Read Lamnso Hosea 2 Bible Online

Hosea 2 - Lamnso bible

Hosea 2

¹«Á bèy, vèn wíy a yòŋ afə́r vén vee wír veé Isray ji ‹Wír Nyùy›, a yòŋ ji ‹Wír ve Nyùy shamen.›»

²«Yii bèy, lèn və̀n, vèn roome Isray woo yè won. Bó wù yòʼ dzə̀ə́ yeè lav wom, a m yòʼ dzə̀ə́ lúm və. Vèn ku roòmè ji wù yar á liì joònè, e yàr viŋkar ve wù gháné.

³Roomè, wù tén fóo neèr liì woo shooy, bo m lo, e kweèy ndzə̀y fó wùn wó, e kweèy bèn, é wù wáa dzə mo vé‑eè dzəən wun. M yíi yiì, é wù kpú kilòŋ ke yumén kí, e yiì, é wù yúm, e kàʼkír moo kirə́ʼ ké woʼ, e yum bèn moo nsay ŋgaŋ.

⁴Bó yòʼ dzə̀ féyì feyì m yiì rə̀r mendzən me won və́, bìʼ fo dzəə̀n wón ve á dzəən é kwaʼ viŋkar.

⁵Yè wov dzə̀ sàkì, a wù yòʼ kér dzə̀rkìtu, bóŋ bvəm e ndzə, là woómé. Wù lo, wù wàa sevtí jii, ‹M kér fó a jùmrì vilum ve á koŋ mo,[4] aáwune wáa geʼ e mò, a fo viyíkìr, a fo mendzə́v, a fo ndzə̀y wùn à meŋgvə́r me *oliv mè, é m kfə́n a koóy bàr kifa wó a bàʼ shuu sho.›

⁶«Bìʼ bey, m yíi tsəm káy njoŋe, e gìŋ wun sho, e bom kay, e sətí wun sho, é la wù yòʼ a ker dzə́ə ye dzə̀ wù kfə̀n fəə̀ shó.

⁷Wù wíy a leʼnín aàŋgàa ŋkòŋmé vəə́ bàm, a bó wù yòʼ wíy yen. Wù wíy a tàʼ áwune e waá shuù, a bó wù yòʼ wíy shov e si. Kí kooy bèy, é wù nèn sùúy jii, ‹Mo‑óò kfə́n ri e bàm fo lum wóm wùn. Mò‑oò dzə́ fo, yú vijuŋ, e shaà dzə́ ye m dzə́ rə̀n.›

⁸«Isray woo yeè lav wom‑eè dzə́ vèr wun, a bó wù yòʼ‑oò lo gwàrìr ji yì‑iì fó a mo ŋgoòy se vifa e wun, a kù‑uù fò mo meluʼ wùn à meŋgvə́r mè, ku kfə̀n fò mo *kisha ke mbàm ke baar kí wùn à ke fəvír kí e wun nyanyày, é bo wù li, a cù a dzə̀ nyùy woo *Baal sho.

⁹Bìʼ bey, wíy lòo dzə e ghan se á káv vifá, é m sə́ ŋgoòy sém sé vifa fo wun, e faàsì meluʼ mem fó fo, faasì, é m sə́ sá ndzə̀y se mò‑oò foon ji áwune wáa teʼtín kinshóʼ sho.

¹⁰M wíy kweèy ndzə̀y fo wun wùn, e ŋkar sə́ sí si, é wù wáa tiy kinshóʼ, kù ji sàkì və̀ne, a bó wìr yòʼ wíy a dzə wóo bòyìr wun woo Isray fo mǒ wo.

¹¹M wíy màyìr ŋkàʼ sidzə̀m fo Isray, kìn dzə̀ woó kitu ke kiya, kìn dzə̀ wo á rə́si kishiíy ké mbìy ki fó ŋwee, kìn wo á bám a dzə̀ vishiíy vímóʼ ví é kiya, kìn dzə̀ sá wo á lem kishiíy ké bam keé kitu ke ŋgàm.

