Read Lamnso Esiker 41 Bible Online

Esiker 41 - Lamnso bible

Esiker 41

¹Wù nèn lì mo, a nəə́ sho e nsaàlav mbìy, e fìʼ shuu wo wú nəə. Kisər ke kirəv kee fó ki wáa dzə kóy e mòʼón e kintoʼnìn ki mbìv sidzə̀m,

²vikuʼùy vé shuù vi wáa dzə kóy e baà e kintoʼnìn ki. Wù kfən fìʼ virə́v, ví wáa dzə kóy e ntàm se kiwo si sibaà, e lò fo shuù, mbìv sidzə̀m. Wù nèn fìʼ nsaàlav, yì wáa dzə kóy e ghvə̀m fo vidà, mbvə̀ʼ wáa dzə kóy e tàn.

³Wù nèn a nəə́ e nsaàlav yee fó mvəə́mvəm, e fìʼ shuu wo wú nəə. Kisər ke kirəv kee fó ki wáa dzə kintoʼnìn ke koy, mbìv sidzə̀m, vikuʼùy vé shuù vi wáa dzə kóy e kintoʼnìn ki. Virə́v vee fó vi wáa dzə e mbuù ntàm se kiwo sibaà fó koy e baà, e lò fo shuù, mbìv sidzə̀m.

⁴Wù nèn fìʼ nsaàlav, yì wáa dzə kóy e tàn tàn, mbìv sidzə̀m. Wù nèn yòŋ e mò jii, «Féne dzə̀ kikiŋ, a dzə̀ kirə́ʼ kee jeéy kí féyì.»

⁵Wìr və̀y nèn fìʼ kirə́v ké lav cù, a kisər ki dzə̀ kóy e kintoʼnìn ki. Wù lò fo fo, e fìʼ wón lav ve vé‑eè bár e wǔn lav cù, e virəv ve da vi, a mbvə̀ʼ yev dzə̀ kóy kóy.

⁶Vé‑eè bòm wón lav vìn, e yàvtí ŋkèʼ sitaár. Ŋkèʼ ye mòʼón‑eè kér wón lav mtaár, kù bey, ŋkèʼ sidzə̀m. Vé‑eè sèʼtì kirə́v ké lav cù séʼtin, wón lavi wáa tiy sho e ŋkèʼ sí ŋkèʼ si, e làa yòʼ nəə́ e kirəv kifur.

⁷Wón lavi‑iì faŋ, kóʼ koʼón mo ŋkèʼ sév sí dzəə̀n. Ŋkèʼ sìn si kù‑uù dzə̀ bey e mbìv sé lav cù se da si sidzə̀m. Dzəə̀ yìmòʼ‑oò dzə̀ shó ye yì‑iì wónri, tósin ŋkèʼ sìn, du, mee e ŋkèʼ yee fó yuv.

⁸M leéy, e yèn ji vé‑eè lóo bom lav cù rə̀n, e ŋàʼár a cí lav e yuv, kóy e kintoʼnìn ki, wú nen fèr kinsə̀ŋ ke wón lav.

⁹Ké kirəv ké wón lav kee fó ndzə, kisər ki‑iì dzə̀ kóy e ntàm se kiwo si sibaà. Kirə́ʼ ké cí lav ki nen bèr kóy e ntàm se kiwo si sibaà fó mbvə̀ʼ.

¹⁰Kèʼ fo cí lav cù, e liysín maàndzə, e bàʼ e ŋeerí sé wón lav ve vé‑eè bár e wǔn kày yee fó, wáa dzə kóy e tàn, e kaàrí lav cù, e tàr.

¹¹Ké wón lav ve vé‑eè bár e wǔn lav cù, shúu‑uù nəə fo cí lav e ŋkèʼ yee shó e mòʼón, ǎ mbìv yee kuy, ǎ mbìv yee tsə́n, a mbvə̀ʼ cí lav kù dzə̀ kóy e ntàm se kiwo si sibaà.

¹²Lav yìmòʼ‑oò tíy e shùu maàndzə yeé ghaa lav cù, e mbìv yee fo shùy yii nəə, a màlav dzə̀ kóy nshòv sibaà e mbaà e kintoʼnìn ki, a nsər dzə̀ kóy nshòv saàmbà e ghvə̀m e kintoʼnìn ki, kisər ke kirəv kí wáa dzə kóy e ntàm se kiwo si sibaà, e kaàrí, e tàr.

