Read Lamnso Esiker 39 Bible Online

Esiker 39 - Lamnso bible

Esiker 39

¹NYÙY TÀR kfən lò, a suúy jii, «Fo ké ki, wàn wìr msòŋ, roòmè Gog, e tiìsí ji ke suuy NYÙY TÀR woo Taà Ndzə kí dzə̀ á jii, e ké ru kí, Gog, m ban wò, wò woo Taà saʼ woó Meshek wùn à Tubal.

²M yíi bìnèr wò, e dòm, áà lo fo wò wòŋ wo wú dzəə̀n é mbìv yee kuy, kwaʼda, e wìy, a ghiʼ agwan veé Isray e rə́r sí.

³M yii bèy, é m dzəv kinte fo wò kiwo ke ŋkoòvì ki, e yiì, é mvən si túmkír fo ké yìy kí.

⁴Vèn à màŋgòŋ wò, à wír ve á dzəə̀n e wò ŋgoo wíy kpu yé rər áàgwan veé Isray. M wíy yiì, é menə́n wùn à nyám si wáa sàʼ dzə́n sén.

⁵Vèn wíy teèm, a neŋ e kwaʼ e ŋgèŋgèr. M sùúy ne, a sùúy mo woo NYÙY TÀR woo Taà Ndzə.

⁶M wíy sə̀ʼtì və́y é kitum kee Magog, e sə̀ʼtì e wír ve á dzə́ e ŋguùŋè rìbà ndzə̀v là kindzə́mé wùn, aá nèn kìíy ji m dzə̀ á NYÙY TÀR.

⁷M wíy yiì, é wír veé Israyi kiíy mo m dzəə̀n e ránén. M yòʼ kfə̀n dzəə́ wìy màʼtì, aá shoór yír yém ye ranéné. Á bèy, é vitúm vi nèn kìíy ji m dzə̀ á NYÙY TÀR woo Ŋgaà wo Ranén woó Isray.

⁸«E ké ru kí, kishiíy kin ki wiyì, a kí kù‑úù wiy, suuy NYÙY TÀR woo Taà Ndzə. Dzə̀ kishiíy kíwun, a mò‑oò sí yoŋè.

⁹Kí wiy bèy, é wír ve á dzəə̀n é ŋkà se laʼ seé Isray si fəə́, e bàʼtí vifá ve rər ve vé rərí kpuun, e shaà. Kí wíy lì kiyá saàmbà, é bo áwune ton vifá ve rər vin, é ví may. Vifá vee aŋkeè, ndzə̀y sé rər, vinte, mvən si, vibur, e bóo lì kòŋ sí.

¹⁰Bó shií wo áwune wìy a yen ŋgeʼ, a dù e kwaʼ, ji á sív meŋkaʼ yòʼ kfə̀n wíy a dzə, kìn ji á du é kòv ji á sán meŋkaʼ. Kí dzə̀ bey, bìʼ fo áwune sí wìy a lì a dzə̀ vifá ve rər vin, a tòn. Áwune wíy yòv bùʼ wìr ve vé‑eè yòvìn wóov, e kuúy vifá ve wìr ve vé‑eè kuuyin vév. Suuy mo woo NYÙY TÀR woo Taà Ndzə.

¹¹«Wíy lòo dzə e kishiíy fóo fèy, é m fó kirə́ʼ é Isray ke á dzəəme Gog sho. Kí wíy a dzə e Mboʼ Vé Ghane, a yì dzə̀ é mbìv yee fo shùy yii tó, e lò fo Ndzə́v Shiŋgwaŋe. Say sév sí wíy a dzə nyanyày yée sətí dzə́ə, fo vé ghane wáa shaà. Á wíy a yòŋ fó ji Mboʼ Shùu Rə́r Gog.

¹²Kí wíy yiì ŋwee saàmbà, é bo wír veé Israyi dzəəme dzə́n sin é sí may, e fíʼ *kfəmrí nsay, é yì rán fó *kifàn.

¹³Wìr dzə̀m woó Isray wíy mùm, e dzəə̀mè aŋkfə vìn. Wíy lòo dzə e kishiíy ke m duŋrì vikuʼùy vém, á wíy a wùʼsì áwune bìʼ lim ye á yiìn. Suuy mo woo NYÙY TÀR woo Taà Ndzə.

¹⁴Ŋwee woo saàmbàa mayì, aá shóʼtí wír ámóʼó, aá goʼ, a ghanén fo kishiíy kidzə̀m, a dzəə̀mè ve á dzəə́ bér e virə̀ʼ. Kí dzə̀ bey ji á fiʼ kfə̀mrí nsay.

