Read Lamnso Esiker 6 Bible Online

Esiker 6 - Lamnso bible

Esiker 6

¹NYÙY TÀR‑iì lò, e sùŋnín e mò,

²e yòŋ jii, «Wàn wìr msòŋ, bìnèr sí yée, a kìʼ agwan veé Israyi, e tìn kàʼ wov.

³Yòŋ jii, agwan veé Isray, á ku yuùrí a kinyo ke NYÙY TÀR woo Taà Ndzə suuyì. NYÙY TÀR woo Taà Ndzə yoŋ e vèn veé agwan, yoŋ e veé aŋkoŋe, à veé ŋguùŋè se ndzəví, yoŋ e veé viwoóyí jii, ‹Ké ru kí, mómò, m wíy tsənsí rə́r, é sí nəə́ ven, a m wíy laàr virə́ʼ ve vèn cu anyùy sho vidzə̀m.

⁴Á wíy kètì kíy sén sé cù, e bvəʼtí kíy se kilay, e yuyrí wír vén e věn kilaʼáy ké mebvə̀m.

⁵M wíy sàŋrì dzə́n sé wìr veé Isray e mebvə̀m mev mè si, e taʼár vighvə́r vév é ghaŋ se kiy se cù.

⁶Á wíy kètì ŋkà sén sé laʼ se vèn dzə́ sho sidzə̀m, e sàʼtì virə́ʼ ve vèn cu anyùy fo, é kíy sén sé cù si bvəə́rí, aá bvə́ʼtí mebvə̀m men, e laàr. Á kù wíy taʼár kíy sén sé kilay sidzə̀m, é lim yén rən e dzə̀me lay kisáŋ.

⁷Á wíy yuyrí wíri e virə̀ʼ vidzə̀m fo vèn dzə̀kìn, é wír ve á gòʼòn atine nèn kìíy ji m dzə̀ á NYÙY TÀR.

⁸« ‹Yii bèy, m wíy bavtí ven ámóʼó, aá bér ashàr, e lùŋ, a dzə e vitum fo á wíy koorí, e dù sho.

⁹Wír ve á bòyìn, á dú shó e vitume wíy a kuumé mo, a kiíy ji m màʼ ŋgeʼ aáwuné kitu, e shòór áwune, bìʼ á fo vé‑eè ŋwayin mo, a ghvəm a dzə̀ mebvə̀m, a tinsín mo. Á kuúme, aá wáa woomé, bìʼ liì wov kisaŋ, à vinyo ve joònè ve áwune‑eè yiìn ví vidzə̀m.

¹⁰Áwune wíy kiíy ji yiì a mo woo NYÙY TÀR vinyo vìn, e kfə̀n kiíy ji bó m yòʼ‑oò lo bòʼtí áwune á bóʼtín ji m yíi màʼ ŋgeʼ aáwuné kitu.› »

¹¹NYÙY TÀR woo Taà Ndzə kfən yòŋ e mò jii, «À leey liì kisaŋ wìr veé Isray, kí à kù kwàʼ a dzə̀ wó, e tòŋ ji waàwáa, e kfə̀r kiwuú é nsay, bìʼ joonè wo áwune yii? Feyì feyì, áwune kù‑úù kpú é shùu rər, e kpu wó jiŋ, e kpu kifə̀ʼ.

¹²Ve á dzəə̀n kwaʼdáa wíy kpu wó kifə̀ʼ, é ve á dzəə̀n fó ghaŋe kpú é shùu rər, é kibér ki kpú jíŋ e mvə̀m ŋkàlaʼ, a rə́r sí sə́tí ne fó. Á mo m wíy yiì aáwune bey, é bo dòʼshwíiy wom may.

¹³Áwune wíy kiíy feyì ji dzə̀ mo NYÙY TÀR, a vimkpú ve wíri ví néŋnin wùn à mebvə̀m mev mè, e ghaŋ se kiy se cù, virə́ʼ vidzə̀m fo vé‑eè ton kiláy, cu mebvə̀m mev shó. Á kù wíy a neŋnín bèy aàŋkoŋ adzə̀m, a neŋ e vitu ve agwan adzə̀m, a neŋ e sar se vici ve rəŋsìn ví vidzə̀m, e lì vicí vé *terebint vidzə̀m.

¹⁴Á mo m wíy lì vitaáví vém, e kìʼ áwune shó, e siìr woŋ wóv é vifə̀m, é wú lay kisáŋ. M kù wíy yiì bèy virə́ʼ vidzə̀m fo áwune dzə̀kìn, e kèʼ fo woʼ yeé tsən, e dù, e bàʼ e ŋkàlaʼ yee Ribla e mbìv yee kuy. M yii bèy, aáwune nèn kìíy ji m dzə̀ á NYÙY TÀR.»