Read Lamnso Esiker 9 Bible Online

Esiker 9 - Lamnso bible

Esiker 9

¹NYÙY TÀR lò, e sùŋnín kitávín, m yú a wù yoŋ jii, «Ven vee anshìy ve á lo, á tsəə̀né wír e kisəə, vèn fəə́kír fen. Wìr wáa fəə e kifá kfə́ ké kileemé kí kiwo.»

²Wíri meékír ntuùfú fó shùu kibùʼ keé mbìv yee kuy, e lò fo lav cù, a wìr mòʼón mòʼón kù kér kifá kfə́ ké kileemé é kiwo. Wùmòʼ wáa dzə fo, a wù máʼ ndzə̀y, a sí dzə̀ ji lèvrì lèvrì, kér mbvə̀ʼə̀r vifa ve á sáŋ ŋwàʼ sho. Áwune nèn wìy, e tìím e ghaa kiy cù woo kisha kee *brons.

³E ghan sin, a rán NYÙY TÀR woó Israyi ló ne fo mvə̀m lav, fo yí‑iì dzəə̀n é kitu ke *vifa veé yuv ve ví kér vav si, e dù, e tìím e kikùr ke shùu lav cù. NYÙY TÀR yòŋ kinyo e wìr wo wù‑uù kér ndzə̀y see lèvrì lèvrì, kfə̀n kér mbvə̀ʼə̀r vifa ve saŋ.

⁴NYÙY TÀR suúy shó jii, «Nəə́, e tòʼnín ŋkàlaʼ Jerusalem, e dòn kisəəm kí e wìr dzə̀m yírvishi, wo wù leey vinyo ve koʼoyín ví ve á yii e mvəm wó, a wù leey, diyì, shwémkirì.»

⁵Wù nèn yòŋ e kibér ke wìr ki, a m yú, jii, «Vèn shaa, e tòsín ŋkàlaʼ e wun bàm, a yuyrí wíri. Lá vèn yòʼ lèéy wír, e bàvtí, lá á yòʼ rə̀r mendzən feyì.

⁶Vèn yúyrí vilum vee ŋgày sé wìr, e yùyrí wónlě nsùm wùn à wónlě ŋgòne, à wón ve terií, à vikìy, yii bèy, lá vèn yòʼ kùm wír wo wù kér kisəəm e wun yírvishi. Vèn keʼ fo mǒ kirə̀ʼ ke ranén kí.» Á bèy, á ku nèn kèʼ fo vilìmbìy ve ví‑iì dzəə̀n é shùu lav cù vi.

⁷NYÙY TÀR kfən yòŋ aáwune jii, «Vèn lór lav cù, é yì bír. Vèn fúm dzə́n sé wíri sí é maàndzə. Vèn shaa fó mbìy.» Á ku nèn tsə̀ə́m, a yuyrí wíri é mvə̀m ŋkàlaʼ.

⁸Mo á yúyri wíri du, m kú a dzə fo vèr mòʼón. M lò, e gbù kfə̀ə́kfəv, e bùʼ shirəə́, e ghày jii, «Abaày, NYÙY TÀR woo Taà Ndzə, dòʼshwiiy wò kì yíi koʼ bìʼ wír veé Jerusalem, áà tátí kibér ke wìr veé Isray, e yuyrí à?»

⁹Nyùy bìnèr e mò jii, «Njò wìr veé Isray wùn Juda kùʼ ne e ŋàŋ. Woŋe sì mensə́ mensə́, a ŋkàlaʼ kù sì yíi kisaŋe e dzə̀m. Áwune yoŋ ji NYÙY TÀR màʼày ne woŋ və̀n, a bó wù yòʼ dzəə́ yén áwune.

¹⁰Á bèy, kém kí nén a dzə sa jii, bó yòʼ dzə̀ m lèéy áwune, e bàvtí, a bó m yòʼ yíi rər mendzən mev. M yíi lovtí aáwune mo njiìn wov dzəə̀n.»

¹¹Kù é ghan see shó, wìr wo wù‑uù kér ndzə̀y see lèvrì lèvrì, kfə̀n kér mbvə̀ʼə̀r və̀y nèn kfə̀n é bàm, e naàrì lim rə́ e NYÙY TÀR jii, wun dzə̀ a wun lóvtí á mo á kì yòŋèn ji wun wàá du, e lòvtí.