Read Lamnso Daniel 4 Bible Online

Daniel 4 - Lamnso bible

Daniel 4

¹Fòn Nebukadnessar‑iì lò, e tsə̀nsí kisúŋnìn e wír vee wùn sar saʼa adzə̀m, kìn dzə̀ veé kitum kiné kí, kìn veé wòŋ vəneé, kìn á súŋnin a dzə̀ lám gha, a kí‑iì dzə̀ jii: «Nyaáŋ wo wù dzəə̀n e věn mvəm kú a kuy kuyín.

²«M yèn ji bòŋ a ke m fer e vèn viŋgaʼnìn ve vinyò ve Nyùy woo Taà Vitu yiìn e mò, a kù dzə̀ vinyo ve ví din vitaáví və́.

³«Vinyo ve ví din vitaáví və́ ví shoò é ŋàŋ, a viŋgaʼnìn ve vinyò ve wù yii vi dzə̀ viwiíwíy. Kù dzə̀ wun fon ghán sidzə̀m, e dù, e jòʼsì, a sáʼ rəə́ kù wíy a tiy fo, mo ŋgwàʼ wíy a koʼ, a fo ghay e yìmòʼ.

⁴«Mo woo Nebukadnessar‑iì néŋ e mǒ ntoʼ ji dèʼ, a vinyo vém ví gháné.

⁵Kù mo mò‑oò néŋ e ntoʼ e mǒ mbvə̀ʼ, njèm nèn lò, e shì mo, wúné lò, a beemé mo beemén. Vinjeenjèm vi wìy e mǒ kitu, m yén vindzə̀ə́ndzəm, a ví shaasìn, bémer mo.

⁶Á bèy, m nèn tòóy vé si veé Babilon ji á wiy, e tòʼtí a njèm rə̀n, e fò e mò.

⁷Vé fù ve á yii tóʼti njèm wùn aàŋgàa ŋgàŋe wìykìr, à vé səme adzə̀m, e lì wir dzə̀m wo wù yii yén virə́ʼ. Á wìy, m fèr njèm yem aáwune, la á yòʼ yù fóo toʼtí nsàv.

⁸Fo bàm, Daniel nèn wìy, wun wo vé‑eè shuùn yír yímóʼó ji Belteshasar, kù mo yír nyùy womé dzəə̀n, a dzə̀ wír wo wù yú kinyo fo kiyoy ke anyùy ve á dzəə̀n aránéné. Wù dù, e wìy, m wáa naarì njèm yem shó, a suúy jii,

⁹‹Éè Belteshasar, wò woo kilìmbìy ke vé sii, m kì ji à kér kiyoy ke anyùy ve á dzəə̀n aránén, a bó yòʼ dzə̀ kilìtì ke kinyò ki ghàʼ wò. Njèm‑eè shì mo. Ku tòʼtí nsàv vinyò ve mò‑oò yenen ví, e fò e mò.›

¹⁰«Kù mo mò‑oò loòn ji m bóŋ shimbuùné, vinjeenjèm vi wíy e mǒ si, m yén kicí, a kí tíy e ntìntìn wòŋ, a kí dár é ŋàŋ.

¹¹Kicí kin ki‑iì dàr, e tàv é ŋàŋ, e dàr, e kòʼ kùm yúv. A wìr‑iì tìím feé, a fə̀m dzə̀ é ndzəywoŋ, wù kù yèn.

¹²Vav sə́ sí‑iì səə́ne bèn ji lìŋ, báŋ si kfən kòóm sho sinín, a kí kér viyíkìr ve yì‑iì dzə̀ ví yìír wir dzə̀m. Nyám se kwaʼ sidzə̀m si kù‑uù bee a dzə̀ é sar wo, a menə́n mè kù baʼrì a dzə̀ é tam si wó. Kifá ke ŋeʼèn kí kidzə̀m ki kù‑uù yíkir a dzə̀ fó fo.

¹³«Kù mo m néŋ fo, buúne, vinjeenjèm vi kú a shaà e mǒ si, m yén nshìylav Nyùy, a yì sə́y fo yuv. Nshìylav, a dzə̀ yee ŋgaà ŋkiy, a yì dzə̀ e ránén.

¹⁴Yì fuúŋé kitávín, e yòŋ aàŋgaà və́ ŋgoo jii: « ‹Vèn baʼ kicí kiy ki, e shètì tám si. Vèn soóy vav sə́ sí, e tàʼár báŋ se sí koomen shó si. Nyám si ku tàʼrí fo sar wo taʼrín, é menə́n mè léʼkír fó tam si wó.

¹⁵Yii bèy, vèn ku màʼtì kinyè ké kici wùn à gháŋ sí. Á ku kùr, e səə̀nè e kisha kee kisha ki, e səə̀nè e kee *brons ki, é kí goʼ, a tiy e nsay. Vèn maʼti, é kí kú a tiy e mvə̀m viŋgà bey. Ŋwéʼe kú a gbù e ŋgaàŋ wùn, é wúné wáa rə̀, é wùn à nyám si wáa dzə, a yi a dzə̀ viŋgà veé kwaʼ.

