Read Lamnso Esiker 47 Bible Online

Esiker 47 - Lamnso bible

Esiker 47

¹Wìr və̀y nèn lì mo, e kfə̀n shó e ghaa shùu lav cù. M lòo leéy, e yèn ntòŋ ndzə̀v, a yì fəə́ fo sar kikùr ke shùu lav cù, léŋ, du e mbìv ntoshùy, kù mo lav cù‑uù tíy, kiʼì. M kfən yèn ndzə́v, a yí léŋ, fəə́ fo sar kirəv ké lav cù e mbìv yee tsə́n, léŋ, shaa kíy cù fo mbìv yee tsə́n.

²Wìr və̀y nèn lì mo, vèr wun fəə́ fó maàndzə lav cù, a shaà dzə́ə fó shùu kày wo wú kiʼ kuy. Á fəə́, e kaàrí kay, e mèé e shùu kày wo wú kiʼ mbìv ntoshùy, m yén wan ndzə̀v, a wù léŋ, fəə́ fo fo e mbìv yee tsə́n.

³Wìr və̀y nèn lò, a dù e mbìv ntoshùy, a wù kér kfəə̀ mfìʼ e kiwo. Wù wáa dù, a fìʼ, e fìʼ, e dù mèé kóy kishóv mtàn e ghiì baà (250), vèr wun nəə́ é ndzəv é si se wuù.

⁴Wù nen kfə̀n kòʼtí fo mbìy, kóy kishóv mtàn e ghiì baà (250), vèr wun nəə́ é ndzəv, a yí dzə̀ é ŋkoŋ. Wù kfən dù fo mbìy kóy wúmóʼó kishóv mtàn e ghiì baà (250), e lì mo, vèr wun nəə́ é ndzəv, a yí sì é mentìntìn.

⁵Wù kfən siì dù fo mbìy kóy kishóv mtàn e ghiì baà (250), a sì ndzə́v ye bó yòʼ dzə̀ wìr tùm é nsay, bìʼ fo yí‑iì runen ne, ye dzə̀ wìr kù làʼ láʼán.

⁶Wù nèn ghày e mò jii, «Wàn wìr msòŋ, à səə́m kinyo kìn a?» Wìr və̀y nèn lì mo, vèr wun siìr ŋkfənèr, a gwàm e ghaa ndzəv.

⁷Mo á kfə́n bèy, m yén, a vicí ví teʼ e ghaa ndzəv nyanyày, ǎ mbìv fen, ǎ mbìv fésə.

⁸Wù lò, e sùúy e mò jii, «Ndzə́v rə́ne léŋ bèn, du e mbìv ntoshùy, sə́y e Mboʼ Araba. Yí nəə e Ndzə́v Shiŋgwaŋ ye yí tíy tiyín, yí yiì, mendzə́v mee fó mè kfə̀n ji me juŋ mè.

⁹Ndzə́v rə́ne shaa e kirə̀ʼ, bo vifá ve ví kár e ndzəv ví yíi a dzə fo, a ŋèʼ. Sə́ si wíy a dzə fo nyanyày. Rúrú, ndzə́v rə́ne wíy yiì, é mendzə́v meé Ndzə́v Shiŋgwaŋ mè kfə́n ji me juŋ mè. Yí shaa e kirə̀ʼ, é vifá vi wáa ŋèʼ fo, a yu vijuŋ.

¹⁰Wíri wíy a koo sə́ fo Ndzə́v Shiŋgwaŋ, e kèʼ fo En‑Gedi, e dù, e meé e En‑Eglayim, a sàŋ alálán e ghaa ndzəv. Sə́ si wíy a dzə kfəə́ e neénín moo se sí dzəə̀n é Rìbà Ndzə̀v woo Mediteranean.

¹¹Yii bèy, vishàʼshaʼ ve Ndzə́v Shiŋgwaŋ vi kù wíy gòʼ bèy ji virə́ʼ vé shiŋgwaŋ.

