Read Lamnso Esiker 46 Bible Online

Esiker 46 - Lamnso bible

Esiker 46

¹Ke NYÙY TÀR woo Taà Ndzə suuy ki dzə̀ jii, «Lóo dzə e mvə̀m vishìíy vé lìm vee ntuùfú, á sə̀tí shúu kày maàndzə woo fó mvəm, wo wú kiʼ mbìv yee fo shùy yii tó. Lóo dzə e kishiíy ké bam, á kù mvə̀ʼ, e mvə̀ʼ sa e kishiíy ké *Ŋkǎʼ Ŋwee wo Fíyi, e tìír e rə́.

²Taà saʼ wiy, é wù nəə́ é kibùʼ, e dù, e tìím e ghaa kitom ke kirəsí. Taà cù lóo yiì cu rə́ ye tonèné, lóo yiì sa yé kikòŋnìn, é wù kú a tiy e ghaa kikùr keé shùu kibùʼ, a ghvəm NYÙY TÀR. Wù maysì cu, é wù nèn fəə̀ é ndzə, yii bèy, é la á yòʼ sə̀tí shúu kibùʼ, e dù, e bàʼ e ŋkuùr.

³Màŋgòŋ lóo wìy e NYÙY TǍR si e vishiíy vé bam, lóo wìy e shùu ŋwee wo fíyi, aá ku tìím a dzə̀ é shùu kibùʼ fèy, a ghvəm NYÙY TÀR.

⁴Vifá ve taà saʼ wíy a cù NYÙY TÀR shó e kishiíy ké bam ji cu ye tonèné, ví wíy a dzə wón njiì ntuùfú, vee là nsem, wùn à kiyáʼ kee là nsem ki.

⁵Wù lóo yiì cu yee shooy, wù wàa ker kigátí ké meŋkfə̀ŋ e ghaa kiyaʼ ji cu vifa ve yi. Ké wón njiì, é meŋkfəŋ mè kú a dzə mo vitaáví və́ ví dzəə̀n, é wù kfə́n a ker meŋgvə́r me *oliv alita ataár ataár e ghaa kigatí kee shó.

⁶Lóo dzə e kishiíy ké Ŋkǎʼ Ŋwee wo Fíyi, é taà saʼ yii cu e wàn nàʼ woo lumèn, woo là nsem, e yiì e wón njìi ntuùfú, e yiì e kiyáʼ ki, a kù dzə̀ nyám see là nsem.

⁷Cú vifa ve yii wíy a dzə kigátí ké meŋkfə̀ŋ e ghaa wàn nàʼ woo lumèn, kigátí é ghaa kiyaʼ. Ké wón njiì, é wù taʼ meŋkfəŋ, é mè kuʼ mo vitaáví və́ ví dzəə̀n, é wù wáa ker meŋgvə́r me oliv alita ataár ataár e ghaa kigatí kee shó.

⁸Taà saʼ lóo wìy, wù kù wìy dzə́ə fó kirəsí ké kibùʼ, lóo kfən, é wù ku shaà dzə́ə fó fo.

⁹«Màŋgòŋ wiy e vishiíy vé ŋkàʼ ji á ghvə́m NYÙY TÀR, wìr nəə dzə́ə fó shùu kày wo wú kiʼ kuy, bo wù kér fóo yìi fəə fo wo wú kiʼ tsə́né. Wìr nəə fo wo wú kiʼ tsə́né, bo wù kér fóo yiì fəə fo wo wú kiʼ kuyi. Lá wìr yòʼ mùm nə̀ə́ fo shuù, e kfə̀n fəə̀ fo wo wù kì nəən fó foo. Wù kér fóo dù duùn fó mbìy tìítiy.

¹⁰Á wíy lóo nəə́, taà saʼ nə̀ə́ wùn áwune, á lóo fəə, wù fəə̀ sá wùn áwune.

¹¹«Lóo dzə e ŋkàʼ se wíri yii cu NYÙY TÀR, taà saʼ wìy e wàn nàʼ woo lumèn, e wìy e kiyáʼ ki, e wìy e wón njìi, e yiì cu sho. Wù ku wìy sa e kigátí ké meŋkfə̀ŋ ki é ghaa wàn nàʼ woo lumèn, e wìy e kímóʼ kí é ghaa kiyaʼ. Ké wón njiì, é wù taʼ meŋkfəŋ, é mè kuʼ mo vitaáví və́ ví dzəə̀n. Wù taʼ sá meŋgvə́r me oliv, e lì alita ataár ataár, e bàr é ghaa kigatí kee shó.