¹⁶Á ku kùvsín vifií və́ fo vé wìr vi, é ví kfə́n e vé nyàm kwaʼ vi, e kù gòʼ bèy, e bǎm kiya saàmbà.

¹⁷Sáʼ rə̀ne dzə̀ ye nsheèlav se Nyùy si wìyìn shó. Nshèelav, a dzə̀ see aŋgàa ŋkiy. Kù dzə̀ sáʼ aŋgaà ve ranéné, a yí dzə̀ ji wìr msòŋ e dzə̀m kú a kiíy a jii, sáʼ a Nyùy woo Taà Vitu vitúm ve wìr msòŋ vidzə̀m. A wù kòŋ, wù fò sáʼ e wìr wo wù koŋè, e dzə̀ʼə̀r wír wo wù yòʼ yén kitú kfə́, wù wàa saʼ vifon.›

¹⁸«Á njèm ye yì‑ii shiin mo woo Fòn Nebukadnessar. Á bèy Belteshasar, ku tòʼtí nsàv, é m yú. Njèm rə̀n‑ee gháʼ ne vé si vee mǒ kitum adzə̀m fo á tóʼtí. Yii bèy, a dzə̀ kù tòʼtí wò, bìʼ fo à kér kiyoy ke anyùy ve á dzəə̀n aránén.»

¹⁹Daniel wo yír rə́ yímóʼó kfə̀n‑eè dzəə̀n ji Belteshasar ku nèn rə̀ə́y kfə́ rəəyín, shúu yúm wun fo bǎm shintàm. Wù rə̀m vinyo, wúné beémé wun. Fòn nèn lò, e tòóy wun jii, «Belteshasar, lá njèm rə̀n, kìn nsàv rə yòʼ a beemé wò.» Belteshasar bìnèr jii, «Nyàr, kí bòŋ a ji njèm rə̀n ku yiì kùm a dzə̀ á wír ve á taʼ kinyè ké fòn ntéŋ, é nsàv rə koó a dzə̀ á aŋgàa vibàn veé ntoʼ.

²⁰Kicí ke fòn yenen kí‑iì dzə̀, a kí tàv é ŋàŋ, e dàr, e kòʼ, e kùm a yúv. Wìr fə́m tiim fèé, a fə̀m dzə̀ é ndzəywoŋ, wù kù wàa yèn, e kìíy.

²¹Vav sə́ sí‑iì səə́ne bèn ji lìŋ, a báŋ si koóm shó sinín, a kí kér viyíkìr ve a yì‑iì dzə̀ ví yìír wir dzə̀m, a nyám se kwaʼ si kù‑uù bee shúy a dzə̀ é sar wo, a menə́n mè kù baʼrì a dzə̀ é tam si wó.

²²Éè bvərə̀ʼ, kicí ke vé‑ee yenen é njèm kìn ki dzə̀ á wun woo fon. Dzə̀ á wun mo sáʼ rəə́ kuyin, a ker vitaáví é ŋàŋ. Vikuʼùy və́ ví kóʼ, e dù mèé e yuv. Woŋ wo fòn sáʼáa kúʼ ben, e dù mèé a fo nsay jòʼsìn.

²³«Tàr wor kfən yèn nshìy lav Nyùy, a yì sə́y fo yuv, nshìylav ye yì‑iì dzəə̀n ŋgaà ŋkiy, a yì dzə̀ e ránén. Yì‑iì sə́y, fúŋ kitávín, yoŋ ji á baʼ á kicí kiy, e laàr. Yii bèy, á maʼti á kinyè wùn à gháŋé. Á ku kùr á kinyè, e səə̀nè e kisha kee kisha ki, e səə̀nè e kee brons ki, e màʼtì, é kí kú a tiy e mvə̀m viŋgà bey. Ŋwéʼe kú a gbù e ŋgaàŋ wùn, é wúné wáa rə̀, é wùn à nyám se kwaʼ si wáa yi a dzə̀ viŋgà veé kwaʼ, e kù wìy a yi bèy kiyá saàmbà.

²⁴«Nyàr, á yú á mo nsàv wàa dzəə̀n. Á yú á mo Nyùy woo Taà Vitu tinen á ji kí waà yíi koóy tàr wor woo fon.

²⁵Nsàv dzə̀ á jii, á yíi jùm a wun fo wírí mvəm, aá du, a dzə a dzə̀ á wùn à nyám se kwaʼ si é kighìn, é fòn ku wìy a yi a dzə̀ á viŋgà é bǎm kiya saàmbà moo mbòŋ, a shiíy e kwaʼ, é ŋweʼe wáa gbù a e wun wùn. Kí kù wíy koóy a wun bèy, e meé mo á wíy binsí ji kù sáʼ Taà Vitu kitúm ke wìr msòŋ kidzə̀m. A dzə̀ kù fò wun e wìr wo wù shoʼon ji wù wáa saʼ.

