Read Lamnso Esiker 37 Bible Online

Esiker 37 - Lamnso bible

Esiker 37

¹NYÙY TÀR‑iì màʼ kiwó kfə́ e mǒ wùn, m yú vitaáví və́, Kiyoy kfə́ kí lì mo, e dù sho e kirə̀ʼ a dzə̀ mboʼ, a vinjúm ve vighvər ví néŋ fo, fó e dzə̀m.

²Wù yiì, m ghán é mvəm wó, e kaàrí, e tàr, e yèn, a fóo kù dzə̀ vighvə́r vighvə́r, a ví yúm ne ji ŋkěŋ.

³Wù nèn dzə̀r e mò jii, «Wàn wìr msòŋ, a dzə̀ vighvə́r vin vi kfə̀n a ŋèʼ a?» M bìnèr jii, «Nyaa mǒ NYÙY TÀR woo Taà Ndzə, kù dzə̀ kìíy wò.»

⁴NYÙY TÀR kfən siì yòŋ mo, e sùúy jii, «Súŋnín e vighvə́r vin vi, e sùúy jii, ‹Ven vee vinjúm ve vighvər, vèn yú kinyo ke NYÙY TÀR suuy ki.

⁵Ke NYÙY TÀR woo Taà Ndzə suuy ki dzə̀ á jii, vinjúm ve vighvər, m lo, e yiì, é kiyoy ki nəə́ ven, é vèn kfə́n a ŋèʼ.

⁶M yíi bàʼrì gháŋ e věn vinsəʼ, e way jáv e věn wùn, e yiì, é jùv sə́tí wún. M yii bèy, é m wáy kiyoy e věn wùn, é vèn kfə́n a dzə atin. Á bèy, é vèn nèn kìíy ji m dzə̀ á NYÙY TÀR.› »

⁷M ku nèn tiìsí mo NYÙY TÀR‑iì suuyin. Mo m tiísi, e lò, e yù, a vighvə́r ví kumsìn, e yèn, a ví siysì vitú, a kighvə́r kee shó ki lo, yuŋsìn fo kí yii dzə́.

⁸M lòo leéy, e yèn, a gháŋé báʼrí ne e vinsəʼ, jàv wáa batín, jùv nèn sə̀tí. Yii bèy, a bó kiyoy ki yòʼ‑oò ló ne nə̀ə́ sho.

⁹Wù nèn sùŋnín e mò, e sùúy jii, «Wàn wìr msòŋ, súŋnín e shwéri. Á suŋnín, a suúy kinyo ke NYÙY TÀR woo Taà Ndzə suuy ki. Wù suuy jii, ‹Shwer, wìyi, wìy buú se ndzə sidzə̀m, e yòy aàŋkfə vìné wùn, aá fiʼ kfə̀n a dzə atin, wír, a yiì teè rə́r.› »

¹⁰M ku nèn tiìsí mo mò‑oò yuun. Shwéri nèn nə̀ə́ aáwuné wùn, áwune nén a dzə atin, e ŋàʼáy, e tìím, wáa dzə màŋgòŋ nyanyày feyì.

¹¹NYÙY TÀR nèn sùúy e mò jii, «Wàn wìr msòŋ, vighvə́r viy vi kù dzə̀ ji rám wìr veé Isray e dzə̀m. Áwune kù goʼ jii, ‹Vèr sì vinjúm ve vighvər, a kér kí yòʼ kfə̀n dzə̀ə́, vèr lày ne.›

¹²Kí nén a dzə jii, tiísí kinyo ke NYÙY TÀR woo Taà Ndzə suuy ki. M suuy aáwune á jii, ‹Wìr vem, vèn yuúrí. M wíy mvə̀ʼtì say sén, e fəə́r ven fó fo.[47] Fəərì, é m li ven, e kfə̀n shó e věn wòŋ woo Isray.

¹³Wìr vem, m mvəʼtì say sén, fə́ti ven fó fo, é vèn nèn kìíy ji m dzə̀ á NYÙY TÀR.

¹⁴Feyì feyì, m wáy kiyoy kém e věn wùn, vèn lóo dzə atin, m lóo siìr ven e věn wòŋ, é vèn nèn kìíy ji mo woo NYÙY TÀR, m yòŋ a ne, e yiì.› Suuy mo woo NYÙY TÀR.»

