Read Lamnso Esiker 40 Bible Online

Esiker 40 - Lamnso bible

Esiker 40

¹Yì‑iì dzə̀ é kishiíy ke kí‑iì meen ji ghvə̀m, e ŋwee mbìyi fó kiya ke kí‑iì sí mee ji nshòv sitàn e mbaà, mo vèr‑iì siìn é kwaʼ nsàm, a kfə̀n‑eè dzə̀ sá, a sí du kiyá nshòv sikweè e ghvə̀m mo vé‑eè tònèn ŋkàlaʼ Jerusalem, NYÙY TÀR màʼ kiwó e mǒ wùn, e lì mo, kù é kishiíy fen, e dù sho fo.

²Wù‑uù lì mo é njà kinjeenjèm, e dù sho e nsay Isray, e tìír mo é kitu ke gwan wo da wùmòʼ. M yén kifá e mbìv yee tsə́n, a kí dzə̀ é nshwìnin ŋkàlaʼ.

³Wù‑uù kòʼór mo fó mentsə̀m, m yén wír, a wù tíy e shùu kibùʼ ke kày, njaʼkìr moo kisha kee *brons bèy.[50] Wù‑uù kér kfəə̀ mfìʼ e wun kiwo, kér kicí ké mfìʼ.

⁴Wìr və̀y suúy e mò jii, «Wàn wìr msòŋ, leéy, e yèn, e yuùrí, e yù. Ku wày vifií ví é kinyò ke m lo, e dìn e wò ki kijuŋ. Á wìy e wò fèn ji m din á vinyo vìn e wò. Ku naàrì kinyo kidzə̀m ke à yenen kí e wír veé Israyi.»

⁵M lòo leéy, e yèn lav cù, a kayi kaárí fó, e tàr. Wìr və̀y nèn dù ji wun fiʼ á kay, a kicí ké mfìʼ ke wù‑uù kér e wun kiwo ki‑iì dzə̀ kóy e kintoʼnìn ki.[51] Wù fìʼ kisər ke kày, a kí dzə̀ kóy e kintoʼnìn ki. Wù fìʼ vida vee kóʼ é yuv, a ví dzə̀ sá bèy.

⁶Wù dù e shùu kibùʼ ke kày keé mbìv ntoshùy, e kòʼ kirə́ʼ ke seʼtìn kí. Wù kóʼ bey, e fìʼ kirə́ʼ ké kikùr, a kí dár, e nə̀ə́, kóy e kintoʼnìn ki.

⁷Melalav mè‑eè dzə̀ é mvə̀m kibùʼ metaár metaár, mbìv sidzə̀m, a mfìʼ se melalav mèn si dzə̀ réŋréŋ kóy e kintoʼnìn ki, mbìv sidzə̀m. Ntàm yée lò fo shilav shímóʼ shí, e dù e shímóʼ shí‑iì dzə̀ kóy e ntàm se kiwo si sibaà. Á lóo tosín kirə́ʼ ké kikùr kee fó mvəm, e bó a nəə́ e kirəsí ke kí kiʼ lav cù, kí wàa dzə sa kóy e kintoʼnìn ki.

⁸Wù nèn fìʼ kirə́sí, a kí dzə̀ kóy e baà, a kisər ke mboòmè seé shùu kirəsí kí dzə̀ kintoʼnìn ke koy. Kirə́sí kí wáa kìʼ lav cù.

⁹

¹⁰Melalav meé mvə̀m kibùʼ mè kù‑uù dzə̀ réŋréŋ fó mfìʼ, a virə́v vée lò fo shilav shímóʼ shí, e dù e shímóʼ shí ví kù dzə̀ réŋréŋ vidzə̀m fo vidà.

¹¹Wù kfən fìʼ vikuʼùy vé shuù wo wú nəə e kibùʼ, a ví dzə̀ kóy e baà e kintoʼnìn ki, é bo kibuʼ ki wáa dzə fo mvəm, kóy e taár e ntàm se kiwo si sibaà.

¹²Kikiŋ kímóʼ kí‑iì dzə̀ é shuù se melalav fèn, a kí dzə̀ ntàm se kiwo sibaà fó vidà veé yuv, e kfə̀n a dzə ntàm se kiwo sibaà é kisə̀r. Melalav mee ntuùfú mèy mè kù‑uù kér mfìʼ si réŋréŋ kóy e kintoʼnìn ki mbìv sidzə̀m.

