Read Lamnso Hosea 14 Bible Online

Hosea 14 - Lamnso bible

Hosea 14

¹Éè wìr veé Isray, vèn kfə́n é bàm fo NYÙY TÀR woo Nyùy wón wùn, vèn ku yèn ri mo ajay véné màʼàn ne ven.

²Vèn kfə́n é bàm fo NYÙY TǍR wùn. Vèn báʼtí kisúŋnìn kén, e dù, e lòn wun jii, «Éè NYÙY TÀR, làysìn ajay vérí, ku làysìn ŋkuuŋkùŋ. Ver víne, aá sí búʼ wó, ku səə̀sí ver. Vèr yíi burí wò, é wáa dzə cu ye vèr cu wò sho.

³Yòʼ dzə̀ wír veé Assiriyàa bòyìr ver, a vèr yòʼ yíi a koʼ nyám se ŋkoʼ, a yòy, a tiír sho. Vèr yòʼ dzəə́ wìy yòŋ mebvə̀m ji nyùy wor, vifá, a fer ver e wó yérí. Rúrú, NYÙY TÀR, kù dzə̀ wò wo à shám mendzən me wón tsə̀.»

⁴NYÙY TÀR suuy jii: «M wíy fèr yàsi wìr vém, aá kfə́n é bàm e mǒ wùn. M wíy a kòŋ áwune shilív shém shidzə̀m, a bó m yòʼ dzəə́ yiì a shwiíy kilòŋ vèr áwune.

⁵M wíy a dzə fo wír veé Israyi moo ŋweʼ ye yí gbu e nsay ye yumér. Áwune wíy tèʼ, e bùy moo kibuushì, é gháŋ yéví nəə́ é nsay moo yé vici veé Lebanon.

⁶Áwune kfə̀n dzəə́ wìy tokír, a kuy, a bòŋkìr moo vicí vé *oliv, a rə̀m, a rə̀ʼtìn moo vicí vé *sidar veé Lebanon.

⁷Wíri kfə̀n wíy a koʼtí e Isray ghaŋ, a beè e wun kindzə̀ə́ndzəm. Isray kù dzəə́ wìy a tèʼ, a bòʼrì moo ŋgwàsáŋ, a fə̀ʼ, a koóm moo kitiír ké *vayin. Áwune wíy a rə̀m, a rə̀ʼtìn moo meluʼ meé Lebanon.

⁸Wír veé Isray, m yòʼ kfə̀n kér fó wìy yu kinyo kímóʼ kí ji mebvə̀m me vèn ghvə́mé. Dzə̀ mo wo m yú bunrì yén, leey fo vèn. M dzə̀ moo kicí ké dzəʼə̀y ke kí teʼ, boʼrì ghán sidzə̀m, kiŋsìn ven. Kisəəvì kén kidzə̀m ki kù lo a dzə̀ fo mò.»

⁹A wìr kér vifií, ŋgaàŋ kù səə̀m vinyo vìn vidzə̀m, e lèm e kitu. Wìr wo wù kiiy jeéyjeéy fó vinyò ku nə̀ə́ e mvəm wó, e kìíy mo ví dzəə̀n. Ntir se NYÙY TÀR sidzə̀m si kù yii dzə́ tìítiy, a wír ve á ghán e wun mbòví jumrì ntir see shooy, a wír ve á méŋ wune bayrìn kév shó, gbukìrì.