Read Lamnso Hosea 6 Bible Online

Hosea 6 - Lamnso bible

Hosea 6

¹Wír veé Israyi nèn lò, e sùúy jii: «Vèsən kfə́n é bàm e NYÙY TǍR wùn. Wù sàʼtì ne vèsən, yii bèy, a wù yíi fèr. Wù lèmér ne vèsən, yii bèy, a wù yíi kur vileémé vesən.

²Ké lèn ki, wù lo, e taŋ vèsən fo kpúu. Ntàm yòʼ‑óò dar, a bó wù fér vèsən, aá táv, e fíʼ a dzə sho e wun si, a wàrkìr.

³Vèsən ku wày vifií a dzə̀ e NYÙY TǍR wùn, e mùm kitávín ji vèsən kiíy wun kijuujùŋ. Rúrú, wù kù yíi wìy fo vèsən moo shúy ye yì tó kijàvndzə, a wù yòʼ‑óò ndzəy. Wù yíi rəə̀r vèsən moo wuú ye yí loon, nsay rə́, e kù rəə̀r moo wuú mbìyi yeé kimgbù ke wuu.»

⁴Yii bèy, NYÙY TÀR nén a ghay jii, «Éè wìr veé Isray wùn à veé Judàa, kinyo ke dzə̀ m yiì e vèn féyì feyì ki dzə̀ ka? Koŋ ye vèn koŋ moó kù dzə̀ moo mbàʼŋkfəə́mé ye à yén lèn, shishàr, yì nèn ŋeèmé, e lày, kìn moo ŋweʼ ye yí gbu kijàvndzə, yí kù nèn yùm é ghan.

⁵Á kinyo ke mò‑oò tsə́nsi aŋgàa ntum vém ji á tsə́m ven e lámé, é jí se sí fəə́ fo mǒ shuù si fiʼ laàr ven. A lòn wo m baʼtin kùm vené lo, e fəəsín mo shùy tó, ndzə ràn.

⁶Ke m kér shií shó ki dzə̀ jii, wíri wáa kòŋ mo woo Nyùy rú, e shaà fó a rəsí, a seerí a dzə̀ nyám si, a cù mo shó. Shií wom féyì feyì dzə̀ ji wíri kiíy mo, e shaà fó a rəsí, a yiì a dzə̀ cu ye tonèné.

⁷Yii bèy, wír vémé kù‑uù ŋwày *mensaŋ mem moo Adam, kù laarì a dzə̀ sí, e làa yòʼ a tiy e mǒ wùn.

⁸«Ŋkàlaʼ yee Gilead dzə̀ ye aŋgàa yiì vinyò ve bi ví, a vé kinjuyrìi fúm fo fumén, mvəmlaʼ e dzə̀m.

⁹Atàá cùu kù dzə̀ moo ŋgoo ashòŋ ye yì lìrìn, a teʼ wíri. Áwune lo, á yùyrí wíri é dzəə ye yì du e ŋkàlaʼ yee Shekem. Aá kù buʼtì vinyo búʼtin e kúmé.

¹⁰«M yèn ne kinsətìshuù ke kinyò e mbìv wòŋ ye dzəə̀n Isray. Wír vémé bìvír ne vitú vév e mebvə̀m me á ghvə́m mè.

¹¹Fo ké ven vee wír veé Juda ki, m lèm ne sa ghán se vèn yíi kav ŋgeʼlàʼ, fə̀m mo m kì koŋ kém ji m siir vijuŋ ve wìr vém fó.»