Read Lamnso Hosea 12 Bible Online

Hosea 12 - Lamnso bible

Hosea 12

¹Kifá ke wír veé Israyi yii ki kù dzə̀ shwér, e kèʼ fo kijàvndzə, e dù meé e ŋkuùr, kù dzə̀ kíwun ke á yii. Antaŋ vév ve bií kù du duùn fó mbìy, aáwune kù siíme a dzə̀ rə́r. Áwune gwar *mensaŋ wùn à wír veé Assiriyàa, li meŋgvə́r me *oliv, béʼ, du sho e Ejiv.

²Ké lèn ki, NYÙY TÀR sí kér nsaʼ wùn à wír veé Judàa. Wù sí lo, e màʼ ŋgeʼ e wír ve dzəə̀n rám Jakoví kitu, e làʼ áwune mo yii yéví dzəə̀n.

³Bo á wìy a dzəə́ Jakov, a wù sí sə́ kóy wùn fər və Esav.[23] Wù wìy kùy, e fùnèn wùn Nyùy,

⁴a wù fúnén a dzə̀ nshìylav Nyùy, e ghàʼ.[24] Jakov ló fó fo, e tòŋ, e lòn kisəəvì. Wù kfə̀n‑eè tàrnín wùn Nyùy e Betel, Nyùy súŋnín wùn wun.

⁵Yì‑iì dzə̀ NYÙY TÀR, wun woo Nyùy woo Taà Mànjòŋ. Yír rəə́ kù dzə̀ ji NYÙY TÀR, á naaŋkàntì yìr féyì ye á yii yoŋ wun sho.[25]

⁶Á bèy, ven vee rám Jakov, vèn kfə́n é bàm e Nyùy wón wùn. Vèn kú a kòŋnìn, é wìr wáa yiì kinyo e wùmòʼ là kiloʼ, é wìr kú a dzə, a kìʼ a dzə̀ Nyùy mo wù lo, e wìy, e sə wun.

⁷NYÙY TÀR yoŋ jii: «Wír veé Israyi dzə̀ vé mbóʼmée, aá koŋ a boʼ wíri, kù mo ŋgaà wày bòʼ wír e mfìʼ vidzəə̀sì mbóʼmé.

⁸Áwune raʼsì wún, a wìr suuy jii, ‹M sì ŋgaà mbàm, a kù jùm mo mbàm sém sin. M gìsín, e bàʼtí bùʼ və̀n e dzə̀m, a bó yòʼ dzə̀ wìr dìn kintéŋ ke kinyò sho, a bó yòʼ dzə̀ sá wìr dìn jay wom.›

⁹Yii bèy, dzə̀ mo NYÙY TÀR woo Nyùy won, mo wo mò‑oò fəərin ven fó vikwàn é wòŋ woo Ejiv. M kfə̀n yíi siìr ven, é vèn kfə́n, a shiíy e vibàn, réŋréŋ mo vèn lóo yi ŋkàʼ,[26] á shìíy.

¹⁰«Mò‑oò tsə̀nsí aŋgàa ntum vém, e ghèm ndzə aáwune akàŋ anín, á wáa tir wíri, a fìʼsìn vinyo, e vimfèr.

¹¹Yii bèy, wíri kú a cù mebvə̀m e Gilead, cu bèy, bívir a dzə̀ vitú vév. Á kfə̀n yii cu e Gilgal, seé ambòŋ, a kíy sév sé cù si kù yíi kfən ji vikfə́r ve tiy, a neŋnín moo tíy se á baʼtin é sum wo á shèvìn.»

¹²Jakov‑iì lèʼ, e dù, a beè e wòŋ woo Aram.[27] Wun woo Isray wáa dzə fo, a shìy bvə́y se wìr, shiy bèy, ji júu wiiy və.

¹³Fo bàm, a wír veé Israyi dzə̀ é Ejiv, NYÙY TÀR tsə́nsí ŋgaà ntum və,[28] wù fəə́r áwune fó vikwàn vee fó. Nyùy‑iì lùŋèr áwune, e shaà fo *ŋgaà ntum və və̀y.

¹⁴Yii bèy, wír veé Israyi ló kév, e tìnsín NYÙY TÀR, wù shwiíy kilòŋ. Bìʼ bey, NYÙY TÀR yíi siìr yúyrí ye áwune yúyri wíri, é yí kfə́n a dzə̀ aáwuné kitu. NYÙY TÀR wíy màʼ ŋgeʼ aáwune, bìʼ ŋwáy ye á ŋwayin wun.