Read Lamnso Daniel 6 Bible Online

Daniel 6 - Lamnso bible

Daniel 6

¹Mo Darius kèʼèn a saʼ vifon, e nèn wìy lò, e yèn ji bòŋ a ke wun tóʼtí woŋ wo wun sáʼ və̀n vilíŋ ve kuʼkìn ví kishóv mbaà é wiì, e lèm atǎr saʼ, aá wáa saʼ vilíŋ vìn vidzə̀m.

²Wù kfən shòʼtí sa vitú ve saʼ vitaár ve á wáa kàʼày lím vé saʼ vìn. Á lóo kàʼày, é la wun woo fon yòʼ dzə́ə a fàn ji a dzə̀ kinshwìv ki waà nə̀ə́. Á bèy, a Daniel‑iì dzə̀ woo mòʼón.

³Á ku nèn yèn ji Daniel dzə̀ á wír, a wù yii lim ye juŋe, e shaà atǎr saʼ ve kuʼkìn ámóʼó, à kibér ke vé saʼ ki kidzə̀m. Mo kiwó kfə́ ké lìm ki kù‑uù dzəə̀n jeéy, fòn nèn wày ji wun kù‑úù yiì lèm wun a ji kitú ke vé saʼ vee wun kitum.

⁴Vitú ve saʼ vi nèn tàtí wùn à kibér ke vé saʼ ki, e kèʼ, a shweʼ ji mo Daniel lim vinyo veé wòŋ, á sà‑áà yén kintéŋ ke kinyò sho a. Á leéy, e làa yòʼ yen, bìʼ fo Daniel‑iì dzəə̀n wir suuyrú, a wù yòʼ‑oò kér kintéŋ ke kinyò.

⁵Áwune dzə̀ʼə̀m, e bvə̀n vighev, a kfə̀ynìn jii, «A vèsən dzə̀ là fó koóy kinyo a dzə̀ é kiliŋ ke nsər Nyùy ye wù yúninè, bo bó á yòʼ yíi koóy kintéŋ ke kinyò kée lor wun sho.»

⁶Áwune nèn tàr shuu, e dù, e yèn Fòn Darius, e bùn wun ji nyàr, fòn kú a ban a moo shúy, e dù, e jòʼsì.

⁷Nyàr, ver vee vitú ve saʼ, aàŋgàa saʼ ve á sáʼ vilíŋ ve kuʼkìn ví, à wír ve á sáʼ kitúme, aàtǎr saʼ ve á sáʼ ŋkà se laʼa, à vé ntiri, ver adzə̀m adzə̀m, vèr bvə̀n vighev, e yèn á ji fòn ku fò sáʼ, e wày á nsər, e sə̀ntì a jii, «E bǎm kishiíy mtaár, lá á yòʼ yù á ji wìr kì bunrì, lón a kifá fo nyùy wùmòʼ, kìn fo wìr msòŋ, e shaà ji wù lón a dzə̀ fo fòn. Yii bèy, a wìr lòo dzə, e ŋwày nsər rə̀n, bo á kù li a ŋgaàŋ, e màʼ aàbvərə̀ʼə́ mbvə̀ʼ.»

⁸Éè Lumnyàm, ké lèn ki, fòn ku fə̀ə́r a nsər rə̀n, e sàŋ, e dòn ji yì ku wìy gòʼ, a tiy fo ji nsər yeé Media wùn à yeé Persia, ye bó yòʼ dzə̀ yì kùvsín.

⁹Fòn Darius nèn kù dòn nsər yee shooy.

¹⁰Daniel yú ji fòn dòn a ne nsər yee shooy, e nèn kfə̀n e wun lav, e kòʼ, e nə̀ə́ e wun mvə̀m lav ye yì‑iì dzəə̀n é ŋkèʼ lav yee fó yuv, aàwundùu tíynin fo arə́, kiʼ Jerusalem. Wù nèn tsə̀m fó nsay, a bùnrì, a beèrì Nyùy və, kù mo wù yii yii akàŋ ataár ataár e kishiíy.

¹¹Vé menàŋ və́ víyi ku nèn yiì mo á kì baan ntaŋ wov, e dù, e koò Daniel, a wù bunrì, lón kifá ke wù lón fo Nyùy.

¹²Áwune nèn dù, e bùn fon, a kuumé nsər ye fòn‑eè fəərin, a dzər jii, «Nyàr, fòn sà yòʼ‑oò lo fə̀ə́r nsər ji a lòo dzə e bǎm kishiíy mtaár, á yú a wìr lón kifá fo nyùy wùmòʼ, kìn fo wìr msòŋ, e shaà ji wù lón a dzə̀ fo fòn, bo á maʼ ŋgaàŋ e mbvə̀ʼ abvərə̀ʼ á?» Fòn bìnèr jii, «Nsər yee shooy kù tíy fo ji nsər yeé Media wùn à yeé Persia ye bó yòʼ dzə̀ yì kùvsín.»

¹³Á bèy, áwune bùn fon, e sùúy sho jii, «Daniel və̀y, woo wír woó Juda, wo vé‑eè koon é shùu rər yòʼ yén a fon ji kifá, a bó wù yòʼ ghvə́m a saa nsər ye fòn‑ee dònèn. Wù kù dzəə́ bunrì a akàŋ ataár e kishiíy.»