¹²A tàm taà saʼ wùmòʼ wàa kòŋ ji wun cu NYÙY TÀR e cú kimbòŋwùné, kìn dzə̀ ye tonèné, kìn dzə̀ yé kikòŋnìn, wù wáa wìy, wír ve á lim e lav cùu mvə̀ʼ shuu wo wú kiʼ mbìv yee fo shùy yii tó, é wù yii cu rə́ réŋréŋ mo wù yii yii e vishiíy vé bam. Wù yii, maysì, fəə́, lóo dù, á kù nèn sə̀tí shuu woo shooy nsənnsən.

¹³«Vijàvndzə vidzə̀m, á kù wíy a yiì cu ye tonèné e wàn njiì woo kiyá, woo là nsem, a cù NYÙY TÀR shó.

¹⁴Á ku tàtí cu rə̀n wùn à yé vifa ve yii, a yiì vijàvndzə vidzə̀m. Á li meŋkfəŋ fo kigátí kintóʼ kimòʼón fo vee ntuùfú ví, e lì meŋgvə́r é lita, a dzə̀ me á tóv meŋkfəŋ sho ji cú NYÙY TÀR yé vifa ve yi. Kù sì nsər cù bèy, e wìy dù, e mày.

¹⁵Á mo á wíy a lì wan njiì, a tatí wùn à meŋkfəŋ mè, à meŋgvə́r mè, a cù NYÙY TÀR shó bèy, e wìy dù, e mày.»

¹⁶«Ke NYÙY TÀR woo Taà Ndzə yoŋ ki dzə̀ jii, a taà saʼ woó Isray wùmòʼ lò, e tìn kirə́ʼ kfə́ ké nsay kímóʼ kí, e fò e wan və wùmòʼ ji sì á kfə́, bo kí kù goʼ e wàn ŋkuuŋkùŋ. Dzə̀ vitsə́ʼ vév.

¹⁷Yii bèy, a wù lì kirə́ʼ ke dzəə̀n vitsə́ʼ və́, e fò a dzə̀ e ŋgaà lìm və wùmòʼ, bo wù kù wíy keerí, e dù, e meé e *Kiya ke Nsiìr Vifa,[68] é bo kí sii kfə̀n e taà saʼ kfəə. A dzə̀ kù a ker wan taà saʼ cáʼ kirə́ʼ ké tàr wov, e wìy dù, e mày, bìʼ fo dzəə̀n vitsə́ʼ və́.

¹⁸Lá taà saʼ yòʼ wìy jùm wír fo kirə̀ʼ ke dzəə̀n vitsə́ʼ vé kfəə, e faàsì fó. Wù ku fò a dzə̀ kfə́ kee kirə́ʼ ke dzəə̀n və́ vee vitsə́ʼ e wón vəə́, é la kí yòʼ kòóy ji á fəə́r wír fo wír vémé fó kirə̀ʼ ke dzəə̀n və́ vee vitsə́ʼ.»

¹⁹Wìr və̀y nèn lì mo, vèr wun tósín fó nsàn yeé ghaa shùu kày, e dù, e mèé e shiŋgoo she wón lav vee jeéy, ve dzəə̀n vé atàá cù, aá kiʼ mbìv yee kuy. Wù dùŋrì kirə́ʼ e mò é mbìv ntoŋrìshùy mo shiŋgoo she lav shìy shi duùn, a ndzə̀y.

²⁰Wù yòŋ e mò jii, «Kirə́ʼ kin ki dzə̀ fo atàá cùu naa nyám ye dzəə̀n ye cù njò, á nàá ye cù ajay. Kù dzə̀ sá fo á fer kibán ke tonèn kí kee meŋkfəŋ me cù vifa ve yii. Á yii bèy ji lá áwune yòʼ fəə̀ shó e maàndzə mbìy, fo wíri kum vifá vee jeéy ví, e lì jiv.»

²¹Á bèy, wù nèn lì mo, vèr wun fəə́ é maàndzə mbìy. Á fəə́ bey, e nèn dù e buu se maàndzə see sikweè, a buú e mòʼón mòʼóne dzə̀, aá gím kirə́ʼ moo shimaàndzə bèy.

²²Virə́ʼ vin vidzə̀m vi kú a dzə réŋréŋ ji kóy e ghvə̀m fo vidà, mbvə̀ʼ kóy saàmbà e kintoʼnìn ki.

²³Fó mvəm, aá bóm, e kaàrí, e tàr, e tùúy kíy si.

²⁴Wìr və̀y nèn yòŋ e mò jii, «Féne dzə̀ fo wír ve á yii lim seé lav cùu wíy a naá vifá ve ví lo fo cù ye wíri wiy sho.»