Read Lamnso Esiker 48 Bible Online

Esiker 48 - Lamnso bible

Esiker 48

¹Yír sé ram seé Isray si sìne, à nsay ye rám yee shóo wíy a ker. Nsay rám Dan wíy a dzə e wòŋ Isray fo kùukùy. Bìíy wíy lò fo Rìbà Ndzə̀v woo Mediteranean, a dù e Hetlon, e shaà, e dù e kiŋgwàmrì ke Hamat, e kù dù bèy, e meé e Hasar‑Enan, fo Damaskus wùn Hamat jàvìn bìíy, a Hamat dzə̀ kfə́ fó kùy. Á bèy, é nsay rám Dan nèn shèr woŋ Isray, e lò fo bìíy wòŋ e mbìv ntoshùy, e dù, e meé e yeé mbìv ntoŋrìshùy.

²Nsay ye yì səʼən ye rám Dan dzə̀ ye rám Asher, a yì kù shèr woŋ fo mbìv yee fo shùy yii tó, a kfənér fo yì yii nəə.

³Nsay ye yì səʼən ye rám Asher dzə̀ ye rám Navtali, a yì shèr woŋ fo mbìv yee fo shùy yii tó, a kfənér fo yì yii nəə.

⁴Nsay ye yì səʼən ye rám Navtali dzə̀ ye rám Manasse, a yì shèr woŋ fo mbìv yee fo shùy yii tó, a kfənér fo yì yii nəə.

⁵Nsay ye yì səʼən ye rám Manasse dzə̀ ye rám Efrayim, a yì shèr woŋ fo mbìv yee fo shùy yii tó, a kfənér fo yì yii nəə.

⁶Nsay ye yì səʼən ye rám Efrayim dzə̀ ye rám Ruben, a yì shèr woŋ fo mbìv yee fo shùy yii tó, a kfənér fo yì yii nəə.

⁷Nsay ye yì səʼən ye rám Ruben dzə̀ ye rám Juda, a yì shèr woŋ fo mbìv yee fo shùy yii tó, a kfənér fo yì yii nəə.

⁸Kishév ke kí wíy səʼ ké rám Juda ki wíy a dzə ŋgvən yee jeéy, a kí kù lo fo mbìv yee fo shùy yii tó, a kfənér fo yì yii nəə, réŋréŋ mo vishév veé ram seé Isray vi gháné. Mbvə̀ʼ kishev kìn wíy a dzə may e ghvə̀m, e lò fo mbìv yee kuy, e dù e yee tsə́n. Lav cù wíy a tiy e ntìntìn kirə̀ʼ fen.

⁹Kirə́ʼ ke á wíy lèm ji ŋgvən NYÙY TÀR kí wíy a dzə e mvə̀m kishev fèn, a kí dzə̀ may e ghvə̀m fo medà, a dzə may waamé[70] fó mbvə̀ʼ.

¹⁰Atàá cùu wíy a ker kishév kímóʼ kí e NYÙY TǍR mvə̀m ŋgvən, a vida vi dzə̀ may e ghvə̀m e mbìv yee kuy à yee tsə́n, é mbvə̀ʼ wáa dzə amay akweè, e kèʼ fo mbìv yee kuy, e dù e yee tsə́n. Lav cù NYÙY TÀR wíy a tiy e ntìntìn kirə̀ʼ fen.

¹¹Kirə́ʼ kee jeéy kin ki wíy a dzə ké atàá cù vee ràm fo Tsadok. Áwune kù‑uù yúnin mo, e làa yòʼ bìn ndzə̀m moo wír veé Isray ve vé‑eè bìnèn ndzə̀m e mò, wír veé ram Levi ámóʼó bìn sa.

¹²Kirə́ʼ kin ki wíy a dzə fómo wov woo jeéy e NYÙY TǍR mvə̀m ŋgvən, a dzə̀ nsay yee jeéy féyì feyì, a yì sə́ʼ nsay wìr veé ram Levi.

¹³Kirə́ʼ ke kí wíy a səʼ ké atàá cù ki dzə̀ ké wìr veé ram Levi, a mfìʼ si wíy a dzə sa ji may e ghvə̀m fo vidà, a dzə may e kweè fo mbvə̀ʼ. Vida feyì feyì vi kù wíy a dzə may e ghvə̀m, é mbvə̀ʼ wáa dzə amay akweè.

¹⁴Lá áwune yòʼ wìy fiìnè kirə́ʼ fó fo. Lá áwune yòʼ wìy kùvsín. La á yòʼ wìy màʼtì kirə́ʼ fó fo e wìr wo sən, bìʼ fo kirə́ʼ kin ki dzəə̀n jeéy ji ké NYÙY TÀR.

¹⁵Nsay ye yì berin fó ŋgvən yee jeéy nén a dzə amay abaà fó mbvə̀ʼ, a vida vi kù dzə̀ may e ghvə̀m. Wíy a dzə kirə́ʼ kee kiy fo a dzə̀ wìr dzə̀m wàa bàʼrì láʼ si, e kfə̀n a ker kwáʼ si, é ŋkàlaʼ wòŋ wáa dzə fo ntìntìn.

