Read Lamnso Daniel 3 Bible Online

Daniel 3 - Lamnso bible

Daniel 3

¹Fòn Nebukadnessar nèn fèr shibvə̀m e *kisha ke mbàm ke baar kí, a vida və́ ví dzə̀ kóy nshòv sitàn e ghvə̀m, vikuʼùy ví wáa dzə kóy e kimbéʼ ki. Wù‑uù tùúy shibvə̀m shee shoon a dzə̀ é mboʼ yeé Dura e wun kishev ke wòŋ ke dzəə̀n Babilon.

²Fòn Nebukadnessar tsə́nsí toóy ji atǎr saʼ ve á sáʼ mbìv sé wòŋ se kuʼkìn sí wùn à vé saʼ ve á dzəə̀n aáwuné sari wàá báʼtí. Wù toóy sá vé saʼ ve á sáʼ meliŋèn e mvə̀m wòŋ wùn à vé ntiri, à wír ve á yii lem mbàm e vitàví, e lì wír ve á yii lim e kinyò kee kùm nsər, wùn à vé saʼ adzə̀me báʼtí sá, e wìy, aá shéʼrí á shibvə̀m she wun woo Nebukadnessar tuuyin.

³Vé saʼ vìne báʼtí adzə̀m adzə̀m ji á shéʼri a shibvə̀m she Fòn Nebukadnessar tuuyin. Á báʼtí, e tìím e shibvə̀m shee shooy shí si.

⁴Gwèy nèn a fuŋ jii, «Wìr dzə̀m yuúrí, kìn dzə̀ wir kitum kìka, kìn woó wòŋ vəné, kìn wù súŋnin a dzə̀ lám gha. Fòn suuy jii,

⁵‹Vèn yií yú, aá tóŋ sóŋ, e tòŋ loŋ, e kùm lúŋ, à yé nshìí, e lì yé mbàytì, vèn yú, a vifá vìn vi tátí ne, e làŋsìn, kiléŋléŋ kí wáa koʼ, vèn waà tsə̀m é nsay, a ghvəm a shibvə̀m she wun woo Fòn Nebukadnessar tuuyin.

⁶A wìr tèn ji wun yòʼ tsə́m e nsay, e ghvəm shibvə̀m shìn, bo á li ŋgaàŋ, e màʼ e kimbiirìn ke və̀y ke kí bo, gheʼèmè.› »

⁷Á bèy, ghán sí gheén, vifá ve cèŋ vìn vi súŋnín, e làŋsìn, kiléŋléŋ kí kóʼ, wìr dzə̀m, a fə̀m dzə̀ wír kitum kìka, kìn woó wòŋ vəné, a wù fə̀m súŋnin lám a dzə̀ vəné, á ku nèn tsə̀m fó nsay, a ghvəm shibvə̀m she Fòn Nebukadnessar tuuyin.

⁸Wáa dzə e ghan see shooy, wír veé Babilon ámóʼó fəə́sín e fòn si, a roòmè wónlě nsùm veé Juda vee aŋgàa ŋgoo Daniel.

⁹Á bùn Fòn Nebukadnessar jii, «Nyàr, sáʼ rəə́ kú a tiy a fo, e dù, e jòʼsì.

¹⁰Nyàr, á lo fò á sáʼ jii, aá tòŋ loŋ, e kùm lúŋ, à yé nshìí, e lì yé mbàytì, á yú, a vifá vìn vi tátí ne, e làŋsìn, kiléŋléŋ kí wáa koʼ, wìr dzə̀m waà tsə̀m, e ghvə̀m á shibvə̀m she fòn fèrìn e kisha ke mbàm ke baar kí.

¹¹Yii bèy, wìr tén ji wun yòʼ tsə́m e nsay, e ghvəm shibvə̀m shìn, bo á li a ŋgaàŋ, e màʼ e kimbiirìn ke və̀y ke kí bo, gheʼèmè.

¹²Wónlě nsùm vee wír veé Juda ámóʼó dzə̀ á mo fòn‑eè lèmèn ji á wáa leéy a vinyo vee wun kishev ke wòŋ ke dzəə̀n Babilon. Áwune dzə̀ á ji Shadrak, Meshak wùn Abednego. Nyàr, wónlě nsùm vìne ŋwáy a sáʼ fòn ŋwáyín. Áwune yòʼ ghvə́m a anyùy və́, a bó á yoʼ lò ghvə̀m á shibvə̀m shee kisha ke mbàm ke baar kí, she fòn‑eè tuuyin.»

¹³Á bèy, Fòn Nebukadnessar túmnín, a tímé sí ndzə́ʼ ndzəʼə́n, e sùúy ji á koórí á Shadrak wùn à Meshak, à Abednego, e wìy a sho. Á koórí wónlě vilum vìn, e wìy sho e fòn si.

¹⁴Fòn dzə́r aáwune jii, «Shadrak, Meshak, à Abednego, kù yòʼ dzə̀ rú ji vèn tèn fóo ghvəm anyùy vém, e tèn fóo ghvəm shibvə̀m she mò‑oò tuuyin á?

¹⁵Kí nén a dzə̀ jii, vèn dzəə́ yìi yu sóŋ, e yu loŋ, e yu lúŋ, à yé nshìí, e lì yé mbàytìi, é vifá vìn vi laŋsin, é kiléŋléŋ kí wáa koʼ. Vèn kù yòʼ yíi yu, a dzə kibáʼtín fóo tsəm, a ghvəm shibvə̀m she mò‑oò fèrìn á? Yii bèy, a vèn tèn, bo á kù‑úù li ven é nsənnsən, e màʼ e kimbiirìn ke və̀y fo və́yí bo, gheʼèmè, é m yén ó nyùy woo shó wo wù yíi fəə́r ven fó fo.»

