Read Lamnso Esiker 45 Bible Online

Esiker 45 - Lamnso bible

Esiker 45

¹«Vèn wíy lóo jàv nsay e rám seé Isray si ji vitsə́ʼ vév, á lèm mbìv yìmòʼ ji yee jeéy, a dzə̀ ji ŋgvən NYÙY TÀR. Ŋgvən rə̀n wíy a dzə may waamé fó vidà, a dzə may ntuùfú[64] fó vikùʼùy. Yì wíy a dzə jeéy ji kifá ke NYÙY TÀR, e dù, e bàʼ fo yì màyìn.

²Lav cù wíy a tiy e ŋgvən fèn, a kirə́ʼ ké lav cù ki wíy a dzə réŋréŋ mbìv sidzə̀m, kóy nshòv tàn e mbaà é wiì (125). Kirə́ʼ kímóʼ kí wíy kaarí lav cù, e tar, a mbvə̀ʼ dzə̀ kóy nshòv sibaà e ghvə̀m e kimbéʼ ki (12.5), a kí kù wíy a dzə kisáŋ.

³Ké ŋgvən NYÙY TÀR, áà ku shèr mbìv yìmòʼ fó fo, é yì wáa dzə may waamé fó vidà, a dzə amay ataár fo mbvə̀ʼ. Kù dzə̀ é mbìv fen, fo lav cù ye dzəə̀n kifá kee jeéy kí féyì feyì wíy a dzə.

⁴Mbìv rə̀n wíy a dzə jeéy ji nsay atàá cù, áwune ve á ŋeʼrì, wiy e NYÙY TǍR si, yii cu sə́. Dzə̀ fo lav sév sí wíy a dzə, é lav cù kú a tiy sa fo.

⁵Ké mbìv ye yì berin, a yì kù dzə̀ sá e mfìʼ may waamé é vidà, a dzə amay ataár fo mbvə̀ʼ, é wáa dzə ye wìr veé ram Levi, áwune ve á yii lim seé lav cù. Áwune kù wíy a bàʼrì ŋkà sév sé laʼ fo, a dzə sho.

⁶«E NYÙY TǍR ghaa ŋgvən, áà tín kirə́ʼ kímóʼ kí ji ké ŋkàlaʼ ye kuʼùn, a dzə̀ ye wìr veé Isray adzə̀m. Kirə́ʼ kin ki wíy a dzə may waamé é vidà, a dzə may e kintoʼnìn ki fó mbvə̀ʼ.

⁷«Á táti kirə́ʼ ké ŋkàlaʼ rə̀n wùn à ŋgvən NYÙY TÀR, bo taà saʼ wìr veé Isray wíy a ker rə́ə yee nsay fo ghaŋ e mbìv see sibaà. Kishév kímóʼ kí é mbìv yee fo shùy yii nəə, kímóʼ kí é mbìv yee fo shùy yii tó. Á ku tìn vikuʼùy vé vishev vìn réŋréŋ moo nsay ye á jav e rám seé Isray si, é mbvə̀ʼ kishev kee shó wáa dù, a bàʼ e bìíy wòŋ e mbìv yee fo shùy yii tó, a bàʼ e bìíy wòŋ e mbìv yee fo shùy yii nəə.

⁸Taà saʼ kù wíy a ker fó ji vitsə́ʼ və́ é nsay Isray, é la atǎr saʼa yòʼ dzəə wìy a ghiʼ wír vém ji á faasi kirə́ʼ. Áwune ku màʼtì kibér ke nsay e rám seé Isray si ji vév vee vitsə́ʼ.»

⁹NYÙY TÀR woo Taà Ndzə yòŋ aàtǎr saʼ veé Israyi jii, «Kí gheén lèn. Vèn meeme ntáymé, e meèmè nə̀ʼsì. Vèn wáa yiì vinyo vi, é ví wáa dzə tìítiy, a dzə réŋ, e làa yòʼ dzə́ə a faàsì virə́ʼ vé wìr vém. Suuy mo woo NYÙY TÀR woo Taà Ndzə.

¹⁰Mfìʼ yen kifa kú a dzə là kiloʼ, kìn dzə̀ kigátí, kìn dzə̀ mbìʼ.

¹¹Mfìʼ kigátí wùn à ye mbìʼ kú a dzə e mòʼón, aá ku lì a dzə̀ fo homer[65]. Vigátí ví kér fó nəə́ e homer e ghvə̀m, é tin si nəə́ sá bèy.

