Read Lamnso Hosea 10 Bible Online

Hosea 10 - Lamnso bible

Hosea 10

¹Wír veé Israyi‑iì dzə̀ moo kitiír ké *vayin, kitiír, a tútúʼ koóm shó nyanyày. Mo vikuʼùy ví‑iì nəə áwune, kù dzə̀ sá réŋréŋ mo vé‑eè bóm kíy se cù. Mo nsay yev‑iì fəər vifá ve yi nyanyày, kù dzə̀ mo áwune‑eè náŋsin sə́y se anyùy, a sí njaʼkìrì.

²Mo áwune lumen ne a dzə̀ kimboʼtì, e kpù shó, bo á kù lo, e màʼ ŋgeʼ aáwune bìʼ njò yev. NYÙY TÀR yíi bvəʼə́y kíy sév sé cù, e kètì sə́y sév sé anyùy.

³Áwune ló lèn, e nèn kèʼ, a suúy jii, «Vèr bùú fon bèn, a dzə̀ bìʼ fo vèr‑iì tenen fó a ghvəm NYÙY TÀR. Yii bèy, a fòn fə̀m kì dzə̀, wù sə̀ ver é gha féyì?»

⁴Áwune fəər jí si fo shuù, a sí yòʼ kér mvə́m, yii aŋkàʼmé, a bó á yòʼ wíy lìm, yí kilìʼ kisáŋ. Nsaʼ yee tínén e kiloʼ ki nəə̀nín ne aáwuné mvəm, kù moo kikwiíy ké njoŋ ke kí ràmtìn é sum.

⁵Wír ve á dzə́ e ŋkàlaʼ yee Samariàa wíy a dìy, a shèŋ kitú, bìʼ shibvə̀m sheé nsə̀nin wàn nàʼ, she áwune làyìn é Bet‑Aven. Áwune wùn aàtàá cù véví wíy a toŋ, a jeetí, bìʼ vijuŋ ve shibvə̀m shìn she á liìn, e dù sho.

⁶Rúrú, á wíy lì shibvə̀m she áwune yoy, tiir sho shìn, e dù, e shwi fon woó Assiriya sho, wun woo fon wo wiy. Á wíy shoór wír veé Isray, aáwune wáa woomé, bìʼ vifií ve áwune baʼtin, e wày e shibvə̀m shìn shí wùn.

⁷Á wíy shàʼàr fon woó Samaria fo wírí si, kù mo ndzə́ví kùúy ŋgay shiŋkàʼ, e dù sho.

⁸Á wíy laàr virə́ʼ vé anyùy veé ŋkàlaʼ Aven[21], fo wír veé Israyi yii cu mebvə̀m. Vitiír vé njoŋ wùn à vikwiíy ví wíy kuy, e sùm kíy sév sé cù. Wíy lòo dzə e ghan see shooy, é wíri wáa toŋ, a jàŋ virùmèn jii, «Vèn ku keèsì e věr kitu,» a toŋ, a jàŋ agwan jii, «Vèn sə́y, e sə̀tí ver.»

⁹NYÙY TÀR suuy e wír veé Israyi jii: «Éè wìr veé Isray, e kèʼ fo ghan se vèn‑eè bùʼùn kinyo e Gibea, vèn kù jáy jay vèsən, dzəsì jay e wùmǒʼ kitu. Vé‑eè tòn wír ve bií e rə́r sí é Gibea bèy, a bó yòʼ‑oò dzə̀ kinyo ke juŋ ki bey à?

¹⁰Ké lèn ki, m lo, e màʼ ŋgeʼ e věn kitu, bìʼ kóy wo vèn tsə́y vèsən. M lo, e baʼtí vitúm vímóʼ ví, aá nəə́ ven e rə́r sí, e sə̀r ven, bìʼ ajay vén ve á kù kuʼ, du duùn fó mbìy.

¹¹«Wír veé Israyi dzə̀ moo wan nàʼ wo á yeʼeyin, ji wù wáa lìm lim ye tavíné, wù wáa kòŋ fó nyèŋ a dzə̀ sáŋ, m ku kfə̀mén, a geʼ sho. Yii bèy, m yíi lò lèn, e neèr kimbùŋ e wun kilòŋ, ji m fiʼ yiì, é wù wáa lìm lim ye yí tavin. Wír veé Judàa kér fó a sə̀ŋ kisoó, é kí wáa shèv súm, é wír veé Israyi wáa bvəʼtí nsay ye yì táv yee shooy.

¹²Vèn yú ke m suuy ki. Vèn ku wày ŋgoòy liì wo juŋ, é vèn yiì kàv koŋ ye m koŋ wíri. Vèn shev nsay ye dzəə̀n shilív shén she tavín shin shi, bìʼ fo lèn siìn ghán se vèn lo, e bìnkìr, e kfən fo NYÙY TÀR. Kfə́né, é wù yii vinyo vee réŋ ví e vèn, e səə̀vì ven.

¹³«Yii bèy, vèn wày ne ŋgoòy, a dzə̀ liì wo bi, e kàv a dzə̀ kinyo ke bi kí. Vèn sí yí séʼ a dzə̀ kimboʼtì ke vèn rə́si bóʼti, bìʼ fo vèn tiirin vifií a dzə̀ e věn antaŋ, e kù a yòy, a tiír a dzə̀ é mànjòŋ vé rər wo vèn kér nyanyày.

¹⁴Ké lèn ki, rə́r sí lo lèn, e nyoòrì ven, e laàr virə́ʼ vén ve tavkín ví vidzə̀m. Kí kù lo, e koóy ven mo kí‑iì kooyin Bet‑Arbel. Fòn Shalman‑eè laàr ŋkàlaʼ yee shooy e rə́r sí, e lòo laàr, e tàtí ayǐy won wùn à wóné, a dzə̀v e vilan, a bvəʼtí.

¹⁵Ven vee wír veé Betel, á kinyo ke kí yíi koóy ven. Kí kér fó yìi koóy, bìʼ vinyo ve bi ve vèn yiìn, e tònén. Rə́r sí yíi tsəŋén, aá laar fon woó Isray, é kfə́ kí may ŋkuuŋkùŋ.»