Read Lamnso Esiker 36 Bible Online

Esiker 36 - Lamnso bible

Esiker 36

¹NYÙY TÀR yòŋ jii, «Wàn wìr msòŋ, tiísí kinyo ki áàgwan veé Israyi, e sùúy jii, ven vee agwan veé Isray, vèn yuúrí kinyo ke NYÙY TÀR suuy ki.

²Ke NYÙY TÀR woo Taà Ndzə suuy ki dzə̀ jii, ‹Aŋgàa vibàné‑eè séŋ nsiì e věn kitu, bínsi jii, ə̀həə, ə̀həə, aŋkoŋ veé yàŋgùʼú sì vér.›

³«Á bèy wàn wìr msòŋ, ku tiìsí kinyo ki, e sùúy ji ke NYÙY TÀR woo Taà Ndzə suuy ki dzə̀ á jii, ‹Vitúm vìn vi‑iì tòn woŋ agwan woó Isray, e sòr, wú nén a dzə kéŋ vitum veé ndzə, wìr dzə̀m lí é vitu ve sòŋ ji kimfèr kév.

⁴Á bèy agwan veé Isray, vèn yuúrí kinyo ke mo woo NYÙY TÀR woo Taà Ndzə suuy ki. M yoŋ aàgwane, yoŋ aàŋkoŋe, yoŋ e viwoóy ví, yoŋ e ŋkà se laʼ se siìn vifə̀m si, a sí kfə́n ne ji kiyínsam ké vitum ve ví kaarin woŋ wón, e tàr.›

⁵Ke mo woo NYÙY TÀR woo Taà Ndzə suuy ki dzə̀ jii, ‹Rúrú, m sùŋnín ne, e kàntì vitúm ve ví‑iì nəən ven, e sùŋnín e Edom e dzə̀m, a kòʼ dòʼshwíiy wom é ŋàŋ. Wù kòʼ bey, bìʼ fo áwune‑eè kaarin, e faàsì nsay yem, a sheʼ, a kèŋ ji áwune kòóy ne a nsàʼmboʼ wov, a sì á kwáʼ wóv nyàm.›

⁶«Kí nén a dzə jii, wàn wìr msòŋ, tiísí ri kùm nsay Isray. Suúy áàgwane wùn aàŋkoŋe, suúy sá e viwoóy ví ji NYÙY TÀR suuy a jii, ‹M súŋnin, a dòʼshwíiy wom kóʼ bèn, bìʼ fo woŋ wóm wo m kíyríi dzə̀, a vitúm vi shòór ne e ŋàŋ.›

⁷Kí nén a dzə ji mo woo NYÙY TÀR woo Taà Ndzə suuy a jii, ‹Á kù wíy lò, e shoór vitúm ve ví kaarin Isray, e tàr, é ví wáa beʼ woómé.› M sùúy ne bèn, e lìʼ.

⁸Yii bèy, agwan veé Israyi kfə̀n wíy tokír, e fətí tám si, é sí koóm, a yiír ven veé Isray vee wír vém. Kí dzə̀ jii, vèn kù‑úù lo, e kfə̀n é bàm e věn wòŋ.

⁹Rúrú, m dzə̀ vèsən, a m yíi bìnkìr, e kìʼ ven ye dzə̀ á lìm nsay yen, e wày kifá sho.

¹⁰M wíy dzə̀sì wír vén, é vèn wáa dzə nyanyày, rám seé Isray sidzə̀m. Vèn kfə̀n wíy a shiíy e věn ŋkà se laʼ, a bàʼrì virə́ʼ ve ví‑iì gbuùn vidzə̀m.

¹¹M wíy səə̀vì kidzəə́y kén, e səə̀vì ké nyàm si, é wíri wùn à nyám si wáa kùʼ. M wíy yiì, é woŋ wóné kfə́n fó mo wú‑uù dzəə̀n fó mbìy, e way ven é vijùŋ ve ví shaa ve ví‑iì siìn. Á bèy, é vèn nèn kìíy ji m dzə̀ á NYÙY TÀR.

