Read Lamnso Esiker 38 Bible Online

Esiker 38 - Lamnso bible

Esiker 38

¹NYÙY TÀR‑iì lò, e sùŋnín e mò, e sùúy jii,

²«Wàn wìr msòŋ, kìʼ Gog, e kàntì. Wù dzə́ e nsay Magog, a dzə̀ wun taà saʼ woó Meshek, e kfə̀n a dzə woó Tubal.

³Yòŋ shó ji ke NYÙY TÀR woo Taà Ndzə suuy ki dzə̀ á jii, ‹E ké ru kí, Gog, wò wo à sáʼ Meshek, kfə̀n sáʼ Tubal, m ban wò.

⁴M yíi bìnèr wò fo mbìv ye à leeyì, e wov vijeʼ vé e ŋgòvìr si, a sə̀ŋ wò sho, áà fəə́ é shùu rər vèn à mànjòŋ wò e dzə̀m. À yíi fəə, vèn à nyám se ŋkoʼ si, aàŋgàa koʼo, shúu rər nyanyày, aá kúr ndzə̀y sé rər, kér aŋkeè, bavìr nyùy sí.

⁵Wír veé Persia wùn à veé Etiopiàa,[48] e lì veé Libiya, á kù dzə̀ fó, aá kér aŋkeè, kér vikóŋ ve tan.

⁶Gomer wùn à mànjòŋ wov, e lì Bet‑Togarma wo wù dzəə̀n é wòŋ woo kuy kwaʼda dzə̀ sá fo wùn à və́ə woo mànjòŋ. Wíri kù dzə̀ vèn áwune vitúm vinín.›

⁷Báʼtí ri, a shìy, vèn à shúu rər wo wú banen e wò ghaŋ e dzə̀me. Yíi a dzə wò mfòóme rə̀r wov.

⁸Vishiíy ví wíy lòo shaà, aá wám wò ji à du á rə́r. Kí dzə̀ jii, wíy lòo dzə e ghan sé bàm sí, áà du, e taàmé kitúm ke wó rərí kù dzəə́ fəə́ fəə́n fo áwuné wùn. Kitúm, a wír vəə́ kfə́nkír fó vitum vinín, e wìy, a dzə aàŋkoŋ veé Isray, ve yì‑iì siìn vifə̀m e bǎm viya vímóʼ ví vinín. Vé‑eè sìy áwune fo vitúm vímóʼ ví mvəm, e wìy sho aáwuné nsay, á wáa neŋ fo lèn adzə̀m ji dèʼ, là kindzə́m.

⁹Vèn à shúu rər wóo wíy sàsìn, e nəə́ áwune moo kinsəm. Vèn à mànjòŋ wò e dzə̀m wíy sùm áwune mo mbàʼ sùm kirə́ʼ.

¹⁰«Wíy lòo dzə e kishiíy fóo fèy, é vinyo vi nəə́ e wò vifii, áà wáa baʼtí kwaʼtì se bi sí. Suuy mo woo NYÙY TÀR woo Taà Ndzə.

¹¹À lóo rə̀m, áà wáa yòŋ jii, ‹M yíi nəə́ kitúm ke ntèʼ sə́ sí tíy e ŋgèŋgèr, e səsín e wír ve á dzə́ fo ji nyaáŋ viné kitu. Ntèʼ sév sí yòʼ kér kay, kìn shuu si wùn à kóŋ sé mfìn si.

¹²Mo‑óò nəə́ áwune, e kùúy vifá nyanyày, a dù sho ji nsàʼmboʼ. Mo‑óò ghíʼ wír ve á dzə́ e ŋkà se laʼ se yì‑iì siìn vifə̀m sìn, wír, a vé‑eè kfə̀nkír fó vitum jeéy jeéy. Ké lèn ki, áwune sí tsəətìn e nyám si, kér vifá nyanyày, néŋ tèéter e vitúm ví ntìntìn.[49]