¹²Mfìʼ yen vidzəə̀sì wíy a dzə shekel[66], a shekel kér agera mbaà, aàshekel mntuùfuú dzə̀ mina e mòʼón.[67]

¹³«Vèn lóo yiì cu, vèn lì kirə́ʼ kimòʼón fo kee mntuùfú kí fó saŋ yee *wit, e lì sa bèy fo saŋ yee *barli.

¹⁴Fo ké meŋgvə̀r me *oliv mè, é vèn li kirə́ʼ kimòʼón fo kee wií kí.

¹⁵Mo vèn kér kwáʼ wo juŋ wó a lìy bvə́y sho e nsay Isray, ŋgoo bvəy mee ghii baà, vèn fə̀ə́r bvə́y fo fo e mòʼón. Vifá vìn vidzə̀m vi wíy a dzə vé cù vifa ve yi wùn à ye tonèné, à yé kikòŋnìne, aá yii cu sho, e fíʼ man ajay wíri. Suuy mo woo NYÙY TÀR woo Taà Ndzə.

¹⁶«Wìr dzə̀m woó Isray wíy tay vifá vìn, e lì, e dù, e yen taà saʼ woó Isray sho.

¹⁷Lím taà saʼa kù wíy a dzə ji wù taʼ á vifá ve cù, aá wáa yiì cu si shó e vishiíy vé ŋkàʼ, a yiì e ŋwee wo fíyi, a yiì e vishiíy vé bam, a dzə̀ jii, vishiíy vidzə̀m ve á sìysìn ji vé ŋkàʼ é Isray. Wù wíy a fo vifá ve á yii cú ajay sho, à vé cù vifa ve yii, à vé cù ye tonèné, e lì vé cù kikòŋnìn, aá cu Nyùy sho, e fíʼ man ajay wìr veé Isray.

¹⁸«NYÙY TÀR woo Taà Ndzə yoŋ jii, wíy lóo dzə e kishiíy ké mbìy ki, e ŋwee mbìyi, à tày wan nàʼ woo lumèn woo là nsem, e *kfə̀mrí lav cù sho.

¹⁹Ké mensə me cù ajay, é taà cù li memoʼ mè, e yòʼ mboòmè se shùu lav cù sho, e yòʼ kór se kiy cù see sikweè, e yòʼ sá mboòmè se shùu kày maàndzə woo fó mvəm shó.

²⁰Kù dzə̀ mo à wíy yiì e kishiíy ké ŋwee ke kí meen ji saàmbà, bìʼ wír wo wù yiìn jay woo là kiíy. Dzə̀ mo à wíy a kfəmrí lav cù bèy.

²¹«Lóo dzə e kishiíy kee nshòv sikweè e ghvə̀m e ŋwee mbìyi fó kiya, wìr dzə̀m kù yì *Ŋkǎʼ Yáʼayshaà. Vèn ku wìy a yi ŋkàʼ və́ne kishiíy saàmbà, lóo yi, á wàa yi kibán a dzə̀ kee là nyaà.

²²Kishiíy ké ŋkàʼ ké mbìy ki, taà saʼ fó wan nàʼ woo lumèn wo á yii cu ajay sho, e fíʼ man ajay və́, e man vé wìr dzə̀m.

²³Kishiíy ké ŋkàʼ kee saàmbà kìn kidzə̀m, é wù kú a tàʼ vifá ve cù NYÙY TÀR ye tonèné, ve dzəə̀n wón nàʼ vee vilum saàmbà, aá kér fó a dzə là nsem, e kfə̀n tàʼ viyáʼ saàmbà, é ví kú a dzə sa là nsem. Fo ké cù ajay ki, é wù kú a tàʼ kibév kishiíy kidzə̀m, aá wáa tsə̀ʼ ajay wíri shó.

²⁴Kee kùm cu NYÙY TÀR yee yé vifa ve yi, á li wan nàʼ woo lumèn, aá bár kigátí ké meŋkfə̀ŋ wùn aàlita meŋgvə̀r me oliv mè ataár e kimbéʼ ki, li sa kiyáʼ, aá yii réŋréŋ bey.

²⁵«Kí nen kfə̀n a dzə sa jii, lóo dzə e kishiíy kee nshòv sitàn e ghvə̀m, e saàmbà ŋwee, á kù a yiì sa ŋkàʼ kishiíy saàmbà. Lóo yi, é taà saʼ ku fò vifá ve cù réŋréŋ mo wù fó bìʼ və́sə woo ŋkàʼ, ji vifá ve cù ajay, à vé cù ye tonèné, à vé cù vifa ve yii, e lì meŋgvə́r me á yii táti sho.»