¹³Wìr və̀y kfən fìʼ kikfə́v, e kèʼ fo bǎm shilav shímóʼ shí, e liysín, e dù, e meé e shímóʼ shí bàm, e mbìv fésə, mfìʼ wáa dzə kóy ntuùfú e ntàm se kiwo si sibaà, a melalav mèn mè kiʼnìnè.

¹⁴Wù nen fìʼ kirə́v keé shùu kirəsí ke kí kiʼ maàndzə, a kí kóʼ é yuv kóy nshòv sitàn e ghvə̀m. Kibuʼ ki‑iì sòmtìn, e nə̀ə́ e maàndzə, a maàndzə gím wun fo virəv vee vitaár.[52]

¹⁵Kèʼ fo shùu kày kibùʼ kee fó ndzə, e tosín, e dù, e meé e shùu kirəsí fó mvəm, mfìʼ wáa dzə kóy nshòv sibaà e ghvə̀m e kintoʼnìn ki.

¹⁶Vé‑eè tòʼtì meshúshuu e virəv vé melalav veé mbìv ndzə, e tòʼtì sa e virəv vé nsàn se melalav. Á kfə̀n‑eè fèr nsáŋti viyaŋ e wǔn virəv veé nsàn se melalav.

¹⁷Wìr və̀y nèn lì mo, e nə̀ə́ sho e maàndzə mbìy, a mewón me lav mè gwaárí fó e wǔn kày, a mè dzə̀ mtaár, aá fií fó mbìy e mfiì si.

¹⁸Mfiì sìn si‑iì nyèŋ réŋréŋ mo kibuʼ ki‑iì sòmtìn é maàndzə, e kaàrí maàndzə, a maàndzə mbìy rə̀n sə́ytí, e shaà ye mvə̀m.

¹⁹Wù nèn fìʼ ntàm yee lò fó shùu kibùʼ keé maàndzə mbìy, e dù e shùu maàndzə yee fó mvəm, wáa dzə kóy nshòv sitàn e mbaà. Á ké shùu kibùʼ woó mbìv ntoshùy, nén a jùmrì lèn ké shùu kibùʼ woó mbìv yee kuy.

²⁰Wìr və̀y nèn fìʼ shúu kibùʼ wo wú nəə e maàndzə mbìy, e mbìv yee kuy, e fìʼ vida, e fìʼ mbvə̀ʼ.

²¹Melalav mè kù‑uù dzə̀ sá fo metaár metaár, mbìv sidzə̀m. Melalav mèn wùn à virə́v veé mvə̀m kibùʼ vi, à kirə́sí kí, ví kù‑uù dzə̀ réŋréŋ é mfìʼ moo meé shùu kibùʼ woó mbìv ntoshùy. Vida ve kibùʼ vi kú a dzə kóy nshòv sibaà e ghvə̀m e kintoʼnìn ki, mbvə̀ʼ wáa dzə kóy ntuùfú e ntàm se kiwo si sibaà.

²²Kirə́sí kee fen wùn aàwundu ve vé‑eè tòʼtìn, à nsáŋti viyaŋ wo vé‑eè yiìn, vifá vìn vi‑iì dzə̀ réŋréŋ moo veé shùu kibùʼ e mbìv yee fo shùy yii tó. Á lóo nəə́, á kòʼ kirə́ʼ ke seʼtìn kí, ŋkèʼ saàmbà, soóri kibuʼ, á nèn mèé e kirəsí.

²³Kibuʼ ke kí‑iì nəə e maàndzə yee fó mvəm kí nén a kìʼ kin kee kibuʼ keé mbìv yee kuy, a kù dzə̀ sá mo ví‑iì kiʼnìn e mbìv ntoshùy. Wìr və̀y nèn fìʼ ntàm yee lò fó shùu kibùʼ wúmóʼó, e dù e wúmóʼó, yì wáa dzə kóy nshòv sitàn e mbaà.

²⁴Wù nèn lì mo, e dù sho e mbìv yee tsə́n, m yén shúu kibùʼ fo. Wù fìʼ virə́v vee fó mvəm, e fìʼ kirə́sí, a mfìʼ si kù dzə̀ réŋréŋ mo símóʼ sí kì dzəə̀n.

