Read Lamnso Esiker 43 Bible Online

Esiker 43 - Lamnso bible

Esiker 43

¹Kee shooy ki shaà, wìr və̀y lì mo, e dù sho e shùu kày wo wú kiʼ fo shùy yii tó.

²M sàsìn, e yèn vikuʼùy vé Nyùy wìr veé Isray, a ví rán, njaʼkìr, wiy fo mbìv ntoshùy fèy. Ví‑iì wiy, koó moo ji tàtí ndzə́v, a gbù kóŋ, njaʼkìr, a kitú ke nsay ki rán ranén.

³Mò‑oò yèn kinyo kìn e njà kinjeenjèm, e neèm kfə̀ə́kfəv, e tsə̀m sí e nsay, a kí‑iì dzə̀ réŋréŋ moo ke mò‑oò yenen é ghan se Nyùy‑iì wiy ji wun laar ŋkàlaʼ, e kfə̀n a dzə sa réŋréŋ moo ke mò‑oò yenen é ghaa ndzəv yee Kebar.[61]

⁴Vikuʼùy vé NYÙY TÀR ví wìy bèy, e shaà dzə́ə fó shùu kày wo wú kiʼ mbìv yee fo shùy yii tó, e dù, e nə̀ə́ e lav cù.

⁵Kiyoy ke NYÙY TÀR kí nèn shùr mo, e nə̀ə́ sho e maàndzə yee fó mvəm, e ké ru kí, a vikuʼùy vé NYÙY TÀR ví rún ne lav cù.

⁶M yú a jì wìr súŋnin e mò fó lav cù, a yu bèy, a wìr və̀y kù dzəə́ tíy e mǒ ghaŋ.

⁷NYÙY TÀR yòŋ mo, e sùúy jii, «Wàn wìr msòŋ, tsə́rì və̀n dzə̀ fo m yii maʼ kàvàʼ wom, kfə̀n tiir wúu yém. Dzə̀ fen, fo m wíy a dzə e wír veé Israyí nsàn ŋkuuŋkùŋ. Bó wír veé Israyi yòʼ kfə̀n dzəə́ wìy a shoór yír yém ye ranéné. A dzə̀ jii, áwune, kìn afon véví yòʼ dzəə́ wìy a ghvəm mebvə̀m, aá yòʼ dzəə́ wìy a cù fə́m sé afòn vév gheéy.

⁸Afon veé Israyi‑iì yii vinyo vee bey, a ntoʼ wùn à lav yem cù kù dzə̀ kikur kimòʼón, nèn shoor yír yém ye ranéné e vinyo ve joònè ve á yii fo vi. Á bèy, m nèn laàr áwune é mvə̀m dòʼshwiíy.

⁹Kí nén a dzə lèn jii, áwune neer á mebvə̀m me ghvəmén mè, e shwèy fə́m se cuùn sí kwaʼda, é m nèn a dzə aáwuné nsàn ŋkuuŋkùŋ.

¹⁰«Fo ké kí wàn wìr msòŋ, naàrì e wír veé Israyi e naáy naáy mo lav cù ye à yenen dzəə̀n. Yìi, aáwune kiíy mfìʼ se lav rə̀n, e kiíy mo yì dzəə̀n, e nèn kwàʼtì kijuŋ, é woómé si wáa koo áwune bìʼ vinyo ve á bùʼtìn.

¹¹Áwune lóo ker dzə̀rkìtu bìʼ vinyo vidzə̀m ve á yiìn, à nèn yiì, aá kiíy dzə́ə ye lav cù rə̀n dzəə̀n shó. Ku yiì, aá kiíy mo shuu si nəəkin, e fəə̀kír, e kiíy dzə́ə ye á bomen lav sho e dzə̀m. Kfən yiì, aáwune kiíy kinyo ke m tinen kùm lav rə̀n kidzə̀m, e kiíy nsər se m foon bìʼ lav rə̀n. Sáŋ vinyo vìn vi é nsay aáwune yéné, aá fíʼ a ŋeèvì nsər sidzə̀m, a yiì mo ntò seé lav cù si dzəə̀n.

¹²Nsər ye yì tíy vitú kùm lav cù dzə̀ jii, e kèʼ fo yì tíyí, e kaarí kitú ke gwan, fóo kù sì kirə́ʼ kee jeéy kí féyì feyì.» Rúrú, kù sì nsər yee kùm lav cù bèy.

