Read Lamnso Esiker 35 Bible Online

Esiker 35 - Lamnso bible

Esiker 35

¹NYÙY TÀR nèn lò, e sùŋnín e mò, e sùúy jii,

²«Wàn wìr msòŋ, kìʼ Gwan Seir, e tìn kàʼ wìr veé Edom.

³Yòŋ ji ke NYÙY TÀR woo Taà Ndzə suuy ki dzə̀ á jii, « ‹Wír veé Gwan Seir, m ban woŋ wón, a m yíi màʼ kiwó kém shó, e laàr, é fóo lay.

⁴M wíy sàʼ ŋkà se laʼ sén, é woŋ wóné kfə́n ji vifə̀m, Á bèy, é vèn nèn kìíy ji m dzə̀ á NYÙY TÀR.›

⁵«Vèn kù‑uù sí ban wír veé Isray, e kèʼ fo yàŋgùʼ, wáa dzə e kishiíy ke NYÙY TÀR‑iì kfə̀tìn ŋgeʼ aáwuné kitu, vèn ló fó fo, a dìn áwune, aŋgaà vév vibàné wáa yuyrí.

⁶Kí nén a dzə jii, mo m dzəə̀n NYÙY TÀR, a dzə sho e tin, ke suuy mo kí dzə̀ jii, ‹M yíi fo ven, é vèn kpú yé mensəə, é mensə́ mè wáa ròn wúu yén. Mensə́ mè wíy a ròn wúu yén, bìʼ fo vèn gbuùn njò mensə.

⁷Rúrú, m wíy siìr Gwan Seir ji làykìsáŋ kirə̀ʼ, é wù du é vifə̀m, e laàr wir dzə̀m wo wù‑uù shaa fo.

⁸M wíy sətí agwan vén e dzə́n sé wìr ve á yuyrin é kwaʼ rər sí. Dzə́n sé wìr ve á kpuun sí wíy sətí aŋkoŋ vén, e sətí viwoóy, e sətí ŋguùŋè si.

⁹M wíy siìr woŋ wón é kinshaàrì kee là may, é ŋkà se laʼ sén sí kfə́n é vifə̀m.› Á bèy, é vèn nèn kìíy ji m dzə̀ á NYÙY TÀR.

¹⁰«Vèn‑eè suuy ji vitúm vee vibaà vee Isray wùn Juda vìn vi dzə̀, a vèn waà kù wíy yòv, suuy bèy, a vitúm vìn vi dzə̀ vém, mo woo NYÙY TÀR.

¹¹Bìʼ bey, rúrú, mo m dzəə̀n shó e tin, mo woo NYÙY TÀR woo Taà Ndzə, bo m yíi lovtí e vèn réŋréŋ mo vèn‑eè gheʼ wír vém, din dòʼshwíiy won aáwune, e kù lóvti mo vibàn ve vèn‑eè ban áwune ví‑iì dzəə̀n. Á bèy, m wíy màʼ ŋgeʼ e věn kitu, é wír vémé nèn kìíy ji m dzə̀ á aáwuné mvəm.

¹²Fo kén kí, vèn wíy kiíy ji mo woo NYÙY TÀR‑iì lo yù á lám wo vèn‑eè té ji agwan veé Israyi sì á vifə̀m. Té bèy, suuy jii, ‹Á shwèy ne e vèr ji vèr wàá mey.

¹³Vèn‑eè kóʼninè, yoŋ vinyo fo shuù kùm mo, keŋ mo, táŋri vinyo, tónenè, a m kù yú.›

¹⁴«Ke mo woo NYÙY TÀR woo Taà Ndzə suuy ki dzə̀ jii, ‹M wíy laàr ven, e siìr e vifə̀m, é wìr dzə̀m woó kitu ke nsay wáa màʼ kinseŋ.

¹⁵Mo vèn‑eè shéʼri ji woŋ Israyi sì vifə̀m, bo m yíi siìr ŋkfə́tír e věn kitu. Woŋ wóné wíy kfən e vifə̀m, Gwan Seir, a dzə̀ ji woŋ Edom e dzə̀m. Á bèy, é wíri nèn kìíy ji m dzə̀ á NYÙY TÀR.› »