¹³Wù nèn fìʼ màlav cù fo ndzə, wáa dzə kóy nshòv sitàn e mbaà, wù fìʼ sa maàndzə yee fó bàm, e tàtí lav ye kuʼùn yee fó, ntàm wáa dzə sa kóy nshòv sitàn e mbaà.

¹⁴Wù nèn kfə̀n fìʼ maàndzə yeé mbìy lav cù, e mbìv yee fo shùy yii tó, mbvə̀ʼ wáa dzə sa kóy nshòv sitàn e mbaà.

¹⁵Wìr və̀y kfən fìʼ lav ye yì‑iì tíy e bǎm lav cù rə̀y, e tàtí virə́ʼ ve ví sòmtìn, màlav wáa dzə sa kóy nshòv sitàn e mbaà. Kibuʼ ke kí‑iì nəə e lav cù, wùn à virə́v veé lav ye kuʼùn ví‑iì dzə̀,

¹⁶aá náŋsín e shibáʼáy shí, e kèʼ fo nsaàlav, e dù, e mèé e mewón me awundu, aàwundùu dzə̀, aá sə́tí sətín.

¹⁷Virə́v veé mvə̀m lav cù vi‑iì dzə̀, a ví kér nsáŋtí virə́ʼ vidzə̀m, e koʼ, e bàʼ e kitu ke shuù se lav.[58]

¹⁸Vé‑eè toòŋé vindzə̀ə́ndzəm ve *vifa veé yuv ve ví kér vav si wùn à vé kiyaŋ vi, à vé vifa veé yuv ve ví kér mbìv sé si sibaà sibaà ví,

¹⁹yímóʼó, yé wìr, yímóʼó, yé wàn bvərə̀ʼ, a yímóʼó leey kiyáŋ keé mbìv fen, yímóʼó, keé mbìv fésə. Á kù‑uù toòŋé wún lav cù bèy, e kaàrí, e tàr.

²⁰Kèʼ fo nsaàlav, e dù, e meé e kitu ke shùu lav, á ku toòŋé vifá veé yuv, e toòŋé sé kiyaŋ e wǔn lav.

²¹Shuu wo wú‑uù nəə e lav cùu kér vitóm, a ví kér mbìv sikweè, a vitóm veé shuù wo wú nəə e kirə̀ʼ kee jeéy kí féyì vi shwínin vee shooy.

²²Kidàŋ ke cù kímóʼ kí‑iì dzə̀ fó, aá fér e kicí kí, e sə̀tí gháŋ si. Kí‑iì dzə̀ é mbuù ntàm sibaà fó koy, e lò fo nsay, e kòʼ é yuv. Kiyiy kfə́ kí wáa dzə kintoʼnìn ke koy mbìv sidzə̀m. Kór si wùn à kiyiy ki, à gháŋ si kù‑uù dzə̀ kicí. Wìr və̀y suúy e mò jii, «Kù dzə̀ kidàŋ ke cù ke kí yii tíy e NYÙY TǍR si.»

²³Shúu‑uù nəə e lav cù, a wú dzə̀ ŋkuv sibaà, a wo wú nəə e kirə̀ʼ ke dzəə̀n kee jeéy kí féyìi kù‑uù dzə̀ sá ŋkuv sibaà.

²⁴Ŋkuv mòʼón‑eè kér anshìy abaà, aá lév mbìv sidzə̀m.

²⁵Vé‑eè bònen fèr nsáŋti *vifa veé yuv ve ví kér vav si, e fèr wo kiyaŋ aànshìy shùu lav, kù réŋréŋ mo vé‑eè fèrìn é kirəv. Shúu kibùʼu‑uù dzə̀ fó ndzə, a wú kér kikiŋ e kitu wo, aá fér e kicí kí.

²⁶Virə́v veé mvə̀m kibùʼ vi‑iì kér mewón me awundu, kfə̀n kér nsáŋti viyaŋ mbìv sidzə̀m. Wón lav ve vé‑eè bár e wǔn lav fo ndzəə‑əə̀ dzə̀ sá, aá kér vikiŋ.