¹³Ké mfìʼ se kiy cù, á ku fìʼ sa e shùu mfìʼ ye á liìn, e bóo fìʼ lav cù, e nèn a fìʼ sa kíy cù sho.[62] Kiyiy ke kiy cù ki dzə̀ a kí kér kidoʼ, shoó, ntàm se kiwo sibaà, mbvə̀ʼ rə wáa dzə sa ntàm se kiwo sibaà. Sə́rí nen kòʼ ntàm kiwo. Fo ké vidà ve kiy cù vi,

¹⁴ŋkèʼ sar yee lò fó kiyìy, a koʼ, wáa dzə kintoʼnìn ke koy, kirə́ʼ ke simsìn kí nén a dzə, e kaàrí, e tàr, a mbvə̀ʼ dzə̀ ntàm kiwo. Ŋkèʼ ntìntìn nen kòʼ fó fo kóy e mòʼón, a kirə́ʼ ke simsìn kee fó ki kù dzə̀ sá ntàm se kiwo sibaà.

¹⁵Kirə́ʼ ké və̀y kí nen kòʼ fó fo e njà ŋkùv, kóy e mòʼón, kér loŋ si é kor see sikweè,

¹⁶a mbìv sé virəv sí dzə̀ kóy e taár taár, e kaàrí.

¹⁷Ŋkèʼ yee fo kirə́ʼ ké və̀y kí tíyí, kù dzə̀ sá réŋréŋ mbìv sidzə̀m, a dzə̀ ji kóy e taár e kintoʼnìn ki mbìv mòʼón mòʼón. Sə́rí kaárí fó, e tàr, e ŋàʼáy ntàm kiwo, a kidoʼ kee fó ki kù dzə̀ ntàm se kiwo sibaà. Dzəə̀ ye seʼtìn ye yì‑iì kóʼ e kiy cù fèy nén a kìʼ mbìv yee fo shùy yii tó.

¹⁸NYÙY TÀR nèn lò, e yòŋ mo jii, «Wàn wìr msòŋ, yuúrí nsər se m fó kùm kíy cù wo á wíy a yiì cu yém fó, a waŋrí mensə́ shoo, a kù fó mo woo NYÙY TÀR woo Taà Ndzə. Wíy lóo dzə e kishiíy ke á bàʼrìn kíy cù və̀n,

¹⁹à tàʼ wan nàʼ woo lumèn, aá yii cu ajay sho. Taʼà, à fò áàtàá cù veé ram Levi, vee ràm fo Tsadoki. Kù yii wiy áwune e mǒ si, yii cu si. Suuy mo woo NYÙY TÀR woo Taà Ndzə.

²⁰Ké mensə me wàn nàʼ və̀y, áà li memoʼ mè, e yòʼ é loŋ se kiy cù see sikweè, e kfə̀n yòʼ é kor se kiyìy see sikweè, e yòʼ sá e sər, e kaàrí, e tàr. Á dzə́ə ye à yíi yiì e kíy cùu, é bo á *kfə́mrí, é wú wáa dzə e ránén.

²¹Ké nyàm, áà li, aá du, e tòn e kirə̀ʼ ké lav cù fo kù dzə̀ á tòn, aá fəə́ ne kirə́ʼ kee jeéy kí.

²²Lóo dzə e kishiíy kee baà, áà fó kibév kee là nsem ji cú ajay, aá ku kfə̀mrí sa kíy cù sho réŋréŋ mo á kì kfəmrin e wàn nàʼ.

²³À maysì, kfə́mri kíy cù, à kù lì wan nàʼ woo là nsem wùn à kiyáʼ kee là nsem ki fó ŋgoo, e yiì cu sho.

²⁴À wiy sho, à dìn e NYÙY TÀR, áàtàá cùu kfəʼri shiŋgwáŋ sho, e nèn yiì cu NYÙY TÀR ye tonèné shó.

²⁵Kishiíy kidzə̀m fo kishiíy kee saàmbà, à kù wíy a tàʼ bvə́y yé a yiì cu ajay sho. Fo ké atàá cù ki, aáwune kú a tàʼ wan nàʼ, a tàʼ kiyáʼ, kù fó mvə̀m ŋgoo, a vifá vìn vi kù dzə̀ vee là nsem.

²⁶Dzə̀ kishiíy saàmbà mo á wíy kfəmrí kíy cù bèy, é wú wáa dzə e ránén, e fíʼ gheén e lìm Nyùy.

²⁷Á maysì kishiíy kee saàmbà kìn, e kèʼ fo kishiíy kee waamé, a dù fo mbìy, áàtàá cùu wáa neèr cu yén ye tonèné, a neèr yé kikòŋnìn[63] fo, é m nèn a səəsí ven. Suuy mo woo NYÙY TÀR woo Taà Ndzə.»