¹³Wír veé Sheba wùn à veé Dedane, à veé Tarshishi, à ntèʼ sév sí sidzə̀m, á wíy a ghay e wò jii, à kùm shúu rər ji vèn áwune wiy, e kùúy vifá, a dù sho ji nsàʼmboʼ à? À táʼ, e kuúy *kisha ke mbàm ke fəvír kí, à ke baar kí a? À táʼ, e lì nyám si, e faàsì vifá nyanyày, a dù sho à?›

¹⁴«Kí nén a dzə jii, wàn wìr msòŋ, tiísi ri ntum yem, e sùúy e Gog ji ke suuy NYÙY TÀR woo Taà Ndzə ki dzə̀ á jii, wíy lòo dzə e kishiíy fóo fèy, ke wír vém veé Israyi néŋ fo ji dèʼ, áà nèn kìíy ji sì á kíwun, e ŋaʼáy fo wò wòŋ wo wú dzəə̀n é mbìv yee kuy, kwaʼda.

¹⁵À wíy a wìy vèn à shúu rərí, a wú táv, a dzə nyanyày, a wìr dzə̀m kóʼ nyamŋkoʼ.

¹⁶À wíy wìy, e ghiʼ wír vém veé Isray e rə́r sí mo mbàʼ sùm woŋ. Gog, wíy lóo dzə e kishiíy kin e ghan sé bàm sí, é m ku yiì, áà nəə́ wír vém e rə́r sí. M wíy yiì bèy ji m fiʼ dìn e vitúm vi ji m dzə̀ e ránén ji Nyùy, aá wíy a yen e sí yéví a dzə̀ fó vinyò ve m wíy yiì e wò.

¹⁷Ke mo woo NYÙY TÀR woo Taà Ndzə suuy ki dzə̀ jii, ‹Dzə̀ wò ŋgaà wo mò‑oò súŋnin e ghan símóʼ sí fó ŋgùʼ kùm wun, túm aŋgàa lìm vém, aá tiísi e Isray. Vé‑eè rə́si tiísi viyá viyá ji m wíy lì wò, e nəə́ a áwune shó.›

¹⁸«NYÙY TÀR woo Taà Ndzə suuy jii, wíy lòo dzə e kishiíy ke Gog nəən wír vém veé Isray e rə́r sí, é dòʼshwíiy wom ŋáʼáy.

¹⁹Ke m yoŋ, a shilív shém shí ndzə́ʼə́, a tím yémé baári ki dzə̀ jii, wíy lòo dzə e kishiíy fóo fèy, é nsay Isray səʼsi é mbòŋén.

²⁰Yì wíy sə̀ʼ, é vifá vidzə̀m vi wáa fàn mo, a yàʼ. Sə́ si wùn à menə́n mè, à nyám seé kwaʼ si, à kifá ke kí ŋaŋrì ŋàŋrìn kí, e bóo lì wir msòŋ e dzə̀m, aá wáa yàʼ. Ké agwan, aá keesi, é vikóŋkóŋ ví kerkir, é kay se ŋkàlaʼ sidzə̀m si sə́y é nsay.

²¹M wíy yiì, é rə́r sí ghíʼ Gog e wòŋ agwan veé Isray mbìv sidzə̀m, aá bvəə́rí, é wìr wáa shoʼ nyùy rə̀r, kù a kìʼ a dzə̀ fə́r və shó. Suuy mo woo NYÙY TÀR woo Taà Ndzə.

²²M wíy màʼ ŋgeʼ e Gog kitu, e nəə́ wun e yàsí, kfəə́ si kfəə́ si, e nəə́ e kinjuyrì ki. M wíy səyír kiŋkò ke wuu e wùn à màŋgòŋ və́ kitu, à wìr dzə̀m woo wùn ŋgoo. Lo fo fo, é m nyoori e mentíy mè, e dzə̀sì və́y, e tom və́y.

²³Á mo m wíy dìn vitaáví vém e vitúm vi vidzə̀m, e dìn mo m dzəə̀n jeéy ji Nyùy. Á yéné, aá nèn kìíy ji m dzə̀ á NYÙY TÀR.»