²⁵Vé‑eè tòʼtì awundu e virəv vé kibùʼ, e kfə̀n tòʼtì sa e virəv vé kirəsí réŋréŋ mo vé‑eè tòʼtìn é vibùʼ vímóʼ ví. Vida ve kibùʼ vi kú a dzə kóy nshòv sibaà e ghvə̀m e kintoʼnìn ki, mbvə̀ʼ wáa dzə kóy ntuùfú, e ntàm se kiwo si sibaà.

²⁶Ŋkèʼ se vé‑eè sèʼtìn sí‑iì kóʼ e shùu kibùʼ saàmbà, a kirə́sí kí kù dzə̀ é mbìv fésə, aá tósín ne. Vé‑eè yiì nsáŋti viyaŋ e virəv vee fó mvəm, ǎ mbìv fen, ǎ mbìv fésə.

²⁷Kibuʼ kímóʼ kí wáa dzə e ŋkìʼnìn a dzə̀ ke kí nəə e maàndzə yee fó mvəm, e mbìv yee tsə́n fey. Wìr və̀y nèn fìʼ ntàm yee lò fó shùu kibùʼ wúmóʼó, e dù, e bàʼ e wúmóʼó, wáa dzə kóy nshòv sitàn e mbaà.

²⁸Wù nèn lì mo, e nə̀ə́ sho e maàndzə yee fó mvəm, dzə́ə fó shùu kibùʼ ke kí nəə fo mbìv yee tsə́n. Wù fíʼ kibuʼ kìn, kí kú a dzə réŋréŋ moo vímóʼ ví é mfìʼ si.

²⁹Melalav wùn à virə́v veé mvə̀m kibùʼ vi, à kirə́sí kí, ví kú a dzə réŋréŋ é mfìʼ moo veé vibùʼ veé maàndzə mbìy. Vé‑eè tòʼtì awundu e virəv veé kibùʼ, e kfə̀n tòʼtì e veé kirəsí ví. Vida ve kibùʼ vi kù‑uù dzə̀ sá kóy nshòv sibaà e ghvə̀m e kintoʼnìn ki, mbvə̀ʼ kú a dzə kóy ntuùfú e ntàm se kiwo si sibaà.

³⁰Vibuʼ ve ví kaarin maàndzə yee fó mvəm ví dzə̀, a virə́sí vee fó vi‑iì dzə̀ fó medà kóy ntuùfú e ntàm se kiwo si sibaà, a dzə fo mbvə̀ʼ, kóy e ntàm se kiwo si sibaà.

³¹Kirə́sí ké kibùʼ keé mbìv yee tsə́n kí‑iì kiʼ maàndzə mbìy, a nsáŋti viyaŋ dzə̀ é mboòmè si, a ŋkèʼ se á sèʼtìn sí kóʼ fo waamé.

³²Wù nèn lì mo, e dù sho e mbìv maàndzə yee fó mvəm, ye yì kiʼ fo shùy yii tó, e fìʼ shúu kibùʼ woo fó, wú kú a dzə réŋréŋ moo kibér.

³³Melalav wùn à virə́v veé mvə̀m kibùʼ vi, à kirə́sí kí, ví kú a dzə réŋréŋ é mfìʼ moo veé vibùʼ vímóʼ ví. Vé‑eè tòʼtì awundu e virəv veé kibùʼ, e kfə̀n tòʼtì e veé kirəsí ví. Vida ve kibùʼ vi kù‑uù dzə̀ kóy nshòv sibaà e ghvə̀m e kintoʼnìn ki, mbvə̀ʼ wáa dzə kóy ntuùfú e ntàm se kiwo si sibaà.

³⁴Kirə́sí kfə́ kí‑iì kiʼ maàndzə mbìy, a nsáŋti viyaŋ dzə̀ é mboòmè si, a ŋkèʼ se á sèʼtìn sí kóʼ fo waamé.

³⁵Wù nèn lì mo, vèr wun dù e shùu kibùʼ ke kí kiʼ kuy. Wù fìʼ, kí kú a dzə réŋréŋ moo vé mbìy vi.

³⁶Melalav wùn à virə́v veé mvə̀m kibùʼ, à kirə́sí kí, ví kú a dzə réŋréŋ é mfìʼ moo veé vibùʼ vímóʼ ví. Vé‑eè tòʼtì awundu e virəv veé kibùʼ, e kaàrí, e tàr. Vida ve kibùʼ vi kù‑uù dzə̀ kóy nshòv sibaà e ghvə̀m e kintoʼnìn ki, mbvə̀ʼ wáa dzə kóy ntuùfú e ntàm se kiwo si sibaà.