¹⁴Fòn yú kee shooy, shúu yúm wun feyì. Wù kéʼ a lìm fo kijàvndzə, e dù meé e ŋkuùr, a mùm ji wun taʼ dzə́ə ye a dzə̀ wun bòyìr Daniel sho.

¹⁵Vilum vìyi kóʼtí e fòn si, e bùn ji nyàr, taàtá kì sáa ji dzə̀ nsər wìr veé Media wùn à veé Persiàa ji a fòn wày nsər, kìn wù fò a dzə̀ sáʼ, bo bó yòʼ dzə̀ á wìr kfə̀n kùvsín.

¹⁶Á bèy, fòn fó sáʼ, á koó Daniel, e wìy sho, e màʼ e mbvə̀ʼ abvərə̀ʼ. Yii bèy, fòn súŋnín, e sùúy e Daniel jii, «Nyùy wò wo à ghvə́m ghán sidzə̀m kù yíi bòyìr wò.»

¹⁷Á nèn wìy e kilán ki, e sə̀tí shúu mbvə̀ʼ sho. Fòn nèn fìnèr e ndzə̀ŋgwáŋ, e wày kifin ke atàr və́ shó, fo wìr yiì wìy, e mvə̀ʼ, e fə̀ə́r Daniel.

¹⁸Fòn nèn kfə̀n é ntoʼ, e shìíy e yuv vitsə́ʼ vifur, e làa yòʼ ker ŋgay, e làa yòʼ luʼ kifá e shuù, a bó á yòʼ‑oò lo wìy e kidzə́n ki ji kí wáa cèŋ, é fòn wáa yu vijuŋ.

¹⁹Ndzə bvəə́shí, a kaʼ kaʼán, fòn túmnín, e dù e mbvə̀ʼ fo abvərə̀ʼə́‑əə̀ dzəə̀n.

²⁰Wù mày fo, a toŋ kitávín, a nàn jí e nyárí wùn, a suŋnín e Daniel, a dzər sho jii, «Daniel woo kwǎn Nyùy wo wù gòʼòn kàŋ mòʼón, Nyùy wò wo à ghvə́m ghán sidzə̀m, wù dzə̀ a wù bóyír wò fo abvərə̀ʼə́ shuù a?»

²¹Daniel nèn bìnèr e ntoʼ jii, «Nyàr, fòn kú a ban a moo shúy, e dù, e jòʼsì.

²²Nyàr, Nyùy wom‑ee lo tsə̀nsí a nshìylav rə, e sə̀tí a shúu abvərə̀ʼ ji fo á lémér á mo. Wù‑uu yii bey, bìʼ fo wù yenen ji bó m yòʼ kì á fo kinyò. Nyàr, éè tàr wor, m sà‑aa yií ne kintéŋ ke kinyò e fòn a?»

²³Kinyo kìn ki bóŋ fon feyì, a móo fèr yòʼ dzə̀. Wù fó sáʼ ji á fəə́r á Daniel fo mbvə̀ʼ. Á bèy, á nèn fə̀ə́r wun fo mbvə̀ʼ, a bó wù yòʼ kér kileémé, à shishàr sho. Wù‑uù lùŋ, bìʼ fo wù‑uù wayin shilív a dzə̀ e Nyùy wùn, Nyùy və wo wù‑uù ghvə́mé.

²⁴Fòn fó sáʼ, á wìy e vilum ve vé‑eè toyin kinyo e Daniel bàm víyi, e màʼ áwune é mbvə̀ʼ abvərə̀ʼ fey. Á ku tàtí sa vikìy vév wùn à wóné, e màʼ fo. Abvərə̀ʼə́ táv, e ghàʼ áwune. Áwune wáa jì ji á meé é sar mbvə̀ʼ, aàbvərə̀ʼə́ sáʼtí ne áwune sáʼtin, à vighvə́r ví shó.

²⁵Kee shooy ki shaà, Fòn Darius nèn sàŋ ŋwàʼ fo wìr dzə̀m, kìn dzə̀ wir kitum kìka, kìn woó wòŋ vəné, kìn wù súŋnin a dzə̀ lám gha. Wù sáŋ jii: Nyaáŋ wo wù dzəə̀n e věn mvəm kú a kuy kuyín.

²⁶Sáʼ ye m fóo dzə̀ jii, «A wìr dzə̀ feé e mǒ wòŋ, bo wù kù kér fó a yunín, a ghvəm Nyùy wo Daniel ghvə́mé. «Dzə̀ wun Nyùy wo wù gòʼòn kàŋ mòʼón, a wù kù dzə̀ ji wun, e dù, e jòʼsì. Vifon və́ ví dzə̀ ve bó yòʼ dzə̀ kifá ki laàr, a sáʼ rəə́ kù wíy a tiy fo, e dù, e jòʼsì.

²⁷Wù lo, wù fə̀ə́r wír fo kinyò, e bòyìr ŋgaàŋ, a wù din visəəm, yii viŋgaʼnìn ve vinyò e yuv wùn ǎ nsay. Dzə̀ wun wo wù fəərin Daniel fo abvərə̀ʼə́ wo.»

²⁸Á bèy, vinyo ve Daniel vi nèn kù a ghan e mboʼ, e Fòn Darius sar saʼ, e kù wìy a ghan sa bèy e Fòn Sayrus woo wír woó Persia sar saʼ.