Read Lamnso Esiker 8 Bible Online

Esiker 8 - Lamnso bible

Esiker 8

¹Yì‑iì dzə̀ é kiya ke kí‑iì sí du ji ntuùfú, mo vèr‑iì dzə̀ʼə̀mèn ne e kwaʼ nsàm, m wáa dzə e mǒ lav ver à vilìmbìy veé Juda vi, e ŋwee woo ntuùfú, e kishiíy ke kí‑iì meen ji tàn. M lòo sìn, vitaáví vé NYÙY TÀR woo Taà Ndzə vi wìy, e kùm mo.

²M lòo leéy, e yèn kifá, a kí shwínin wír.[2] Kèʼ fo mentìntìn, a səy, fóo fèyi‑iì dzə̀ é njà və̀y, e kèʼ fo fo, a koʼ fo kùy, a fóo njaʼkìr moo kisha kee *brons ke á sòrìn.

³Wù tsə́nsí kifá moo kiwó, e bàm mo shó fo nəŋ. Kiyoy ke Nyùy ki shúr mo é yuv, e ghàn shó e njà kinjeenjèm, e dù sho e Jerusalem. Kí dù sho bèy, e lèm e shùu kibùʼ wo wú nəə e maàndzə lav cù, e mbìv yee kuy fo shibvə̀m shímóʼ shí dzəə̀n, dzə́ fo bèy, tínsin NYÙY TÀR é ŋàŋ.

⁴M wáa dzə fo bèy, e lò yèn vikuʼùy vé Nyùy mo ví ráné, wun woo Nyùy wìr veé Isray, kù mo mò‑oò yenen é ghaa ndzəv yee Kebar e njà kinjeenjèm.

⁵NYÙY TÀR lò, e yòŋ e mò jii, «Wàn wìr msòŋ, nàn sí yée lèn, e kìʼ mbìv yee kuy.» M nàn, e yèn a shibvə̀m shi tíy fo, e maàndzə fo kíy cùu dzəə̀n, tíy fo, e ghaa shùu kibùʼ fo mbìv yee kuy. Kù‑uù dzə̀ shibvə̀m shìn she shí‑iì tínsin NYÙY TÀR é ŋàŋ.

⁶Wù kfən yòŋ e mò jii, «Wàn wìr msòŋ, à yèn ne kinyo ke kí kooyì à? Kí à yén joonè wo wír veé Israyi yii fèn ji á kiír mo shó, e lèm kwaʼda fo mǒ lav cù. Yii bèy, à kù dzəə́ lo, e yen joonè wo wú shaa woo shoon.»

⁷Wù nèn lì mo, e dù sho e kibùʼ ke kí nəə e maàndzə yee fó ndzə, e mbìv yee kuy. M leéy, e yèn a shúu nəə e wǔn kirəv.

⁸Wù yòŋ e mò jii, «Wàn wìr msòŋ, kùʼùr shuu woo shooyi.» M kùʼùr, e tò é nshìy shùu lav.

⁹Wù yòŋ e mò jii, «Mvə̀ʼ nshìy, e nə̀ə́, áà yén kfə́ə virìm ve á kfə́r fo.»

¹⁰Á bèy, m nəə́, e yèn vindzə̀ə́ndzəm ve vifa ve ŋaŋrìn ví, à vé nyàm se koʼoyín sí, aá sáŋ é wǔn lav, e yèn mebvə̀m me wír veé Israyi ghvə́mé medzə̀m.

¹¹Vilìmbìy veé Isray vi‑iì dzə̀ fó msaàmbà, tíy e vifá vìn ví si, a Jaasania woo wan Shafan tíy aáwuné mvəm. Wìr mòʼón mòʼón‑eè tíy, kér kikáŋ ke kilay é kiwo, a kindzə́ʼ ke kilay kí dzəm, kóʼ fo fo.

¹²Wù nèn yòŋ e mò jii, «Wàn wìr msòŋ, kí à yén kinyo ke vilìmbìy ve wìr veé Isray vi yii fo mesənér.» Wìr kù‑uù bár e wun wàn lav fo shibvə̀m she wù ghvə́m shi dzəə̀n, aá kù sévti jii, bó NYÙY TÀR yòʼ yén ver, NYÙY TÀR màʼày ne nsay rə̀n.

¹³Wù ku siì yòŋ e mò jii, «À kù dzəə́ lo, e yen nshoʼvìròm wo áwune yii, e shaà vin.»

¹⁴Wù nèn lì mo, e dù sho e shùu kibùʼ ke kí nəə e NYÙY TǍR lav cù, e mbìv yee kuy. Abaày, m yén, a vikìy dzə́ fo, diy kpú nyùy woo Tammus.

¹⁵Wù dzə́r e mò jii, «Wàn wìr msòŋ, à yèn ne ka? À kù dzəə́ lo, e yen joonè wo wú shaa və̀n.»

¹⁶Wù nèn lì mo, e nə̀ə́ sho e maàndzə yee NYÙY TǍR lav cù. M yén, a vilum dzə́ fo moo wír nshòv sitàn e mbaà bey, tíy e ghaa shuù wo wú nəə e lav cù, e nsàn kishem wùn à kíy cùu, aá bín ndzə̀m e NYÙY TǍR lav cù, a kìʼ a dzə̀ mbìv yee fo shùy yii tó, a ghvəm sí shùy.

¹⁷NYÙY TÀR dzə́r e mò jii, «À yèn ne ka? Óò mboò, wàn wìr msòŋ, wír veé Judàa li ji kinyo kee fó tèr, bó a yiì joonè wo á yii və̀n a? Á tàtí woŋ, e sùm e vinyo ve buʼtìn ví, e tìnsín mo, e yiì, dòʼshwíiy wom kóʼ. Áwune bìvír yír yém é dzəə ye biibí féyì.

¹⁸Bìʼ bey, m lo, e dìn dòʼshwíiy wom aáwuné kitu. Bó m yòʼ lo, e leéy, e bavtí, a bó m yòʼ yíi a rər mendzən mev. Aáwune fèn tòŋ e mǒ vitùʼùr, a waamé waamén, bo bó m yòʼ yíi yuurí.»