Read Lamnso Hosea 5 Bible Online

Hosea 5 - Lamnso bible

Hosea 5

¹NYÙY TÀR kú a suŋnín, a suúy jii: «Ven vee atàá cù, vèn yuúrí. Éè vilìmbìy veé Isray, vèn yuúrí. Ven vee wón ntoʼ, vèn yuúrí kinyo kìn ki. Vèn kì yíi a tinén vinyo e nsànloŋ, mo vèn yàrìn, bo nsaʼ sí lo, e bìnkìr e věn kitu. Vèn cu anyùy e Mispa, cu e Gwan Tabor, a sì kitám ke wíri li sho, lálán, wo á ndzə́v sho.

²Vèn tùŋ ne bií é Shittim, wú shoó, a teʼ wíri shó.[12] Bìʼ bey, m lo, e màʼ ŋgeʼ e věn kitu wir dzə̀m.

³M kì kifá ke Isray dzəə̀n kíwun, a bó yòʼ dzə̀ wù lìr fo mǒ si. Ven vee Isray, vèn màʼày ne mo, e kfə̀n moo asàkì, a bó vèn yoʼ ghèén, a sùyrì mo.»

⁴Vinyo ve wíri buʼtì vi shèm ne fo áwune kfə́n é bàm e Nyùy wóv wùn. Shií wo áwune kér fo anyùyi yiì ne, a bó yòʼ dzə̀ á kfə̀n a kiíy NYÙY TÀR.

⁵Kiŋkoʼòrwùn ké wìr veé Isray ki mvə̀ʼ ne kinyè kév. Áwune kù yíi a beʼ kibeʼèy ké vinyò ve bi ví, a bàyrìn sho, é wír veé Judàa wáa bàyrìn sa e kév kí.

⁶Áwune yíi lì anjiì wùn aànàʼa, lóo dù ji á yii cú NYÙY TÀR shó, é la á yòʼ yèn wun. Á wíy a dù, a wù báʼár ne áwune, aá goʼ, kù áwune áwune.

⁷Áwune shwèy ne NYÙY TÀR, e dù a yen a dzə̀ anyùy ve səné, a wón ve á kéríi yòʼ dzə̀ vé Nyùy. Bìʼ bey, ŋkàʼ se á lem e kitu ke ŋwee ji sé Nyùy si ló, e bìnkìr, e laàr áwune láarin, à nsay yev shó.

⁸NYÙY TÀR suuy jii: «Á tóŋ á sóŋ rər é Gibea, e bùʼ shirəə́ e Rama, a koʼór kiyor e Bet‑Aven.[13] Éè vilum veé Benjamin, vèn ku fəə̀ é shùu rər.

⁹M wíy laàr kitúm kee Isray e kishiíy ke m sər áwune, a rám seé Isray si wíy kiíy ji kinyo ke m yoŋ kìn ki kù wíy gheén.

¹⁰«Dòʼshwiíy kív mo bìʼ vilìmbìy veé Juda, áwune ve á tsə̀ʼtìn ne bìíy ŋgvən. Bìʼ bey, m wíy yiì, é ŋgeʼ si gbu aáwuné kitu, kù mo gbu kóŋ.

¹¹Á táy wír veé mbìv wòŋ ye dzəə̀n Isray, a dzə̀ lòn mo wú koon áwune, e rə̀ʼtí. Á faàsì ne nsay ye yì‑iì dzəə̀n yéev féyì feyì, a kù dzə̀ bìʼ fo áwune shwèyìn ne NYÙY TÀR, a jùmrì a dzə̀ mebvə̀m.

¹²M wíy laàr wír veé Isray mo séʼ si là ndzə̀y, e səʼsí wír veé Juda mo mfə̀m sí là kicí.

¹³«Wír veé Israyi‑iì kìíy yàsí wov, wír veé Judàa kiíy vév vee viváv, Isray nèn dù, e mbaà fon woó Assiriya ji wù sə́ á áwune. Fə̀m mo á yoy, tiir e fòn wo wiy və̀n wùn, wù yòʼ wíy yu fóo fèr yàsí wov, kìn vileémé vév.

¹⁴A dzə̀ bìʼ fo mómò kitú kém, m wíy ghiʼ wír veé Isray moo bvərə̀ʼ, e ghiʼ wír veé Juda moo kintav ke wàn bvərə̀ʼ. Mo və̀n, m wíy sàʼtì áwune é vinsàr vinsàr. Saʼtì, é m nèn màʼtì áwune, a dù. M wíy sə̀ŋ áwune, e fəə́r, a bó wìr yòʼ wíy sə áwune.

¹⁵M wíy bìn ndzə̀m e wír vémé, kfə́n e mǒ kirə̀ʼ, aáwune yén ŋeʼndzə. Ŋgeʼ gháʼá, á yén jay wov, aá nèn kfə̀n e mǒ wùn.»