Read Lamnso Esiker 33 Bible Online

Esiker 33 - Lamnso bible

Esiker 33

¹NYÙY TÀR‑iì lò, e sùŋnín e mò, e sùúy jii,

²«Wàn wìr msòŋ, suúy e wír véné jii, ‹A m bàʼtí rə́r, e kìʼ kitúm kímóʼ kí shó, bo a dzə̀ wír vee fóo nèn lèm wír wov wùmòʼ ji ŋkiy wo wù wáa kiy woŋ wóv.

³Aá lèm, wù lo, e yèn a rə́r sí wiyì, e tòŋ sóŋ yée yìmrì wíri,

⁴wìr yú sóŋ yee shooy, e ŋwày ŋwáyín, e kpù yé rər, bo njò rə kpu kù dzə̀ e wun kiwo.

⁵Mo wù kì yuun sóŋ ye á toŋen, e bóo ŋway, bo njò kpu rə kù dzə̀ rə́ə. A dzə̀ ji wù kì yù sóŋ, e làa yòʼ ŋway, bo wù kì bàvtí dzəʼə̀m rə́.

⁶Yii bèy, a ŋgaà ŋkiy yèn, a rə́r sí wiyì, e tèn fóo toŋ sóŋ ye yí yimri wíri, rə́r sí lo, e ghìʼ wíri ghíʼín, wìr kpú é kimbùmmbúm, bo njò kpu rə kfə́n e ŋgaà ŋkiy kitu, fə̀m mo ŋwèrín kpuun bìʼ vinyo və́ ve bi ví.›

⁷«Ké lèn ki, wàn wìr msòŋ, m lèm ne wò ji ŋgaà ŋkiy wìr veé Isray. Aà yù kinyo fo mǒ shuù ji à kanti wír vìn sho, à kù nèn kàntì bèy.

⁸A m tùm wò ji à yoŋ e wìr liì kisaŋ ji wù kù waà kpú, à tén ntum yem, e làa yòʼ kàntì ŋgaàŋ ji wù maʼti á yíi kisaŋe, e fíʼ bòy, bo ŋgaà liì kisaŋ və̀n yíi kpu bìʼ vinyo və́ ve bi ví, yii bèy, é li wò njò kpu rə́.

⁹Á bèy, aà kàntì wir liì kisaŋ, la wù yòʼ bìn ndzə̀m e wun dzəə sé kisaŋ si, bo wù kù‑úù kpú bìʼ vinyo və́ ve bi ví, yii bèy, áà boy fó njò, e bavtí dzəʼə̀m yé.

¹⁰«Wàn wìr msòŋ, suúy e wír veé Israyi ji vèn lo, kù goʼ jii, ‹Njò yer wùn à lòn wórí dzə̀ e věr kitu, nèn reŋèr ver, bo a dzə̀ vèr lùŋ é le?›

¹¹Ku sùúy aáwune ji mo woo NYÙY TÀR woo Taà Ndzə, mo m dzəə̀n shó e tin, bó m yòʼ diy ji wìr liì kisaŋ kpú á kpuún. Ke m diy ki dzə̀ ji wù bin á ndzə̀m é vinyò ve wù buʼtì, e lùŋ. Abaày, wír veé Isray, vèn kóŋ e kpu bèn ji ka? Vèn maʼti liì kisaŋ, vèn ku màʼtì.

¹²Á bèy, wàn wìr msòŋ, ku sùúy e wír vée jii, ‹Wìr woo réŋ binkìr, lóo yiì vinyo ve kisaŋ vi, bo yii yee réŋ ye wù‑uù yíi yòʼ wíy sə wun. Kù dzə̀ sá réŋréŋ mo a wìr liì kisaŋ bìn ndzə̀m é liì kisaŋ, bo vinyo ve kisaŋ ve wù‑uù yii vi yòʼ wíy yuyrí wun. Wìr woo réŋ wo wù loòn, a yiì vinyo ve bi ví yòʼ wíy gòʼ bìʼ vinyo vee réŋ ve wù‑uù rə́si yii.

¹³A m lòo dzə, e sùúy e wìr woo réŋ ji wù kù yíi a dzə e tin, wù kú a koʼór wún bìʼ vinyo vee réŋ ve wù‑uù rə́si yii, e nèn lò, a bùʼtì vinyo, bo m yòʼ kfə̀n dzəə́ yiì a kuumé njiìn və woo réŋ. Wù kù yíi kpu bìʼ vinyo ve wù buʼtì.

¹⁴Kí nen kfə̀n a dzə jii, a m lò, e yòŋ e wìr liì kisaŋ ji wù waà kù yíi kpu, wù bin ndzə̀m é vinyò ve bi ví, a yiì vinyo vee tìítiy, a ker yii yee réŋ, a dzə̀ jii,

¹⁵a wù siìr kifá ke wìr tiirin e wun, e sə̀ mbàm, e kfə̀n siìr kifá ke shoŋén kí, a tiír kiwuú mo sáʼ yém ye wìr jumrì, wù lùŋé dzəə̀n, e làa yòʼ a bùʼtì vinyo, bo wù kù yíi a dzə sho e tin. Bo wù yòʼ‑óò kpú.