¹⁵Wír ve á shoʼtin víyi wíy a ghanén, lóo dù, yén kighvə́r ké wìr, aá lem kisəəm ji aŋgàa dzəə̀mèe lóo wìy, aá fiʼ dzəə̀mè e Mboʼ Shùu Rə́r Gog.

¹⁶Ŋkàlaʼ yìmòʼ wíy a dzə sa fo, aá kù yoŋ ji yeé Shùu Rər. Á mo á wíy kfəmrí nsay bèy, é yì rán fó kifàn.

¹⁷«Fo ké ki, wàn wìr msòŋ, ke suuy mo woo NYÙY TÀR woo Taà Ndzə ki dzə̀ jii, jàŋ menə́n mè kfəə́ e dzə̀m, e jàŋ nyám seé kwaʼ si sidzə̀m. Yòŋ ji áwune wàá bánén, e wìy, e kaàrí, a yi a kiŋkàʼ ke m báʼti bìʼ áwune. Kù dzə̀ á ké cù, a dzə̀ ke wiy kí, a kí dzə̀ áàgwan veé Isray, aá yíi kfər nyám, e no mensə́.

¹⁸Á yíi kfər a jav visə̀n ve wìr, e no mensə́ me vé saʼa, a vé‑eè yùyrí moo nyám se á koorin é Bashan. Nyám see moo viyáʼ wùn aànjìi, à vibév vi, aànàʼa.

¹⁹Á yíi yi fóm, e ŋkàʼ wo wiy wo m báʼti ji wóv vən, e kur, e no a mensə́, e jwèr.

²⁰Á yíi kfər nyám se ŋkoʼ, e kfər jav aŋgàa koʼ, e kfər visən ve wíri wùn à vé rər ve tavkíné e ŋkàʼ fen. Suuy a NYÙY TÀR woo Taà Ndzə.

²¹«NYÙY TÀR suuy jii, m wíy dìn vikuʼùy vém e vitúm ví mvəm, a dzə̀ jii, á wíy yen mo m tinen kinyo ke Gog, e màʼ kiwó kém e wùn kitu, e lòvtí sho mo kì dzə̀ á lòvtí.

²²Á bèy, é wír veé Israyi nèn kù a kiíy ji m dzə̀ á NYÙY TÀR woo Nyùy wov, e kù kiíy e kèʼ fo kishiíy fóo fèy, a dù duùn fó mbìy.

²³Ké vitum, é ví kiíy ji wír veé Israyi‑iì dù, a rèŋ vikwàn a dzə̀ bìʼ ajay vév. Vé‑eè ŋwáy mo, m nèn bìn ndzə̀m aáwune, e wày áàŋgaà vév vibàné wo, á kpú é shùu rər.

²⁴M bìn ndzə̀m aáwune bey, e lòvtí sho réŋréŋ mo liì wov kisaŋ dzəə̀n, e lòvtí mo joonè wóví‑iì taʼà.

²⁵«Á bèy, ke suuy NYÙY TÀR woo Taà Ndzə ki dzə̀ jii, m sí yìi siìr vijuŋ ve rám Jakov fo, e dìn mo m koŋ wír veé Isray adzə̀m, shám áwune. M kù wíy a kiyrí yír yém ye ranéné fo á wáa shoór.

²⁶Áwune wíy lòo dzə aáwuné nsay ji dèʼ, là wír wo wù kfə́n a bemér áwune, aá nèn làysìn woómé se vé‑eè béʼé, aá reŋ vikwàn, a kù dzə̀ bìʼ vinyo vidzə̀m ve vé‑eè ŋwayin mo, a bùʼtì.

²⁷A dzə̀ jii, m wíy baʼtí áwune fo vitúm ví mvəm, e fəə́r fo aŋgàa vibàn véví wòŋ. M fəərì, é vitúm vi nèn yèn vikuʼùy vé yir yém ye ranéné.

²⁸Á bèy, é wír vémé nèn kìíy ji m dzə̀ á NYÙY TÀR woo Nyùy wov. A kí dzə̀ jii, yì‑iì tsə̀nsí mo áwune é kwaʼ nsàm, e vitúm ví mvəm, ku kfə̀n bàʼtí mo áwune, e kfə̀n shó aáwuné nsay, é la wùmòʼ yòʼ gòʼ e vitum gheéy.

²⁹M wíy way Kiyoy kém e wír veé Israyí wùn, e làa yòʼ dzə́ə wìy bìn ndzə̀m aáwune féyì. Suuy NYÙY TÀR woo Taà Ndzə.»