Read Lamnso Hosea 11 Bible Online

Hosea 11 - Lamnso bible

Hosea 11

¹NYÙY TÀR gháy wún, suuy jii, «Yì‑iì dzə̀ é ghan se Isray‑iì dzəə̀n moo wán wo bór, mò‑oò kòŋ wun feyì ji wán wom, e lò, e fə̀ə́r fo wòŋ Ejiv.

²Yii bèy, mo m kù‑uù waʼrì, jaŋ áwune akàŋ akàŋ, kù dzə̀ mo á nyéŋ mo nyéŋén, du, cu a dzə̀ mebvə̀m mee *Baal, ton kiláy, cu anyùy sho.

³Kù‑uù caacà mo áwune, é bo á wáa kiíy mó a shoʼtí kiwuú, a kù‑uù danèr mo áwune e kiwó kém kí. Yii bèy, bó áwune yòʼ‑oò ló a gwàrìr ji leey a mo fo áwune.

⁴Mò‑oò wày áwune é shiliv, a kòŋ e ŋàŋ, e nèn siìr e mǒ wùn. Dzə̀ moo ji mò‑oò sə̀ʼə́r a dzə̀ kimbùŋ fo áwuné mbèʼ, e gvə̀ʼtí aáwuné si, e yìír áwune.

⁵Àáy, mo áwune tenen fó kfən e mǒ wùn, bo á kér fóo kfən e bàm é Ejiv. Kfə́né, é fòn woó Assiriya wáa taa aáwuné kitu.

⁶Rə́r sí wíy sàsìn, e ghiʼ ŋkà se laʼ sév, ghíʼí, é sí keti shuu se kày se sí nəə e ŋkàlaʼ. Aŋgaà vév vibàné wíy laàr áwune, bìʼ fo njiìn wov kù sì wóov.

⁷Wír vém veé Israyi wày ne wáyín ji á kù‑úù tín kiwuú fo mǒ bàm. Áwune wíy a toŋ, a kàn Nyùy woo Taà Vitu, yii bèy, é la wù yòʼ nàn áwune.

⁸«Éè Isray, a dzə̀ m shwèy ven fó wo e le? A dzə̀ m ghàn é le, e bóo màʼtì ven? A dzə̀ m ghàn é le, e bóo laàr ven, mo mò‑oò laàrìn Admaa? A dzə̀ m ghàn é le, e bó a lovtí e vèn, mo mò‑oò lovtin e Tsəboyiim?[22] Bó yòʼ dzə̀ shilív shém shí biìmé. Koŋ ye m kòŋèn ven é ŋàŋé shàʼnín.

⁹Bó yòʼ dzə̀ m laàr ven mo dòʼshwiíy wo wù kív mo dzəə̀n. Feyì feyì, m yòʼ yíi bìnkìr, e laàr Isray ŋkuuŋkùŋ. M dzə̀ Nyùy, a m yòʼ dzə̀ moo wir msòŋ. Dzə̀ mo Ŋgaà wo Ranén, a m dzə́ e věn mvəm. M yòʼ‑óò li dòʼshwíiy wom, e wìy, e kìʼ ven shó.

¹⁰«Kishiíy kí wíy gheén, é mo woo NYÙY TÀR tóŋ moo bvərə̀ʼ. Tóŋé, é wír vémé wáa jùmrì mo. Wón vémé wíy a lò fo mbìv kintoŋrìshùy, a wìy, a yàʼ.

¹¹Áwune wíy a kfən fo Ejiv moo menə́n, a yàʼ, a kfən fo Assiriya moo ŋgoo vibìŋ. Wiyì, é m siir áwune aáwuné melaʼ. Suuy mo woo NYÙY TÀR.»

¹²«Wír veé Efrayime kaàrí ne mo, e kù a boʼtí a dzə̀ kimboʼtì. Áwune veé Israyi ghàʼ ne e lám wo kaŋéné, a wír veé Judàa tíy wùn à Nyùy melív mebaà, a wù dzə̀ kfə́ Ŋgaà wo Ranén, kù tíy wùn áwune.»