¹⁶Mfìʼ se ŋkàlaʼ si wíy a dzə may e kintoʼnìn ki mbìv sidzə̀m.

¹⁷Ŋkàlaʼ wíy a ker kirə́ʼ keé ŋgèŋgèr, a kí neém, a dzə kóy kishóv mtàn e ghiì baà (250), kù bey mbìv sidzə̀m.

¹⁸Nsay ye yì berin é kishev fèn, ke kí sə́ʼ ŋgvən NYÙY TÀR, nén a dzə amay akweè e mbìv ŋkàlaʼ ye yì kiʼ ntoshùy, e kfə̀n a dzə amay akweè e mbìv ye yì kiʼ fo shùy yii nəə. Vifá ve á lim fo vi wíy a dzə ve ví yiir vé lìm veé ŋkàlaʼ.

¹⁹A dzə̀ vé lìm veé ŋkàlaʼ adzə̀me wàa lìm kwáʼ və̀n, a wìr fə̀m lò a dzə̀ fó ram rəneé.

²⁰Ŋgvən ye á tinen, e tìír ji ye vinyò vímóʼ ví kú a dzə may e ghvə̀m mbìv sidzə̀m.

²¹Ŋgvən rə̀n dzə̀, a lav cù dzə̀ shó, a nsay atàá cù dzə̀ shó, à ye wìr veé ram Levi, e lì kirə́ʼ ké ŋkàlaʼ. Nsay ye yì berin é mbìv yee fo shùy yii tó, à yee fo shùy yii nəə nén a dzə ye taà saʼ. Yì kù dzə̀ may e ghvə̀m mo ŋgvən yee jeéy rə̀y dzəə̀n, e dù, e bàʼ e bìíy wòŋ, e dàr e mbìv fen, ǎ mbìv fésə. Fo mbìv yee kuy, yì nyéŋ é bìíy ràm yeé Juda, e nyèŋ sá e bìíy ràm yeé Benjamin fo mbìv yee tsə́n.

²³Fo kibér ke ram seé Isray ví nsay, rám Benjamine nen sə̀ʼ yé taà saʼ fo mbìv yee tsə́n, e shèr woŋ fo mbìv yee fo shùy yii tó, a kfənér e mbìv yee fo yi yii nəə.

²⁴Nsay ye yì səʼən ye rám Benjamin dzə̀ ye rám Simeon, a yì shèr woŋ fo mbìv yee fo shùy yii tó, a kfənér e mbìv yee fo shùy yii nəə.

²⁵Nsay ye yì səʼən ye rám Simeon dzə̀ ye rám Issakar, a yì shèr woŋ fo mbìv yee fo shùy yii tó, a kfənér fo yì yii nəə.

²⁶Nsay ye yì səʼən ye rám Issakar dzə̀ ye rám Sebulun, a yì shèr woŋ fo mbìv yee fo shùy yii tó, a kfənér fo yì yii nəə.

²⁷Nsay ye yì səʼən ye rám Sebulun dzə̀ ye rám Gad, a yì shèr woŋ fo mbìv yee fo shùy yii tó, a kfənér fo yì yii nəə.

²⁸Bìíy nsay rám Gad e mbìv yee tsə́n, nen lò fo Tamar, e dù, e bàʼ e ndzəv seé Meribat‑Kadesh, e nəə́, e gwàm e kiwoóy keé Ejiv, e dù, e ndzə̀y e Rìbà Ndzə̀v woo Mediteranean.

²⁹Á nsay ye vèn ku jàv e rám seé Isray si, é rám yee shóo koóy rə́ə yee nsay, a ker ji vitsə́ʼ vév. Suuy mo woo NYÙY TÀR woo Taà Ndzə.

³⁰Shuu se kày se ŋkàlaʼ si wíy a dzə jii, ŋkàlaʼ wíy a ker shúu kày nshòv sibaà e ghvə̀m, e kaarí, e tar. Kirə́v keé mbìv yee kuy ki dzə̀ may e kintoʼnìn ki,

³¹a shuu si wíy a nəə fo sitaár, e yír yir ji wó Ruben, wó Juda, wó Levi, aá ku shù a dzə yír sé ram seé Isray.

³²Ké kirəv keé mbìv yee fo shùy yii tó, é kí wáa dzə sa may e kintoʼnìn ki, é shúu wáa nəə́ fo e taár, e yír yir ji wó Joosev, wó Benjamin, à wó Dane.

³³Ké kirəv keé mbìv yee tsə́n, kí kù dzə̀ sá may e kintoʼnìn ki, é shúu wáa nəə́ fo e taár, e yír yir ji wó Simeon, wó Issakar, wó Sebulun.

³⁴Ké kirəv keé mbìv yee fo shùy yii nəə, é kí wáa dzə may e kintoʼnìn ki, é shúu wáa nəə́ fo e taár, e yír yir ji wó Gad, wó Asher, wó Navtali.

³⁵Ŋkàlaʼ rə̀n wíy a dzə may ntuùfú móo kaarí, e tar. Kèʼ fo lèn, a dù, yír ŋkàlaʼa sí wìy a dzə ji NYÙY TÀR Dzə̀ Fó.