Read Lamnso Esiker 5 Bible Online

Esiker 5 - Lamnso bible

Esiker 5

¹NYÙY TÀR yòŋ e mò jii, «Wàn wìr msòŋ, ké lèn ki, lì nyùy rə̀r ye njimén, e kòm kitú ké ki shó, e kòm sá kighev. Kómé, à lì nə́ŋ, e fìʼ, e jàv virə́ʼ vitaár.

²Vishiíy ve á faasin ŋkàlaʼ vi mayì, à lì kintóʼ kee kimòʼón ki fo vee vitaár vi, e tòn e ntìntìn nsáŋti ŋkàlaʼ. Lì kintóʼ kímóʼ kí, e neèr, e kaàrí ŋkàlaʼ sho, e shètì e nyùy rə̀r. Maysì kintóʼ kímóʼ kí, áà táʼár é shwer, é m shóʼ nyùy yem rə̀r fó kiburúʼ, e shèm shó fo bàm.

³Lèm nə́ŋ símóʼ sí shishàr, e sə̀ə́y e wò shùu ndzə̀y.

⁴Kfən ŋèʼ símóʼ sí fó fo shishàr, e tòn e və̀y. À tonè, é və́yí lo fó fo, e ràmtìn, e sùm mo və́yí wíy sùm wír veé Isray adzə̀m.»

⁵NYÙY TÀR woo Taà Ndzə kfən sùúy jii, «Abaày vèné, ku lèéy Jerusalem. M lèm fó e kintìntìn ke wòŋ, a vitúm vi kaárí fó, e tàr.

⁶Jerusalem lò ne fo fo, e bìn ndzə̀m e mǒ nsər si, e ŋwày sáʼ yém. Áwune yiì ne liì kisaŋ, wù shaá wo vitum ve ví kaarin áwune, e tàr.»

⁷Á bèy, ke NYÙY TÀR woo Taà Ndzə suuy e wír veé Jerusalem ki dzə̀ jii, «Vèn wìy ne e ŋgeʼ si, sí shaá sé wìr ve á kaarin ven, e tàr, bìʼ fo vèn yoʼ yùnín ntir sém, e kù ŋwày sáʼ yém ŋwayín. Vèn kòytí ne a dzə̀ liì wìr ve á kaarin ven, e tàr.

⁸Bìʼ bey, bo ke suuy mo woo NYÙY TÀR woo Taà Ndzə ki dzə̀ jii, m sí ban ven. Mómò, m yíi màʼ ŋgeʼ e věn kitu, a vitúm vi yéné.

⁹Bìʼ joonè wo vèn yii və̀n e dzə̀m, m wíy yiì kinyo e vèn, a dzə̀ ke m yòʼ‑oò yiìn ne yiì, a bó m yòʼ kfən dzəə́ wìy yiì.

¹⁰Bo dzə̀ jii, atàrí wíy lò, a kfər wón, é wóné wáa kfər atàr e věn mvəm. M wíy màʼ ŋgeʼ e věn kitu, maʼà, é m táʼár wír wo wù berin, vitóŋtóŋ vidzə̀m.

¹¹«Kí nén a dzə jii, mo m dzəə̀n shó e tin, mo woo NYÙY TÀR woo Taà Ndzə, e ké ru kí, mo vèn bivirin ne lav yem cù e mebvə̀m mè, e yiì kfə́ə joònè wo m yii ban e dzə̀m fo, bo m lo, e shèr tíŋ wón. M yòʼ wíy bavtí ven, a bó m yòʼ wíy a ker mendzən.

¹²Kintóʼ ke wìr fo vintóʼ vee vitaár ki wíy kpu yé kifə̀ʼ, kìn yé jiŋ, e věn mvə̀m ŋkàlaʼ, é kintóʼ kímóʼ kí kpú é shùu rər, se sí maʼ, e kaàrí ŋkàlaʼ, e tàr. M wíy màysì kibér, e taʼár vitóŋtóŋ vidzə̀m, e shoʼ aáwuné bàm e nyùy rə̀r.

¹³«Á mo m wíy lovtí e vèn bey, é bo dòʼshwíiy wom kpúrín, é shilív shí rəsin mo. M wíy dìn kilòŋ kém ke shwiiyín kí e vèn bey, é vèn nèn kìíy ji mò‑oò súŋnin, tín kàʼ won bey, bìʼ kíyrí ye m kíyri ven.

¹⁴M wíy siìr woŋ wón ji vifə̀m, é vitúm ve ví kaarin ven ví wáa leéy, a kèŋ, é nshaàdzəə̀ wáa kèŋ sa.

¹⁵M wíy shwiíy kilòŋ, shilív shí lóo ndzəʼ mo bìʼ ven veé Jerusalem, m maʼ ŋgeʼ si e věn kitu, é wìr dzə̀m woo věn ghaŋ yén rə́mrə́m kinyò wo m yiìn e vèn, a fàn. Á wíy a leéy ven, a nyàysì, a bèm ven. Mo woo NYÙY TÀR yòŋ ne bèn.

¹⁶M wíy màʼ jíŋ, é yì koó ven, a laàr, a vèn wíy a yu, a yì nəə́kir e věn wùn moo mvə́n toòkì.

¹⁷M tsə́nsi jíŋ, é m tsə́nsí sá nyám se kwaʼ, é sí wáa laàr wón vén, e kfə̀n tsənsí kifə̀ʼ, é kfə̀n yiì, é kinjuyrìwìr ki távkír e věn nsàn, e siì yiì, aá yúyrí ámóʼó a dzə̀ é shùu rər. Suuy mo woo NYÙY TÀR ben.»