Read Lamnso Daniel 7 Bible Online

Daniel 7 - Lamnso bible

Daniel 7

¹Wáa dzə e kiya ke mbìy ke Belshasar‑iì sáʼ ji fon woó Babilon, Daniel neém e wun kikun, e lòo buuné, njèm shí wun, kilìtì ke kinyò ki wíy e wun si e njà kinjeenjèm. Á bèy, vitú ve vinyò ve Daniel‑iì saŋen, e naàrì kùm njèm rə̀n vi víne.

²Wù‑uù sàŋ, a naàrì jii, yì‑iì dzə̀ vitsə́ʼ vímóʼ ví, kilìtì ke kinyò ki wìy e mǒ si e njà kinjeenjèm. M yén, a shwéri wiy mbìv sidzə̀m, tsə́y rìbà ndzə̀v wo wiy,

³e kfə̀n yèn, a nyám si fəə́kir fo mvə̀m rìbà ndzə̀v sikweè, a sí fáŋkír, beéme ji wùm, a nyàm yìmòʼ yòʼ shwínin yìmòʼ.

⁴Nyam mbìy‑iì shwínin bvərə̀ʼ, yii bèy, a yì kér vav moo sé lùŋ wo wiy. M kú a leéy, e lòo leéy, e yèn, aá shóʼtí vav sə́, e nàn fo nsay, yì tiím e wun shwin moo wír, a ker vifií moo wír.

⁵Nyàm ye yì batin sásín, e fəə̀sín, a yì dzə̀ kfə́ moo nyám ye á yoŋ ji *bear bèy. Yì‑iì nyáʼ nyaʼán, a yì lúm vighvə́r é shuù vitaár, vighvə́r, a dzə̀ vee nyàm nsaŋ. Aá kwá jii, «Lò é yuv, a kfər nyám, a dù duùn é kindzəʼ.»

⁶Kee shooy ki shaá, a m kù wáy sí, e nèn kfə̀n yèn yìmòʼ yee nyám, a yì dzə̀ kfə́ é njà baá. Yii bèy, a vav se shinə̀n sí fəə́kír é ndzə̀m wó sikweè, a nyàm rə̀n kér vitú vikweè, aá fó vitaáví vé saʼ sho.

⁷M kfən yèn nyám ye yì meen ji kweè e kinyò ke kí‑iì wìyìn e mǒ si e njà kinjeenjèm, a yì beéme bèn ji wùm, kiʼ e távín ji ŋkǒŋ. Yì‑iì kér vigha ve sòŋ, a dzə̀ vee kisha kee wúntí kíwun. Yì lúm nyám, yì sàʼtì sáʼtin, a nyèŋrì kibér, a fòtì e wuú. Nyàm rə̀n wáa dzə kfə́ jeéy fo se sí‑iì fəəsin fó mbìy si, a yì kér loŋ e ghvə̀m.

⁸Kù mo m wáy sí e loŋ sìn, yìmòʼ yee loŋ nèn fəə̀ e siy sí nsàn, a yì dzə̀ kfə́ e dórín. Á ménrí loŋ sitaár se sí‑iì siìn fó, e fíʼ fo ghay e rə̀n, a loŋ rə̀n kér sí si moo sé wìr, kér shuu, a kù fəə́ lám kinsùmrìwùn fó fo.

⁹M kú a leéy, e lòo yèn, aá máʼ kàvàʼ. Ŋgaà wo wù kù‑uù siìn fó yàŋgùʼ[2] dzə́ʼə́m shó. Vikúm ví‑iì fə́r fo wùn wó ji páv moo mbàʼ, a nə́ŋ si fə́r fo kitu wo moo wúy njiì. Kàvàʼ və wáa ker kár si, a kiliímé ke və̀y kí kóʼ fo kar fèy, kfə̀n kóʼ à fó kàvàʼ sho.

¹⁰Və́yí meé, a mèʼèm, a wìy moo ndzə́v, a wú ló a dzə̀ fo Ŋgaà wo wù‑uù siìn‑eè dzə́. Màŋgòŋ‑eè lim fo wun ansə̀kì ansə̀kì, aá tíy e wun si, yuúri shuu və́, a bó yòʼ dzə̀ wìr tàŋ mo áwune dzəə̀n. Á wáy nsaʼ e kibàʼ, e mvə̀ʼtì aŋwàʼ, e lèm arə́.

¹¹M ku kpù leéy, bìʼ lám wo loŋ nyàm rə̀n‑eè sumrì wún shó. M kú a leéy bèy, e lò, e yèn, aá seé nyám ye loŋ kì dzəə̀n é kitu wo rə̀n, e laàr jáv láarin é və̀y.

¹²Fo kibér ke nyàm ki, á faàsì sáʼ fo áwune, yii bèy, e kù màʼtì ji sí ku bèʼrí fo shintàm.

¹³Kù mo kinjeenjèm kìn ki wìyìn e mǒ si vitsə́ʼə́, m kú a leéy, e lò, e yèn wír, a wù bvə́y é yuv, a shaà e mvə̀m mbàʼ, shwínin rú wan wìr msòŋ. Wù‑uù dù fo Ŋgaà wo wù‑uù siìn fó yàŋgùʼ dzə́, á lí wun, e dìn sho.