¹²Kfəə́ se vici vidzə̀m vi wíy a tèʼ, a koóm e ghaŋ se ndzəv fen, ye yí yii, a Ndzə́v Shiŋgwaŋe kfə́n e juŋ, aá wáa kòy, a kfər. Bó vav sév sí yòʼ wíy a yum e ghan símóʼ sí gheéy, a bó ví yòʼ wíy a shaàrì fó a koóm. Ví kù wíy a koóm báŋ se fíy si ŋwee sidzə̀m, bìʼ fo mendzə́v mev mè lo a dzə̀ fo Nyùy lav cù. Báŋ sév sí wíy a dzə viyíkìr, é vav sév sí wáa dzə shív.»

¹³Kinyo ke NYÙY TÀR woo Taà Ndzə yoŋ ki dzə̀ jii, «À wíy lóo jàv nsay e wír veé Israyi mo rám see nshòv sibaà e ghvə̀m si dzə̀kìn, à kù jùmrì bìíy se m lo, e dìn. Dzə̀ vitsə́ʼ vév, a kfə́ə Joosevi kù wíy a ker vilíŋ vibaà.

¹⁴Kibér, áà jav réŋréŋ. Mò‑oò lo kàʼ atàr vén e nsay rə̀n, á bèy, sì vitsə́ʼ vén.

¹⁵«Bìíy se nsay rə̀n si wíy a dzə jii, e mbìv yee kuy, bìíy keʼ fo Rìbà Ndzə̀v woo Mediteranean, e kìʼ Hetlon, a dù e kiŋgwàmrì ke Hamat, e shaà, e dù e Tsədad.

¹⁶Yì lo fo fo, é yì du é Berota, e dù e Sibrayim, a dzə̀ fo Damaskus wùn à Hamat jàvìn bìíy, e shaà, e dù, e bàʼ e Haser‑Hattikon, a fóo dzə̀ é bìíy Hauran.

¹⁷Á mo bìíy wíy nyeŋ fo Rìbà Ndzə̀v woo Mediteranean bèy, e dù, e bàʼ e Hasar‑Enon, a wù dzə̀ é mbìv yee kuy fo Damaskus, e mbìv tsə̀n Hamat. Á bìíy wòŋ e mbìv yee kuy.

¹⁸«E mbìv ntoshùy, é bìíy keʼ fó Haser‑Enon, e nsàn Hauran wùn à Damaskus, e gwàm e wǔn ndzəv yee Jordan, e nsàn Gilead wùn à nsay Isray, e nèn shaà, e gwàm e wǔn Ndzə́v Shiŋgwaŋ, e sə̀y é mbìv yee tsə́n, e dù, e bàʼ e mvə̀mlaʼ yee Tamar[69]. Á bìíy wòŋ e mbìv ntoshùy.

¹⁹«Lóo dzə e mbìv yee tsə́n, é bìíy lo fó Tamar, e dù, e bàʼ e ndzəv seé Meribat‑Kadesh, e nəə́, e gwàm e kiwoóy keé Ejiv, e dù, e ndzə̀y e Rìbà Ndzə̀v woo Mediteranean. Á bìíy wòŋ e mbìv yee tsə́n.

²⁰«E mbìv yee fo shùy yii nəə, é bìíy nyéŋ é Rìbà Ndzə̀v woo Mediteranean, e dù, e bàʼ, aá sí yiì a kìʼ kiŋgwàmrì ke Hamat. Á bìíy wòŋ e mbìv yee fo shùy yii nəə.

²¹«Á mo vèn wíy jàv nsay rə̀n e věn mvəm, kù mo rám seé Isray si dzə̀kìn.

²²Vèn wíy jàv nsay rə̀n ven ven, a ker ji vitsə́ʼ vén, lóo jàv, á fò sá yé viŋgwìy ve ví dzə́ e věn mvəm, kér wón ve á dzəəkin wùn à wón véné. Áwune kù sí wìy a dzə e věn mvəm moo wón nsay veé Isray. Áwune kù wíy a ker nsay ye siìn vitsə́ʼ vév e rám seé Isray sí nsàn.

²³Kiŋgwìy ki lóo dzə e rám yee shóo nsay, bo dzə̀ fo vèn kù wíy fo wun kirə́ʼ ji və́ vee vitsə́ʼ. Suuy mo woo NYÙY TÀR woo Taà Ndzə.»