¹²Wír vém veé Isray, m wíy siìr ven e věn nsay, é vèn wáa dzə fo, a ker ji nsay yen, a bó yì yòʼ dzəə́ wìy a laàr wón fo věn koy.

¹³«Mo woo NYÙY TÀR woo Taà Ndzə suuy jii, ‹Kí dzə̀ rú ji wíri yoŋ a jii, nsay Isray laar wíri, kuuy kiŋgoòy.

¹⁴Á bèy, e kèʼ fo lèn, yì yòʼ kfə̀n dzəə́ wìy a laàr wíri, a yì yòʼ kfə̀n dzəə́ wìy a kìvrì kiŋgoòy.› Suuy mo woo NYÙY TÀR woo Taà Ndzə.

¹⁵Bó vèn yòʼ dzəə́ wìy a yu a vitúm vi jaʼ woŋ wón, a bó vèn yòʼ dzəə́ wìy a leéy woŋ wón, a woomé. Bó woŋ wóné yòʼ kfə̀n dzəə́ wìy a màʼ ven. Suuy mo woo NYÙY TÀR.»

¹⁶NYÙY TÀR kfən lò, e sùŋnín e mò, e sùúy jii,

¹⁷«Wàn wìr msòŋ, wír veé Israyi‑iì dzə́ aáwuné nsay, e lò bìvír nsay yev e njiìn wov, yì kfə́n ji kifá ke *kifàn kí. Liì wov‑iì kóʼoy mo, aá dzə́ e mǒ si moo wiíy wo wù yenen ghán sə́, a dzə e kifàn kí wùn.[46]

¹⁸M nèn màʼ ŋgeʼ aáwuné wùn mo dòʼshwíiy wom‑eè dzəə̀n, bìʼ nsay yev ye vé‑eè bivirin e kinjuyrì ki, e bìvír e mebvə̀m me vé‑eè ghvə́m mè.

¹⁹Á bèy, m nèn lòvtí aáwune mo liì wov wùn à yii yéví‑iì dzəə̀n, e tàʼár áwune e vitúm ví mvəm, áwune sáŋrí woŋ e dzə̀m.

²⁰Á du e kitum, a fə̀m‑eè dzə̀ feé, á shòór yír yém ye ranéné, wíri wàa ghaynín jii, wír vìne‑eè dzə̀ wír NYÙY TÀR, yii bèy, e kù siì fəə̀ fo wun nsay.

²¹M kú a ker shií e mǒ yir ye ranéné, ye wír veé Israyi‑iì shoorin é virə̀ʼ fo vé‑eè dùkìn é vitum.

²²«Kí nén a dzə jii, suúy ri e wír veé Israyi ji NYÙY TÀR woo Taà Ndzə yoŋ a jii, ‹Wír veé Isray, m kù lo, e sham ven, a bó m yòʼ yii bèn a dzə̀ bìʼ shíi won. M kù diy a dzə̀ yír yém ye ranéné ye vèn shoorin é virə̀ʼ fo vèn‑eè duùn, a dzə e vitum.

²³M yíi siìr vikuʼùy vé yir yém fó, e dìn ji m dzə̀ á e ránén ji Nyùy, a m dzə̀ e gháʼtín. Vèn‑eè shòór yír yém e vitúm ví mvəm, yí bír, a m kù yíi lì a dzə̀ ven, e dìn e vitúm vi ji m dzə̀ á e ránén. Á bèy, aáwune nèn kìíy ji m dzə̀ á NYÙY TÀR.› Kù suuy mo woo NYÙY TÀR woo Taà Ndzə.

²⁴«Kí dzə̀ jii, m wíy baʼtí ven fó virə̀ʼ, e fəə́r fo vitúm ví mvəm, e lì ven, e dù sho e yéen yee nsay.