²⁶Kù mo nshìylav Nyùy‑iì foon sáʼ ji á ku màʼtì kinyè ké kici wùn à gháŋ sí é nsay, bo dzə̀ á ji á kù dzəə́ wìy siìr a sáʼ rə́ fo. Fòn wíy binsí ji sáʼ a Nyùy woó yuv kitú ke nsay, aá nèn siìr a fo.

²⁷Nyàr, kí nén a dzə a jii, fòn ku yù á ntir yem. Á ku tìn á kiwuú fó yiì ye bií, a tiy a dzə̀ á e yiì ye juŋe, e fətí wó fo vinyò ve bi ví, a sham a dzə̀ aghéʼncey. Á yii bèy, e ghanmóʼó, aá kfən shaà fo mbìy, a yu a vijuŋ.»

²⁸Vinyo vìn vidzə̀m vi ku nèn lò, a koóy Fòn Nebukadnessar.

²⁹Kiyá ki lòo kum, fòn kóʼ, a ghan e wun kitu ke ntoʼ ye vé‑eè bomen, e laàrì kikfə́v láarin.

³⁰Fòn nèn lò, e njàʼàm jii, «Yímóy, ku yèn búʼú, ŋkàlaʼ ye kuʼùn yee Babilon ye m bàʼrìn ji ntoʼ yem kishìíy. M bàʼrì a dzə̀ e vitaáví vém ve ghaʼán ví, a yì din vikuʼùy vém féyì feyì, din viwìr vém vee ji fon.»

³¹Kù mo fòn dzəə́ súŋninè, Nyùy súŋnín fó yuv, a suúy sho jii, «Fòn Nebukadnessar, yuúrí kinyo ke m sìysìn kùm wò ki. M sə̀ ne sáʼ vifòn fo wò.

³²Kí nén a dzə jii, á yíi jùm wò fo wírí mvəm, áà du, a dzə a dzə̀ vèn à nyám se kwaʼ si é kighìn, e kù wìy a yi a dzə̀ viŋgà é bǎm kiya saàmbà moo mbòŋ, e meé mo à wíy binsí ji kù sáʼ a Taà Vitu kitúm ke wìr msòŋ kidzə̀m, a kér wun ghay wóo fo sáʼ e wìr wo shoʼon wun feyì feyì.»

³³Kù mo Nyùy súŋninè, kinyo ke á kì suuy kùm Nebukadnessar ki nèn kù ghèén e nsənnsən. Vé‑eè jùm wun fo wírí mvəm, wù dù, a kfər a dzə̀ viŋgà moo mbòŋ. Ŋwéʼe wáa gbù e wun wùn, e dù, e mèé mo wuy si‑iì dàrkìn fó wùn wó, a dzə moo fəə se lùŋ wo wiy. Vighiy vi wáa dzə moo vé shinə̀n.

³⁴«Viyá vee saàmbà vìy vi shaà, mo woo Nebukadnessar nán lèn sí, e lèéy yúv, vifií vém ví ku nèn kfə̀n é bàm. M wáa beèrì Taà Vitu, a burí wun, e kfə̀n a ghvəm wun wo wù dzəə̀n shó ghán sidzə̀m. «Sáʼ rəə́ dzə̀ sáʼ, a yí kù wíy a tiy fo, e dù, e jòʼsì. Kù wíy a saʼ wun vifon mo ŋgwàʼ si wíy a koʼ, a fo ghay e símóʼ sí.

³⁵Wìr dzə̀m woó kitu ke nsay kù dzə̀ kifá kisáŋ e Nyùy si. Nyùy kù yii kinyo a dzə̀ ke kí gheen wun, a fə̀m dzə̀ wùn à nsheèlav sə́ sí, kìn wùn à wìr msòŋ woó kitu ke nsay. Wìr yòʼ dzə̀ shó wo a dzə̀ wù sə̀r Nyùy fo kinyò, a bó wìr yòʼ dzə̀ shó wo a dzə̀ wù dzə̀r e wun jii, ‹À yiì kin a dzə̀ ka?›

³⁶«Kú a dzə e ghan se vifií vém ví kfənen é bàm sin, Nyùy ku nèn siìr vikuʼùy wùn à vijuŋ vém ví fó ji m kfə́n, a saʼ vifon vém e viwìr vi. Vé ntir wùn à vé saʼ vémé táʼ mo, e wìy, vèr áwune béynín, á siír mo é kàvàʼ, m kfə́n a saʼ vifon. Viwìr vém ví kfən kùʼ, e shaà mo ví‑iì dzəə̀n fó mbìy.

³⁷«Ké lèn ki, mo woo Nebukadnessar, m búri Fon woó Yuv, kóʼor yír rə́, ghvə́m wun. Lim sə́ sidzə̀m si din a dzə̀ suuyrú, a vinyo ve wù yii vi dzə̀ là kiloʼ, a wù dzə̀ a dzə̀ wù sèn wir dzə̀m wo wù kóʼor wún.»