋ wov. Suuy NYÙY TÀR woo Taà Ndzə.

¹⁷Yì‑iì dzə̀ é kishiíy kee nshòv sitàn e ghvə̀m, e ŋwee woo nshòv sibaà e ghvə̀m,[42] e kiya ke kí‑iì sí mee ji nshòv sibaà e ghvə̀m, mo vèr‑iì siìn é kwaʼ nsàm, NYÙY TÀR lò, e sùŋnín e mò.

¹⁸Wù‑uù yòŋ jii, «Wàn wìr msòŋ, á dìy màŋgòŋ woó Ejiv, a taŋ, a tsəəné, aá du áàŋkfəə́ wòŋ, é wùn à vitúm ve tavkín vímóʼ ví tátí wír ve á siìn fó.

¹⁹Ku yòŋ e wír veé Ejivi jii: « ‹Vèn yén ji vèn bòŋ, e shaà vitúm vímóʼ ví a? Vèn sə́y ri aàŋkfəə́ wòŋ, a neŋ vèn à wír ve á yòʼ kiìn Nyùyi.›

²⁰«Rúrú, wír veé Ejivi wíy kpukír e mvə̀m ŋgoo ye á wíy a yuyrí e kwaʼ rər. Á lèm ne Ejiv ji á kpú yé rər. Á ku sə̀ŋ wùn à mànjòŋ wov, é kpúu li.

²¹Aŋgàa saʼ ve ghaʼtín ve vé‑eè siìn áàŋkfəə́ wòŋe yíi a te lám e Ejiv wùn aàŋgàa ntom vəə́ wùn, a yòŋ jii, ‹Áwune kaày ne, a neŋ e wír ve á méŋ Nyùyí nsàn. Wír, a vé‑eè yùyrí é shùu rər.›

²²«Wír veé Assiriyàa kù sì fó wùn à mànjòŋ wov aáwuné sày si, e kaàrí fó, e tàr, aá ku kpù yé rər adzə̀m.

²³Say se wìr veé Assiriya si kù dzə̀ é loònsay, e buu, kwaʼda, a sé mànjòŋ wov sí kaárí fó, e tàr. Vé‑eè yùyrí áwune adzə̀m e shùu rər, a vé‑eè dzə́ sho atin, ghán, bémer wíri.

²⁴«Kitúm kee Elam ki kù dzə̀ sá fo, wùn à mànjòŋ və aáwuné sày si, e kaàrí fó, e tàr, aá kpú yé rər adzə̀m, e kaày aàŋkfəə́ wòŋ, a dzə̀ wír, a bó á yòʼ‑oò kì Nyùy. Vé‑eè lo fo mbìy, á wàa bemér wíri, lèn, áwune tàtí ne wír ve á dzəə̀n é loònsay, a beʼ woómé se wìr ve á kpuun yé rər.

²⁵Vé‑eè fèr kirə́ʼ ke wír veé Elame wáa neŋ sho e sày, e wír ve á kpuun yé rərí nsàn, a say se mànjòŋ Elam si kaárí fó, e tàr. Wìr dzə̀m kù‑uù dzə̀, a bó á yòʼ kì Nyùy, e kpù yé rər adzə̀m. Vé‑eè dzə́ sho, ghán, bémer wíri, lèn, á néŋ e loònsay, béʼ woómé e wír ve vé‑eè kpuun é shùu rərí nsàn.

²⁶«Kitúm kee Meshek wùn à Tubal ki kù sì fó wùn à mànjòŋ wov aáwuné sày si, e kaàrí fó, e tàr. Wìr dzə̀m kù‑uù dzə̀, a bó á yòʼ‑oò kì Nyùy, e kpù yé rər adzə̀m, a vé‑eè dzə́ sho atin, ghán, bémer wíri.

²⁷Bó áwune yòʼ néŋ kév áàŋkfəə́ wòŋ aàntav vee fó ŋgùʼú nsàn gheéy. Vee shooyi‑iì kpùkír, e sə̀y áàŋkfəə́ wòŋ wùn à vifá vév vé rər ví. Vé‑eè lóo dzəə̀mè áwune, á neèr kitú kév é nyùy rə̀r, e neèr aŋkeè vév aáwuné kitu. Vé‑eè yii sho bèy, bìʼ fo antav vìne‑eè dzə́ atin, a wìr dzə̀m leey, fanè.

²⁸Farao, kù dzə̀ sá mo á wíy bvəʼə́y wò, áà wáa neŋ e wír ve á yòʼ kiìn Nyùyí nsàn, wír ve á yuyrin é kwaʼ rər.

²⁹«Wír veé Edom wùn aàfon véví, à vé wòŋe dzə̀ sá fo. Fə̀m mo áwune tavkin é ŋàŋ, á kù néŋ sa fo e wír ve vé‑eè yuyrin e nyùy rə̀rí nsàn. Áwune kù néŋ wùn à wír ve vé‑eè meŋen Nyùy, e sə̀y áàŋkfəə́ wòŋ.

³⁰«Atǎr saʼ veé wòŋ se kùyi kù dzə̀ fó adzə̀m, e lì wír veé Sidon. Áwune dù ne aàŋkfəə́ wòŋ, e woómé sí si, bìʼ bémér ye vé‑eè bémer wíri e rə́r sí. Kù dzə̀ wír ve vé‑eè méŋ Nyùy, aá néŋ lèn e wír ve vé‑eè yuyrin é kwaʼ rərí nsàn, á dù aàŋkfəə́ wòŋ, e woómé sí si.

³¹«Farao wùn à mànjòŋ və wíy yen wír vìn, é shilív shé Farao shi rəsin ji bó yòʼ jòʼ a wun wo vé‑eè laàrìn mànjòŋ və e dzə̀m. Suuy mo woo NYÙY TÀR woo Taà Ndzə.

³²Fə̀m mo yì‑iì bayirin mo Farao, wù wáa ghan e ndzə, a bemér wíri, á kù wíy lèm wùn à mànjòŋ və é sày, aá wáa neŋ e wír ve á méŋ Nyùyí nsàn, wír, a vé‑eè yùyrí é kwaʼ rər. Suuy mo woo NYÙY TÀR woo Taà Ndzə.»