Read Lamnso Esiker 4 Bible Online

Esiker 4 - Lamnso bible

Esiker 4

¹NYÙY TÀR lò, e yòŋ e mò jii, «Wàn wìr msòŋ, lèn və̀n, lì kimáŋ ké nsay ki, e neèr e wò si, e toòŋé kifá ke kí wáa dìn nsáŋti ŋkàlaʼ Jerusalem sho.

²Sìysì kifá ki, é kí wáa dìn mo á yíi gìm ŋkàlaʼ Jerusalem. Kóʼór nsay, é yì kóʼ é wǔn kày ji dzə́ə. Sìysì sá viláʼáy vé vé rər ví, e kaàrí fó. Yéʼér lúm se vici sí é wǔn kày, e virə̌ʼ virə̀ʼ, aá yiì a fùn sho, e fíʼ, bàʼ e nsay.

³À yii, áà nèn lì kikáŋ kee kisha, e tìír moo kirə́v ké kày, é kí wáa dzə e vèn à ŋkàlaʼ ntìntìn. Kú a tuytí síi e ŋkàlaʼ wùn, kù moo ji á gìm a ne bèy, a kù gim wò. Kee shooy ki sì kisəəm fo wír veé Israyi.

⁴«Neèm e wò koy ŋkoòvìi, a neŋ, e siìr ŋgeʼlàʼ wìr veé Isray e wò kitu. Vishiíy ve à wíy a neŋ vi dzə̀, aà wíy a beʼ ŋgeʼ sév.

⁵M fò kishiíy e wò kishóv mbvə̀ʼə̀ e ghiì taár (390), a kishiíy kí dzə̀ ji kiyá fo viya ve m wíy màʼ ŋgeʼ e wír veé Israyí kitu. Á mo à wíy yen ŋgeʼlàʼ wìr ve á dzəə̀n é mbìv wòŋ yee Isray bèy.

⁶À maysì vee shooy, áà kfən neèm lèn a dzə̀ é koy yìyí, e bèʼèy ŋgeʼlàʼ wìr veé mbìv Juda. M fó kishiíy e wò mkweè, a kishiíy kí dzə̀ ji kiyá, e dù, e meé mo ŋgeʼ yev wíy mày.

⁷Túytí sí yée é wǔn kày ye yí gìmèn ŋkàlaʼ Jerusalem, e kfə̀vtí kiwó ki, e tìn kàʼ Jerusalem.

⁸Ké ru kí, m yíi kur wò, é la à yòʼ yù fóo bìnkìr, e kìʼ mbìv yìmòʼ, e meé mo à wíy màysì vishiíy ve à gìmèn fó.

⁹«Lì sáŋ yee *wit wùn à yee *barli, à kúne, à *lentil, à saárí, e tàtí sáŋ yee *shiper sho, e wày é mbìʼ. À wíy a fèr viyíkìr sho, a yi e mvə̀m vishìíy vee kishóv mbvə̀ʼə̀ e ghiì taár (390) ve à néŋé.

¹⁰Vifá ve yi vé veé kishiíy ve à yíi a yi vi yíi a dzə ntuʼ kiban e mòʼón e shùu vidzəə̀sì vé shekel mbaà.[1]

¹¹Ké mendzə̀v, áà kú a fìʼ fìʼìn, a no abàr abaà é kishiíy.

¹²À wíy a naŋsín kibán ké, a yi moo ke á fèrìn e barli, e tòn. Aà kù wíy a fèr ké, a tòn meŋkaʼ a dzə̀ kishwáŋ ke wìr ke yumér kí, e bó a tòn sho, é wíri wáa yen.»

¹³NYÙY TÀR kú a yòŋ jii, «Á mo wír veé Israyi wíy a yi kibán ke *kifàn bey e vitum fo m wíy taʼár, aá dukir.»

¹⁴Á bèy, m nèn kà kitú kém, e yòŋ jii, «Abaày, NYÙY TÀR woo Taà Ndzə, bó m yòʼ‑oò ghàn sìíy lòr kitú kém e kifá ki, kèʼ fo meterí, e wìy shem lán. Bó m yòʼ‑oò yiì ne yì kifá ke kí kpuun kpuún, kìn ke koon nyam kwaʼ. Bó m yòʼ‑oò yiì ne kùm kimfòy ke nyàm e mǒ shuù.»

¹⁵NYÙY TÀR nèn sùúy e mò jii, «Leéy ri lèn, m yíi yiì, áà li a dzə̀ jáŋ nàʼ. À yòʼ kfə̀n dzəə́ yìi lì a dzə̀ kishwáŋ ke wìr, e bóo tòn kibán ké shó.»

¹⁶Wù kfən yòŋ e mò jii, «Wàn wìr msòŋ, a kí fə̀m dzə̀ é le, bo m kù yíi fàr viyíkìr fo Jerusalem. Áwune wíy a fìʼ kibán fo fíʼin, e bó a yi, aá wíy a yi e kindzə́m kí. Ké mendzə̀v, aá kú a fìʼ sa fíʼin, e bó a no, a no fan fan.

¹⁷M wíy yiì vinyo vìn bèn, ji áwune fiʼ wìy bùú vifá ve yi, e bùú mendzə́v, é wìr wáa leéy wùmòʼ, é shilív shí wáa ndzəʼ, lo fo fo, aá wáa tooŋé e mvə̀m ŋgeʼ, bìʼ vinyo vév ve bi ví.»