²⁵M wíy tsəm shindzə́v she ranén shí e věn wùn, é vèn rán fó kifàn ke vèn‑eè liìn bìʼ vinyo vidzə̀m ve vèn‑eè lorin vitú vén shó. Vèn wíy ran fo kifàn ke vèn‑eè ghvəmen mebvə̀m, e lì.

²⁶M wíy fo ven shilív she fíy shi, e way kiyoy ke fíy ki e věn wùn. M wíy fəə́r shilív shén she shí táv moo tíy, e fo shilív she shí boóri e vèn.

²⁷M wíy fo kiyoy kém e vèn, e yiì, é vèn wáa yu sáʼ yém, a tiír kiwuú mo yí dzəə̀n, e bó a yiì kinyo ke m tínen kidzə̀m.

²⁸Vèn kù wíy a dzə e nsay ye mò‑oò foon áàtàr véné, a dzə wír vém, é m wáa dzə Nyùy won.

²⁹M wíy a kìŋsìn ven fó vinyò ve dzə̀ ví yiì vèn lì kifàn, a m kfə̀n wíy màʼ vifá ve yi, é ví wáa tsəə̀tìn, é vèn boy fó jiŋ.

³⁰M wíy yiì, é vicí veé sum ví koóm, a tsəə̀tìn, é nsay fəə́r viyíkìr nyanyày, é la vèn yòʼ dzəə wìy a tooŋé jíŋ, é vitúm vi wáa jàʼ ven.

³¹M yii bèy, é vèn nèn kuùmé vinyo vén ve bi ví, e kuùmé njiìn won wo bó wù yòʼ‑oò lo bòŋ. Vèn kuúme bèy, é vèn nèn a woomé bìʼ vinyo ve vèn‑eè bùʼtìn, à joonè wo vèn‑eè yiìné.

³²Vèn ku nèn a kiíy jii, m yòʼ wíy a sham ven a dzə̀ bìʼ shií won gheéy, Isray. Vèn səəm kee shooy ki. Suuy mo woo NYÙY TÀR woo Taà Ndzə. Éè wìr veé Isray, vèn wáa woomé, a ker dzə̀rkìtu, bìʼ liì won kisaŋ.»

³³Ke NYÙY TÀR woo Taà Ndzə suuy ki dzə̀ jii, «Wíy lòo dzə e ghan se m suùn ven fo věn vinyò ve bi ví, é m yii, é vèn kfə́n, a shiíy e věn ŋkà se laʼ, a bàʼrì virə́ʼ ve ví‑iì gbuùn vidzə̀m.

³⁴Á kfə̀n wíy lìm nsay yè ye yì‑iì siìn kinshaàrì, é la yì yòʼ dzə́ə a tiy e kinshaàrì ke anshaàdzə̀ə́‑əə̀ shaa, yéné.

³⁵Á wíy a shaà, a ghay wún jii, ku yèn kirə́ʼ ke yì‑iì siìn kinshaàrì ki, lèn, a kí sì moo kiboó keé Eden. Ŋkà se laʼ si‑iì sàʼkìr, e dù e vifə̀m, lèn, a sì vikum ve ŋkà se laʼ, a wíri ŋeʼ fo ŋéʼen.

³⁶Vitúm ve ví‑iì tosin rə́r, e bèr e věn ghaŋ vi wíy yen bèy, e kiíy ji bàʼrì a mo vifə̀m vén vé laʼ, lím á mo virə́ʼ vén ve ví‑iì shaàrìn ne. Mo woo NYÙY TÀR, m yòŋ ne, a m wíy yiì.»

³⁷Ke NYÙY TÀR woo Taà Ndzə suuy ki dzə̀ jii, «M kfə̀n wíy a yuurí bunrì wìr veé Isray, aá kuʼ, a dzə nyanyày moo ŋgoo se bvəy.

³⁸M wíy siìr ŋkà se laʼ sév, é wíri rún shó, a dzə mo ŋgoo se bvəy si lo, sí rùn é ŋkàlaʼ Jerusalem e ghan se á kér viŋkàʼ vee shó. Aáwune nèn kìíy ji m dzə̀ á NYÙY TÀR.»