¹⁶Á yòʼ kfə̀n dzəə́ wìy a kuumé vinyo və́ ve bi ve wù‑uù buʼtì, a kiv njò rə. Wù sí yii lèn vinyo vee tìítiy, kér yii yee réŋ, a wù kù yíi a dzə sho e tin.›

¹⁷Yii bèy, a wír vée kù goʼ jii, ‹Bó NYÙY TÀR yòʼ yii réŋ, a kù yii áwune vinyo kintéŋ.›

¹⁸Kí dzə̀ jii, a wìr woo réŋ bìn ndzə̀m é yiì yee réŋ ye wù‑uù yii, e lò, a bùʼtì vinyo, bo wù kù yíi kpu bìʼ vinyo ve wù buʼtì.

¹⁹Mbùʼtìvìnyò bin ndzə̀m é vinyò ve wù buʼtì, a yiì vinyo vee tìítiy, a ker yii yee réŋé, bo wù bòy ne fo kpu bìʼ vinyo vee réŋ ve wù sí yii.

²⁰Ven vee wír veé Isray, vèn ló kén fó fo, a gòʼ jii, ‹NYÙY TÀR yòʼ yii réŋ.› Yii bèy, m kù wíy saʼ wir dzə̀m a dzə̀ mo njiìn ŋgaàŋ dzəə̀n.»

²¹Yì‑iì dzə̀ é kishiíy kee tàn, e ŋwee woo ghvə̀m, e kiya ke kí‑iì sí mee ji nshòv sibaà e ghvə̀m, mo vèr‑iì siìn é kwaʼ nsàm, wìr wùmòʼ léʼ fó Jerusalem, e wìy, e tiìsí e mò ji ŋkàlaʼ gbù a ne.

²²Yì‑iì dzə̀ e ŋkuùr wóo ransí e kishiíy fóo fèy, a kiwó ke NYÙY TÀR kí kúm mo, shuu wómé mvə́ʼə́m, é bo wìr və̀n wáa wìy kijàvndzə. Wù wáa wìy, a shuu wómé mvə́ʼə́m ne, a bó m yòʼ dzə̀ə́ kindzə̀mer.

²³NYÙY TÀR kfən lò, e sùŋnín e mò, e sùúy jii,

²⁴«Wàn wìr msòŋ, wír ve á berin é vifə̀m veé Israyi kù goʼ jii, ‹Abraham‑eè dzə́ wùn mòʼón, yii bèy, a Nyùy‑iì fò nsay sho ji rə́ə, vèr wáa dzə wír nyanyày, bo nsay rə̀n kù‑uù sì yéer.›

²⁵Kí nén a dzə ji à ku sùúy aáwune á ji ke suuy mo woo NYÙY TÀR woo Taà Ndzə ki dzə̀ á jii, ‹Vèn kfə́r nyám e mensə́ mè sho,[43] ghvə́m mebvə̀m men, yúyri wíri, bo kù yòʼ dzə̀ vèn yòv nsay rə̀n a?

²⁶Vèn ŋeʼrì gheéy, á laàr wír, ghán, yii vinyo ve joònè ví, a wìr mòʼón mòʼón li wiíy wìr, bo kù yòʼ dzə̀ rú vèn yòv nsay rə̀n a?›

²⁷Yòŋ aáwune ji ke suuy mo woo NYÙY TÀR woo Taà Ndzə ki dzə̀ á jii, ‹Mo m dzəə̀n shó e tin, e ké ru kí, wír ve á dzə́ e vimgbù ve laʼa wíy kpu yé rər. Ké wìr ve á dzəə̀n é kwaʼ e ŋgèŋgèr, é m fó, é koosàʼ saʼ, é ve á duùn áàŋkoŋ, a lìr e mbvə̀ʼ sií kpú yé kifə̀ʼ.

²⁸Á bèy, é m nèn siìr woŋ wóv, é wú buy, e dù e vifə̀m, é kiŋkoʼòrwùn kév kee ji á dzə̀ á kitúm ke tavín kií may. Aàgwan veé Israyi wíy dù e kinshaàrì ke bó wìr yòʼ dzəə́ shaa fo.›

²⁹M siir woŋ wóv, wú buy, dù e vifə̀m bìʼ joonè wóv e dzə̀m wo áwune yiìn, aá nèn kìíy ji m dzə̀ á NYÙY TÀR.

³⁰«Wàn wìr msòŋ, kee bìʼ wò, wír vée lo, á wàa ŋèʼrì gheéy, a yòŋ wò, aá tíynin e ghaŋ se kày seé ŋkàlaʼ, kìn á dzə́ e shuù se melav, a wìr bí fə́r və jii, á wìy, é wòsò yú kinyo ke NYÙY TÀR suuyin lán.

³¹Áwune lo, á wìy, e yèn wò mo wìr yii du fo wìr wùn. Wiyì, á dzə̀ʼə̀m e wò si moo wír vém, a yuurí kinyo ké, a bó á yòʼ yíi yiì kinyo ke à suuyì. Lám wóví kù dzə̀ wó kinjàŋ.[44]

³²Yén ri, à dzə̀ ké fo áwune moo wír wo wù yov luŋ se kinjàŋ[45] e jì ye juujùŋ, kum kifá ke yòv kijuŋ. Áwune yú kinyo ke à suuyì, yii bèy, a bó á yòʼ yíi yiì.

³³Wíy lòo dzə, a kí sì mo wò‑oò tiísi, a kí kù yíi koóy rú, é bo áwune kiíy ji *ŋgaà ntum Nyùy‑iì ló a dzə rú á aáwuné mvəm.»