Read Lamnso Esiker 42 Bible Online

Esiker 42 - Lamnso bible

Esiker 42

¹Wìr və̀y nèn lì mo, vèr wun fəə́sín, e dù e maàndzə mbìy, e mbìv yee kuy, e mèé e lav ye yavtín, a yì kér mewón me lav, a yì tíy e shùu maàndzə yee fó mvəm, kiʼ lav ye yì dzəə̀n é bǎm lav cù.

²Lav ye yavtín rə̀n‑eè dzə̀ a màlav dzə̀ kóy nshòv sitàn e mbaà, a dzə kóy nshòv sibaà e ghvə̀m e kintoʼnìn ki fó nsər. Shuu wo wú‑uù nəə shoo‑oò kiʼ mbìv yee kuy.

³Mbìv rə yìmòʼ‑oò leey kirə́ʼ ké maàndzə yee fó mvəm ke kí dzəə̀n kóy e tàn fo mbvə̀ʼ, e lò fo lav cù. Yìmòʼ‑oò leey kirə́ʼ ke fiìn kí keé maàndzə mbìy. Lav rə̀n‑eè dzə̀ ŋkèʼ sitaár, a yìmòʼ símsín fo yìmòʼ, kér ŋgoo mewón me lav.

⁴E mbìv ye yì leey kuy, dzəə̀ nyéŋ é shùu lav, a yì dzə̀ kóy e baà e kintoʼnìn ki fó vikùʼùy, a dzə kóy nshòv sitàn e mbaà fó vidà. Shuu sidzə̀m si‑iì lév, kfə́n a dzə̀ é mbìv yee kuy fèy.

⁵Mewón me lav meé ŋkèʼ see fó yuv mè‑eè dòrkír, e shaà mee fó sar, réŋréŋ mo ŋkèʼ yee shó sìmsìn, e nə̀ə́.

⁶Vé‑eè bòm ŋkèʼ se wón lav see sitaár sìn, e yàvtí yìmòʼ e yìmǒʼ kitu, a bó á yoʼ yàvtí a dzə̀ é vitom mo á yiìn kibaʼrì kímóʼ kí é maàndzə mbìy. Mewón me lav mee fó yuv mè nèn dòr, e shaà mee fó sar bìʼ simsìn ye ŋkèʼ si sìmsìn.

⁷Kishém kímóʼ kí‑iì dzə̀ é mbìy wón lav ve á leey maàndzə mbìy, a kí wáv kóy nshòv sibaà e ghvə̀m e kintoʼnìn ki.

⁸Kí dzə̀ bey, bìʼ fo, e mbìv lav foo fèy, wón lavi‑iì wàv cáʼ kóy nshòv sibaà e ghvə̀m e kintoʼnìn ki, a veé mbìv ye yì leey lav cùu wáv kév kóy nshòv sitàn e mbaà.

⁹Shuu wúmóʼó‑oò nəə e lav fèy, a dzə̀ fó maàndzə mbìy, e mbìv lav ye yì leey fo shùy yii tó, nəə e ŋkèʼ wón lav yee fó sar,

¹⁰a kù dzə̀ é ghaa kor kishem. E mbìv yee tsə́n, e lò fo lav cù, kibaʼrì ke wón lav kímóʼ kí kù‑uù tíy sa fo, e shùu maàndzə yee fó mvəm, kiʼ sa lav ye yì‑iì dzəə̀n é bǎm lav cù.

¹¹Dzəə̀ kù‑uù nyèŋ sá e shùu kibàʼrì ke wón lav, a mewón me lav mè kù dzə̀ réŋréŋ moo meé mbìv yee kuy. Mbvə̀ʼ wùn à vida vi kù‑uù dzə̀ réŋréŋ, dzəə fèr réŋréŋ, shuu si réŋréŋ.

¹²Shuu wúmóʼó kù‑uù nəə sa e ŋkèʼ wón lav yee fó sar, e mbìv yee fo shùy yii tó, a kù dzə̀ é ghaa kor kishem kee fó.

¹³Wìr və̀y nèn sùúy e mò jii, «Wón lav ve á kiʼ lav cù, à fó mbìv yee kuy, à fó mbìv yee tsə́n víne dzə̀ vee jeéyí. Fóo fène dzə̀ fo atàá cù ve á yii cu NYÙY TÀRí wíy a yi vifá ve cù ve dzəə̀n vee jeéy ví féyì. Wón lav vìne kù dzə̀ vee jeéyí, a dzə̀ fo á kù wíy a lèm vifá ve cù ve dzəə̀n vee jeéy ví féyì, vé cù vifa ve yi, à vé cù ajay vi, e lì vé cù njòó.[59]

¹⁴Aàtàá cùu lìm lim e kirə̀ʼ kee jeéy keé lav cù, la áwune yòʼ nèn fəə̀ fəə́n é maàndzə ye kuʼùn. Áwune kù kér fóo tòmbìy shoʼtí ndzə̀y se á lim lim Nyùy sho, e lèm e kirə̀ʼ fen, bìʼ fo dzəə̀n ndzə̀y see jeéy sí. Áwune shóʼti bèy, aá nèn màʼ se sən sí, e bóo fəə e màŋgòŋ mvəm.»

¹⁵Wìr və̀y màysì, e fìʼ virə́ʼ vee kùm lav cù, e nèn lì mo, e fəə̀ kay dzə́ə fó shùu kibùʼ keé mbìv yee fo shùy yii tó, a dù, a fìʼ kirə́ʼ ke lav cù dzəə̀n shó lèn fo ndzə.

¹⁶Wù‑uù lì kicí ké mfìʼ, e fìʼ mbìv yee fo shùy yii tó, yì wáa dzə kóy nshòv sitàn e mbaà é wiì (125).[60]

¹⁷Wù kfən fìʼ mbìv yee kuy, yì kú a dzə sa réŋréŋ bey.

¹⁸Wù nèn bìnkìr, e fìʼ mbìv yee tsə́n, yì kú a dzə sa réŋréŋ bey.

¹⁹Dzə̀ sá réŋréŋ mo mbìv yee fo shùy yii nəə‑əə̀ dzəə̀n.

²⁰Á mo kirə́ʼ kí‑iì dzəə̀n bey, kóy nshòv sitàn e mbaà é wiì, mbìv sidzə̀m, a kayi kaárí, e fíʼ jàvsìn kirə́ʼ kee jeéy kí fo nsay yee rə̀y.