¹⁴Á fó wun vitaáví vé saʼ, e fò wun vikuʼùy, wù wáa saʼ vifon, é wìr dzə̀m fíʼ a lìm fo wun, kìn dzə̀ wir kitum kìka, kìn woó wòŋ vəné, kìn wù súŋnin a dzə̀ lám gha. Sáʼ rəə́ dzə̀ sáʼ, a yí kù wíy a tiy fo, a bó yòʼ dzə̀ yí wìy mày. Vifon və́ ví dzə̀, a bó yòʼ dzə̀ kifá ki wìy laàr.

¹⁵Kinjeenjèm ke mò‑oò yenen kin ki‑iì kàr mo woo Daniel, e yiì, wúné wéʼ mo.

¹⁶M kóʼtí, e yèn wír wùmòʼ fo wír ve vé‑eè tíy foo, e dzə̀r shó ji wù ku naàrì a mo kinyo ke ru kí, kee kùm kinjeenjèm kìn. Wù nén a naàrì kinyo kee shooy, a toʼtí nsàv e mò.

¹⁷Wù suúy ji nyám se kuʼkìn see sikweè si dzə̀ á vitúm vikweè ve ví wíy ŋaʼáy e kitu ke nsay, a saʼ.

¹⁸Yii bèy, a wír Nyùy woo Taà Vituu wíy sə sáʼ yeé wòŋ, e yòv, a ker a viyá viyá là may.

¹⁹Á bèy, m kù dzəə́ taʼ e kiíy kinyo ke ru kí, kee kùm nyám ye mò‑oò yenen, ye yì meen ji kweè, ye yì‑iì dzəə̀n kfə́ jeéy fo símóʼ see nyám si, beéme bèn ji wùm, kér sóŋ a dzə̀ yee kisha kee wúntí kíwun, kér vighiy a dzə̀ vee kisha kee *brons. Nyàm rə̀n lúm yìmòʼ, yì sàʼtì sáʼtin, e nyèŋrì kibér, e fòtì e wuú.

²⁰M koŋ sa e kiíy nsàv loŋ see ghvə̀m se nyàm rə̀n‑eè kér e kitu, à nsàv loŋ ye yì‑iì fəən fó bàm, e yiì, see sitaár si shóʼkír. Loŋ rə̀n‑eè kér sí wùn à shúu, a kù fəə́ lám kinsùmrìwùn fó fo. Yee shoon yee loŋ wáa dzə, a yì beéme e ŋàŋ, e shaà kibér.

²¹Kù mo m dzə́, wáy sí, loŋ yee shooy nèn lò, e tsə̀ŋén rə́r wùn à wír Nyùyi, e fùnèn, e tòn áwune.

²²Rə́r sin si kú a màʼ, e dù, e meé mo Ŋgaà wo wù‑uù siìn‑eè wìyìn, e tìnén nsaʼ, e fò e wír Nyùy woo Taà Vituu. Ghán sí nèn ghèén se wír Nyùyi sə́ vitaáví, a saʼ woŋ sho.

²³Wìr və̀y nèn a naàrì e mò, a suúy jii, «Nyàm ye yì meen ji kweè, dzə̀ á kitúm kímóʼ kí ke kí meen ji kweè, a kí wíy fəəsín e kitu ke nsay, a saʼ. Kitúm kìn ki wíy a dzə jeéy fo vitúm vímóʼ ví, a kí wíy a nyàvrì e kitú ke nsay ki kidzə̀m, e nyèŋrì e wuú, e taʼár e vishev vishev.

²⁴Fo ké loŋ see ghvə̀m si, sí din a dzə̀ afon e ghvə̀m, ve á wíy ŋaʼáy fo kitum ke wiy kin. Yii bèy, wùmòʼ woo fon wíy ŋaʼáy fo áwuné bàm, a wù wíy a dzə kfə́ jeéy féyì, fo ve vé‑eè siìné, a wù wíy tòn afon vee ataár fo afon vìne.

²⁵Fòn və̀n wíy a suúy vinyo ve kisaŋ vi e Taà Vitu bàm. Wù wíy a nə̀ʼsì wír Nyùy woo Taà Vitu. Wù wíy a taŋ ji bo wun kì kùvsín á nsər sév sé Nyùy, e kùvsín vishiíy vév ve kuʼkìn ví, aá wíy way wír Nyùy e wun sar saʼ, viyá vitaár e kimbéʼ ki.

²⁶«Yii bèy, wír ve á sáʼ nsaʼ e yuví wíy way nsaʼ rə é kibàʼ, e sə vitaáví və́ vé saʼ, e səʼsí wun səʼsín, é wù may ŋkuuŋkùŋ.

²⁷Á bèy, á wíy fo vitaáví vé saʼ e wír Nyùy woo Taà Vituu, aá sə́ sáʼ yeé kitu ke nsay kidzə̀m, à vikuʼùy və́ ví. A vifon ve Nyùy woo Taà Vitu vi kù wíy a tiy fo, e dù, e jòʼsì, aàfon adzə̀me wíy a lìm fo wun, a yunín wun.

²⁸«Á kinyo kidzə̀m ke mò‑oò yenen é njà kinjeenjèm. Mò‑oò yèn, wúné beémé mo, m bínkír a fər moo shiŋgíy. Yii bèy, kí ku gòʼ, e yùm e mǒ wùn, la m yòʼ fèr e wìr.»