¹⁶Shadrak wùn à Meshak, à Abednego nèn bùn fon jii, «Nyàr káʼ, bó shií wùmòʼ yòʼ dzə̀ á wo dzə̀ vèr wàa tunér kitú kér e fòn.

¹⁷Nyàr, a fèn dzə̀ ji á mo kí dzəə̀n, bo Nyùy wor wo vèr ghvə́mé kér vitaáví ve dzə̀ wù fə̀ə́r á ver fó kimbiirìn ke və̀y ke kí bo kìn, a wù kù yíi bòyìr a ver fo fòn wo.

¹⁸Yii bèy, a Nyùy fə̀m tèn fóo sə ver, nyàr, bo bó yòʼ dzə̀ féyì feyì vèr mùm á ji á ghvə́m nyùy və, kìn ji vèr wáa sùyrì shibvə̀m she fòn fèrìn e wóo, e tùúy shìn.»

¹⁹Mo áwune bìnèrìn bey, kinyo kìy ki nəə́ e Fòn Nebukadnessar vighìy, rə́r sə́ sí kúvsín bìʼ Shadrak wùn à Meshak, à Abednego. Wù nèn fò sáʼ e vé lìm vəə́ ji á yuŋri á və́y é kimbiirìn fèy, é kí ríʼsín, e shaà mo kí yii lumè.

²⁰Wù fó sáʼ ji vé nsər ve tavkín ámóʼó fo wun mvə̀m vé rərí bám á Shadrak wùn à Meshak, à Abednego, e kùr, e màʼ a e kimbiirìn ke və̀y fey.

²¹Á ku nèn kùr áwune, aá dzə̀ e ndzə̀y sí é wùn, e dòm e kimbiirìn ke və̀y fey, a vé‑eè màʼ vikúm vév ve da vi, e ndzə̀m ndzə̀y seé kitu, e wày asə̀là ve dáa, à ndzə̀y símóʼ sí.

²²Və́y wo wú bo e ŋàŋé‑eè fə̀ə́r kiyúy, kí yúyrí vé nsər ve vé‑eè liìn Shadrak, wùn à Meshak, à Abednego, e dù, e màʼ fo, bìʼ fo sáʼ fòne kù‑uù siìn féyì ji á yuŋri á və́y, é wú ríʼsín, e shaà a mo wú yii lumè.

²³Yii bèy, wónlě vilum vee ataár vee Shadrak, Meshak wùn à Abednego gbù kév e mvə̀m kimbiirìn ke və̀y fey, e kù a dzə fo mo á kì kurin.

²⁴Fòn Nebukadnessar lò, e tùm é yuv, a shúu má ne wun. Wù dzə́r e vé ntir vəə́ jii, «Vèsən yoʼ lò màʼ wíri é və̀y ataár, aá dzə̀ akúrín a?» Áwune bùn fon jii, «Nyàr, dzə̀ á mo kí kì dzəə̀n.»

²⁵Fòn nèn kù a suúy aáwune jii, «Vèn leéy, m yén wír akweè, aá ghán e mvə̀m və̀y, aá yòʼ dzə̀ə́ akúrín, a bó və́yí yòʼ kum áwune, a wo wù meen ji kweè shwínin nshìylav Nyùy.»

²⁶Fòn Nebukadnessar nèn bìʼtí e shuù wo wú nəə e kimbiirìn ke və̀y fey, e fuùŋé kitávín jii, «Shadrak, Meshak, Abednego, ven vee aŋgàa lim Nyùy woo Taà Vitu, vèn fəə́kír, e wìy fèn. Áwune vee ataári ku nèn fəə̀kír fo mvə̀m və̀y fey.»

²⁷Á bèy, atǎr saʼ ve á sáʼ mbìv sé wòŋ se kuʼkìn sí wùn à vé saʼ ve á dzəə̀n aáwuné sari, à vé saʼ ve á sáʼ meliŋèn e mvə̀m wòŋe, à vé ntiri báʼtí ji á kù‑úù yén ó a wír vìn ve á ghaʼan və́y. Á leéy, e yèn, a bó və́yí yoʼ kùm ŋgay nəŋ fo wìr kitu, kìn kirə́ʼ kév, kìn ndzə̀y fo áwuné wùn. Fə̀m kirəm ke və̀y, bó kí yòʼ‑oò ló a koʼ fo wìr wùn.

²⁸Fòn nèn sùúy jii, «Búríi wáa dzə fo Nyùy wo Shadrak, wùn à Meshak, à Abednego ghvə́mé. Wù‑uù tsə̀nsí nshìylav rə, yì wíy, e bòyìr vé lìm və́ ve á yeʼtin a dzə̀ e wun wùn, e tèn fóo yunín nsər yem, e fò vitú vév ji bòŋ aá nyavri aáwune, e shaà fo áwune ghvə́m nyùy wùmòʼ, e shaà Nyùy wov.

²⁹Bìʼ bey, sáʼ yémé nén a dzə jii, ‹A fə̀m dzə̀ wír vəné, kìn woó kitum fèé, kìn wù súŋnin a dzə̀ lám gha, wù mvəʼ shuu, e yòŋ kinyo ke kisaŋ ki, e kùm Nyùy wo Shadrak wùn à Meshak, à Abednego ghvə́mé, á kù shètì ŋgaàŋ e vintin vintin, e laàr láʼ sév, é sí kfə́n é vifə̀m sidzə̀m, bìʼ fo bó yòʼ dzə̀ nyùy wùmòʼ bòyìr wír e dzəə ye wóov bòyìrìn áwune shó.› »

³⁰Á bèy, fòn nèn kù kòʼór antaʼ Shadrak wùn à Meshak, à Abednego e mbìv wòŋ yee Babilon.