³⁷Kirə́sí kfə́[53] kí‑iì kiʼ maàndzə mbìy, a nsáŋti viyaŋ dzə̀ é mboòmè si, a ŋkèʼ se á sèʼtìn sí kóʼ fo waamé.

³⁸Vibuʼ ve ví‑iì nəə e maàndzə mvə̀m ví‑iì dzə̀, a wàn lav bár e wǔn kirəsí, kér shuu wo á nəə sho fo mvə̀m kirə̀sí. Yì‑iì dzə̀ fo vé‑eè su cu se tonèn sí.

³⁹Vidàŋ vi wáa dzə e mvə̀m kirə̀sí vibaà, ǎ mbìv fen, ǎ mbìv fésə. Yì‑iì dzə̀ fo vé‑eè yíi a seerí cu ye tonèné, a see yé ajay, à yé njòó.[54]

⁴⁰Ké kibùʼ keé mbìv yee kuy, vidàŋ vímóʼ ví wáa tiynín sa e shùu kirəsí fó ndzə vibaà vibaà é shuù mo á kóʼ kirə́ʼ ke á sèʼtìn.

⁴¹Vidàŋ vi‑iì dzə̀ fó mvəm vikweè, vímóʼ ví sá fo ndzə vikweè, a kí dzə̀ ji vidàŋ ve vé‑eè seéri nyám se cù sho vidzə̀m vi‑iì dzə̀ á waamé.

⁴²Vidàŋ vímóʼ ví‑iì dzə̀ sá vikweè, aá sém a dzə̀ tíy, a yì‑iì dzə̀ vé cù ye tonèné. Vida vév ví‑iì dzə̀ ntàm se kiwo sitaár, mbvə̀ʼ wáa dzə sa bèy, vida vee kóʼ é yuv, ntàm se kiwo sibaà. Yì‑iì dzə̀ fo vé‑eè lem vifá ve ntàʼtìn ve á li, náŋsin nyám se cù sho.

⁴³Ŋgòvìr si kfə̀n‑eè kétin fo e wǔn lav, e kaàrí, e tàr, a sí dzə̀ é mfìʼ vikùʼùy vé mbvə̀ʼ kiwo, aá nèn neer nyam cù e vidàŋ fèy.

⁴⁴Wìr və̀y nèn lì mo, e nə̀ə́ sho e maàndzə yee fó mvəm, m yén mewón me lav e mvəm wó mebaà.[55] Yìmòʼ‑oò dzə̀ é ghaa kibùʼ kee kuy, kiʼ tsə́n.[56] Yìmòʼ é ghaa kibùʼ kee tsə́n, kiʼ kuy.

⁴⁵Wìr və̀y suúy e mò jii, «Wàn lav wo wù kiʼ tsə́n və̀n dzə̀ wo atàá cù ve leey áwune fó lav cù.

⁴⁶Wàn lav wo wù kiʼ kuy wáa dzə wo atàá cù ve á leey kíy cù. Áwune dzə̀ rám Tsadok,[57] a dzə̀ áwune cáʼ fo wír veé ram Levi ve dzə̀ á kòʼtí e NYÙY TǍR si, e yiì lim Nyùy fo.»

⁴⁷Wìr və̀y nèn fìʼ vikuʼùy vé maàndzə, mbìv sí wáa dzə fo vidà réŋréŋ kóy nshòv sitàn e mbaà, kóy nshòv sitàn e mbaà. Kíy cùu wáa tiy e mbìy lav cù.

⁴⁸Wù lì mo, e dù sho e kibùʼ ke kí nəə e lav cù, e fìʼ virə́v ve ví kiŋ fó, mfìʼ kisə̀r wáa dzə kóy e mòʼón e ntàm se kiwo si sibaà, virə́v vidzə̀m. Virə́v vin vi‑iì sòmtìn e mbuù ntàm se kiwo sibaà fó koy, e fàr nsàn shùu kibùʼ, yì wáa dzə kóy e taár e kintoʼnìn ki.

⁴⁹Kibuʼ ki nəə́ kóy e tàn, mbvə̀ʼ wáa dzə kóy e taár, ŋkèʼ se á sèʼtìn sí kóʼ shó e ghvə̀m, a vitóm vi kóytí shuu.