¹⁵NYÙY TÀR kfən lò, e sùŋnín e mò, e yòŋ jii,

¹⁶«Wàn wìr msòŋ, tàʼ kicí kí, e sàŋ shó jii, ‹Rám Juda wùn à wír veé Isray ve wùn áwune dzəə̀n.› Tàʼ sá kímóʼ kí, e sàŋ e kee shooy ki jii, ‹Rám Joosev wùn à wír veé Isray ve wùn áwune dzəə̀n. Rám, a tíy kfə́ə Efrayim mbìy.›

¹⁷À sáŋ bèy, à sə̀ʼsín e wò mbvə̀ʼ kiwo, é wáa dzə ji kicí kimòʼón.

¹⁸A wír vée lò, a dzər e wò jii, ‹À yiì kinyo kìn bèn, a nsàv dzə̀ ka?›

¹⁹À bìnèr ji NYÙY TÀR woo Taà Ndzə yoŋ a jii, ‹Vèn yén, m sí lo, e lì kicí ké Joosev, a dzə̀ wír veé Efrayim wùn à rám seé Isray se wùn áwune dzəə̀n sí, e kfə̀n lì ké Juda, e səʼsín e mǒ mbvə̀ʼ kiwo, é wír vìne wáa dzə kicí kimòʼón.›

²⁰Kú a ker vicí vin vi e wò kiwo, é wíri yén, aá sáŋ ne vinyo vìn sho.

²¹Yòŋ aáwune ji ke NYÙY TÀR woo Taà Ndzə suuy ki dzə̀ á jii, ‹Vèn yú, m wíy banén wír veé Isray fo vitúm ví mvəm fo áwune dùkìn, e baʼtí mbìv sidzə̀m, e kfən sho e bàm aáwuné nsay.

²²Kfə́n sho, é m fer áwune ji kitúm kimòʼón e wòŋ agwan veé Isray, é fòn wáa dzə e mòʼón wo wù sáʼ áwune adzə̀m. Bó áwune yòʼ dzəə́ wìy a dzə vitúm vibaà jeéy jeéy, a bó á yòʼ dzəə́ wìy a ker sáʼ jeéy jeéy.

²³Áwune yòʼ dzəə́ wìy a lor vitú vév e mebvə̀m me vé‑eè ghvə́m mè, kìn e vifá ve joònè vímóʼ ví, a bó á yòʼ dzəə́ wìy a tsəy kóy vèr áwune. M wíy yiì, é la áwune yòʼ dzəə wìy a kfənrí wuú, a bùʼtì vinyo ve vé‑eè rə́si buʼtì. M yii bèy, é m *kfə́mrí áwune, aá rán fó *kifàn ke vé‑eè liìn, e nèn gheén e wìr vém, é m wáa dzə Nyùy wov.›

²⁴«Fòn wov wíy a dzə wír wo wù fəən fo Fòn Davir woo ŋgaà wom lìm ram, aá wíy a ker nshìy e mòʼón. Áwune kù wíy a tiír kiwuú, a yiì mo vinyo ve m tinen ví dzəə̀n, a ŋeèvì sáʼ yém e dzə̀m, a yiì mo yí dzəə̀n.

²⁵Áwune wíy a dzə fo atàr véví‑iì dzə́ e nsay ye mò‑oò foon e Jakov woo ŋgaà wom lìm. Áwune kù wíy a dzə fo, e wìy dù, e mày, ŋgwàʼ yìmòʼ e yìmǒʼ bàm, é wìr wo wù fəən fo Davir woo ŋgaà lìm wóm ram wìy a dzə fon wov, e wìy dù, e mày.

²⁶M wíy gwàr *mensaŋ vèr áwune mee ji á wáa ker dzəʼə̀m yee nyaáŋ, a wíy a dzə mensaŋ me mè gòʼòn ne ŋkuuŋkùŋ. M wíy yiì, aáwune tuúy é wòŋ, a dzə nyanyày, é m wìy tìír lav yem aáwuné ntìntìn, é yì goʼ fó ŋkuuŋkùŋ.

²⁷Kirə́ʼ kém ké dzə ki wíy a dzə aáwuné ntìntìn, é m wáa dzə Nyùy wov, aáwune wáa dzə wír vém.

²⁸M lèm lav yem cù aáwuné ntìntìn, yì góʼ fó ŋkuuŋkùŋ, é vitúm vi nèn kìíy ji mo woo NYÙY TÀR, m shòʼ á ne Isray jeéy ji wír vém ntayi.»