¹²M wíy laàr vitiír vév vé *vayin, e laàr vicí vév vé *fig, vifá, a Isray yoŋ ji dzə̀ vilaʼày ve alúm vəə́ fó e wun. M wíy yiì, é súm sin si kfə́n ji kóv, é nyám se kwaʼ si laar.

¹³Rúrú, m wíy màʼ ŋgeʼ e Isray kitu, bìʼ ŋwáy ye wù‑uù ŋwayin mo, e ŋwày mo, e dù a tòn kiláy, a cù mebvə̀m mee Baal sho, e lò, a wayrí a dzə̀ vifá ve sùsù, a ghan sho aàŋgàa ŋkòŋmé vəə́ bàm. Ghán bèy, laysìn mo. Suuy mo woo NYÙY TÀR.»

¹⁴NYÙY TÀR nén a suúy, a shìvìr jii: «M kfə̀n lo, e yiì, é Isray kúvsín kwaʼtì rə́, e kfə̀n é bàm. M wíy lì wun, e dù sho e kirə̀ʼ ké woʼ, a leèrì wun fo e jí se kikòŋnìn si.

¹⁵M wíy siìr súm və́ vitiír vé vayin e wun, e bìnèr Kiwoóy ké Ŋgeʼ,[5] é kí kfə́n ji dzə́ə ye yì du fo wù yoy, tiirì. Dzə̀ fó, fo m wíy yòŋrì wun, é wù biímé, a jùmrì mo, réŋréŋ mo wù‑uù jumrì e ghan sə́ sé viŋgòn, ghán, se mò‑oò fəər wun fo wòŋ woo Ejiv.

¹⁶«Ke mo woo NYÙY TÀR suuy ki dzə̀ jii, kishiíy kee shooy ki wíy gheén, é wù kfə́n a yòŋ mo ji lúm və, e làa yòʼ dzə́ə a yòŋ mo ji Baal wo wù kér wun.[6]

¹⁷Rúrú, m lo, e màyìr yír yee Baal fo wun shuù, é la wù yòʼ dzəə wìy a kàn yír rən, fə̀m mo á yoŋ virə́ʼ shó jeéy jeéy.

¹⁸M wíy gwàr *mensaŋ e kishiíy fóo fèy vèr à nyám se kwaʼ si, e gwàr vèr à menə́n mè, à vifá ve ví ŋaŋrì e nsay vi, é la vifá vìn vi yòʼ kfə̀n wìy lèmér wír vém. M wíy laàr vifá ve rər vidzə̀m fo wòŋ. M wíy laàr nyùy rə̀r, e laàr vinte, e laàr rə́r, é wír vémé wáa dzə ji nyaáŋ, là kifá ké a fàn.

¹⁹«Isray, m wíy way wò e lav ji wíiy wom. M wíy a suúy suuyrú e wò, a yiì vinyo vee réŋ ví e wò. M wíy dìn koŋ yém ye ruú wùn à shammèndzə̀n wom e wò, e lì wò ji wíiy wom, é wòsò goʼ ŋkuuŋkùŋ.

²⁰Rúrú, m wíy way wò e lav, e kù lum a dzə̀ wò, e kpu sho, áà nèn bìnsí ji m dzə̀ á rú NYÙY TÀR.

²¹«Kishiíy kin ki wíy gheén, é m yú bunrì kifa kidzə̀m. M wíy yu yé yuv, e fəə́r mbàʼ, é yúví yú yé nsay, e tsə̀nsí wuú.

²²Nsay wíy yu bunrì vifa veé sum, e yu yé vitiír vé melùʼ, à yé vici vé meŋgvə̀r me *oliv mè, é vifá vìn vi nèn bìnsí lèn jii, ‹Jesreel, á lèn, á lèn vifá ve wayin Nyùy kitú kfə́.›

²³M wíy dzə̀ʼə̀r Isray aáwuné nsay, aá kuʼkir. M sí wìy a sham kitúm ke mò‑oò yoŋ ji ‹Làmèndzən.› M sí wìy a yòŋ wír ve bó yòʼ‑oò dzəə̀n wír vém lèn ji ‹Vém vee wír›, aáwune wáa binsí sa mo ji Nyùy wov.»